Te̱piltzi̱n kikajkaya̱wa itaj yej ito̱ka̱ꞌ Isaac
Génesis 27:1–28:2
16
Isaac póxsanya katka we̱wej, iwá̱n pajpachatiakay. Se̱ día kino̱tzaꞌ Esaú iwá̱n kijlij:—Nopiltzi̱n, nipoxwé̱weja iwá̱n se̱ de ini̱mej día wel nimiki. Mie̱j aya nimiki, nikneki maniktajtanili Dios iga mamitzmaka yej ye̱kti. Inó̱n iga nikneki iga xaj ipan kuayoj iwá̱n xikui̱ga motawíjto̱l iwá̱n mofle̱chajmej iga xikmikti se̱ anímal. Iwá̱n xine̱chi̱wili se̱ tákual yej we̱liꞌ ken nej nikwe̱lmati iwá̱n xine̱wajliguili iga manikua.
Rebeca kikaktoya yej Isaac kijlijtoya Esaú. Inó̱n iga kino̱tzaꞌ Jacob iwá̱n kijlij:
—Xikchi̱wa yej nia nimitzijli̱ti iwá̱n motaj yawi kite̱ne̱wi̱ti Dios iga tej. Xaj xine̱kui̱li̱ti o̱me yej chijchikaktiꞌ borre̱gojtzitzi̱n; iwá̱n nia nikchi̱wati se̱ tákual yej we̱liꞌ iga makikua motaj ken yéj kiwe̱lmati, iwá̱n tia tikui̱guili̱ti. Ijkó̱n yawi kite̱ne̱wi̱ti Dios iga mamitzmaka yej pox ye̱kti. Porque ijkó̱n nikaguiꞌ motaj kijlij mokni̱n.
Eꞌ Jacob kijlij iye̱ꞌ:
—Eꞌ nokni̱n poxsan tzojmiyoj isempan ikajlo̱ꞌ, iwá̱n nej ayá̱ꞌ, siga notaj mane̱chijchimi, yawi kimatiti iga ayéj niEsaú.
Eꞌ iye̱ꞌ kijtoj:
—Amo ximajmawi, xikchi̱wa yej nimitzijliá. ¡Xaj xine̱kui̱li̱ti o̱me borre̱gojtzitzi̱n!
Jacob kicre̱doj, yajki kikuito borre̱gojtzitzi̱n, iwá̱n kimijmiktij iwá̱n kiwi̱guilij iye̱ꞌ. Iwá̱n iye̱ꞌ kichij se̱ tákual yej pox we̱liꞌ ken Isaac kiwe̱lmatiá. Kiki̱xtij yej ye̱kti itzótzol Esaú, iwá̱n kajaki̱ltij Jacob. Iwá̱n iye̱ꞌ kikuiꞌ ikajlo̱ꞌ borre̱gojtzitzi̱n iga kimajma̱kimiloj Jacob iwá̱n no̱ kikechkimiloj ka̱n ayá̱ꞌ tzojmiyoj iwá̱n kimáꞌ tákual yej we̱liꞌ.
Iwá̱n Jacob kiwi̱guilij itaj iwá̱n kijlij:
—Notáj, xíkuaya inakayo anímal yej nikmiktij.
—¿Katiapa de nopilowa̱n in tej? —tatajtan Isaac.
—Nej niEsaú, mopiltzi̱n yej te̱ko̱ko —kijtoj Jacob, sie̱mpa nemi kikajkaya̱wa—. Níkchija yej tine‑ijlij. Nígaja onoꞌ motákual yej we̱liꞌ. Xíkuaya, iwá̱n después xikte̱ne̱wi Dios iga mane̱maka yej poxsan ye̱kti.
Iwá̱n Isaac kitajtan:
—¿Kén tikchij iga tikasiꞌ nimani̱nsan?
—Dios ne̱pale̱wij iga nikasiꞌ, inó̱n iga nimani̱nsan nikasiꞌ —kijtoj Jacob.
Eꞌ Isaac kijlij:
—Xine̱na̱ꞌtecho iwá̱n manimitzchijchimi, iga manikmachi̱li siga tejya nokta nopiltzi̱n Esaú.
Jacob kina̱ꞌtechoj itaj iga makichijchimi. Iwá̱n Isaac kijtoj:
—Niktajto̱lkaki iga Jacob, eꞌ ima̱mej ken yej Esaú. ¿Eꞌ tejya nokta in nopiltzi̱n Esaú?
—Kena, nej niEsaú —kijtoj Jacob.
