Yej kite̱miꞌ Jacob
Génesis 28:10‑22
17
Jacob ki̱saꞌ icha̱n itaj iwá̱n kikuiꞌ Hara̱n‑ojti. Iwá̱n asiꞌ ipan se̱ lugar kua̱ꞌ némiya takui̱kuiliwi, iwá̱n ka̱wiꞌ iga ompa matane̱si. Mokuajtetontij iga se̱ teꞌti yej ompa onoya, iwá̱n mote̱gaꞌ iga kóchiya. Iwá̱n kite̱miꞌ ijkí̱n: kitaꞌ se̱ escale̱r taksatoꞌ ipan ta̱jli, iwá̱n asitoya este ipan cielo, iwá̱n iya̱ngelejmeja Dios tejkawiáj iwá̱n temowa̱yaj ipan inó̱n escale̱j. No̱ kitaꞌ iga Dios ejkatoꞌ ajko ipan escale̱r, iwá̱n kijliá:—Nej iDio̱s motajwe̱wej Abraham iwá̱n yej motaj Isaac. Tej iwá̱n mopilowa̱n nia nimitzmakatij inó̱n ta̱jli ka̱n tiwetztoꞌ. Yejeme̱n poxsan yawij pi̱witij, iwá̱n inochi gente yej onokej ipan iní̱n ta̱jli yawij pa̱ktotij iga tej iwá̱n mopilowa̱n anmoconfia̱rowaj ipan nej. Nej nonoꞌ mowa̱n; nia nimitzcuida̱ro̱ti san ka̱n tia̱ti, iwá̱n después nimitzwajligas sej nijígapa.
Kua̱ꞌ Jacob isaꞌ iga te̱miktoya, kijtoj: “Nej nikijtoj anka nigaj nose̱lti nonoꞌ. Eꞌ ayéj ijkó̱n, porque Dios no̱ onoꞌ nigaj. ¡Iní̱n íkal Dios iwá̱n ikalte̱nyo cielo!”
Jacob poxsan majmawiꞌ. Iwá̱n kikuiꞌ teꞌti yej iga mokuajtetontijtoya, iwá̱n kiketzaꞌ iga mane̱si, iwá̱n kitoya̱wilij aceite iyi̱xko. Iní̱n kichij ken se̱ ofrenda iga Dios. Jacob kito̱ka̱wij Betel ompa ka̱n kochiꞌ. Iní̱n to̱ka̱ꞌ kijto̱jneki: íkal Dios. Ompa Jacob ijkí̱n kijtoj:
—Siga Dios ya̱j nowa̱n iwá̱n ne̱cuida̱ro̱j ka̱n iná̱n nia̱ti iwá̱n ne̱tamakas, iwá̱n ne̱makas iga manimota‑ajaki: entonces yéj yawi mochi̱wati noDio̱s, iwá̱n nochipa nia nikmakati se̱ de cada diez yej yéjpa yawi ne̱makati.