Isaac kicre̱doj iga yéjya Esaú, iga Jacob kipiaya poxsan ima̱tzojmiyo, ken Esaú. Isaac kikuaj tákual yej kichi̱wilijkej iwá̱n kite̱ne̱wij Dios iga Jacob iwá̱n kijlij:
—Dios makichi̱wa iga tej, mopilowa̱n iwá̱n ipilowa̱n mopilowa̱n yej kito̱kaskej mamopoxchi̱wa ipan ta̱jli. Iwá̱n poxsan miaꞌ gente makiservi̱ro mopilowa̱n iwá̱n mopilowa̱n ipilówa̱mpa. Maye̱ꞌonoka̱n yej mitzye̱ꞌitaskej.
Tamiꞌ Isaac iga kite̱ne̱wij Dios iga Jacob, iwá̱n nemo̱ꞌ ki̱saya Jacob ka̱n onoya iwá̱n itaj, kua̱ꞌ asiko Esaú iga tatojtokato̱ya. No̱ kichij se̱ tákual yej we̱liꞌ, iwá̱n kiwi̱guilij itaj, iwá̱n kijlij:
—Ximokétzaya notáj; xíkuaya inakayo anímal yej nimitzmiktilij iwá̱n xiktajtanili Dios iga mane̱maka yej ye̱kti.
Iwá̱n Isaac kitajtan:
—¿A̱ꞌyéj tej?
Iwá̱n yéj kijtoj:
—Nej mopiltzi̱n Esaú yej te̱ko̱ko.
Isaac este moyo̱lmajtij poxsan, iwá̱n kino̱tzaꞌ, eꞌ este te̱nkuekuechkaꞌ:
—¿A̱ꞌtaj yéj in yej nokto̱ꞌ ne̱tamakako̱ya? Nej nitákuaja kua̱ꞌ aya tasi iwá̱n niktajtanílija Dios iga yéj makimaka yej ye̱kti.
Kua̱ꞌ Esaú kikaguiꞌ yej itaj kijtojtoya, kuejkuesiwiꞌ iwá̱n este cho̱gaꞌ iwá̱n kijtoj recio:
—¡O̱me ve̱ja ne̱ta̱niliá nokni̱n! Achto ne̱kui̱lij yej katka mochi̱waya nej notatki, iwá̱n iga nej katka manimanda̱ro iga nej nimelaꞌte̱ko̱ko, iná̱n ne̱kui̱lij yej notaj kinekiá iga Dios mane̱maka. Inó̱n iga ito̱ka̱ꞌ kijto̱jneki: yej takui̱liá. Notáj, achi xiktajtanili Dios iga mane̱maka no̱ kuajkuantas ye̱kti.
Iwá̱n Isaac kipowilij kensan iga kitajtanilij Dios iga iyikni̱n maye̱ꞌono:
—Ayꞌya wel sej niktajtaniliá Dios yej niktájtanya iga mokni̱n.
Esaú sej ki‑ojpa‑ijlij:
—¡No̱ xikte̱ne̱wi Dios iga nej!
Entonces Isaac kijlij:
—Tej iwá̱n mopilowa̱n ipilówa̱mpa ankijiyaskej mokni̱n iwá̱n ipilowa̱n ipilówa̱mpa. Se̱ o o̱me ve̱j amoma̱nawi̱skej, eꞌ después sej mitzta̱nili̱skej.
Iwá̱n íkua̱ꞌya Esaú kijíyaꞌya Jacob iga kikui̱lij yej itaj kinekiá iga Dios makimaka, iwá̱n se̱ día kijtoj: “Notaj póxsanya we̱wej; ayꞌya wejkatis iga yawi mikiti, iwá̱n nia nikmikti̱ti nokni̱n.”
Kua̱ꞌ Rebeca kimatiꞌ yej Esaú kichi̱jneki, tati̱tan iga kino̱tzatoj Jacob iwá̱n kijlij:
—Taꞌ xikaki, mokni̱n mitzmikti̱jneki. Inó̱n iga xiki̱sa imaní̱n nigaj. Xaj icha̱n nokni̱n Labán, iwá̱n acho̱ꞌ ompiga xono este que mamoyo̱lta̱li iga kuesitoꞌ mokni̱n iwá̱n make̱lká̱wa‑oꞌ yej tikchi̱wilij. Iwá̱n nia nimitztati̱tanili̱ti iga nimitzmati̱lti̱j iga xiwí̱kiya sej.
Iwá̱n Rebeca kijlij Isaac:
—Siga Jacob mona̱miktiá iwá̱n se̱ takotzi̱n yej nigaj cha̱ntitoꞌ Canaán, ken kichij iyikni̱n, nia niikno̱mikiti.
Iwá̱n Isaac kino̱tzaꞌ Jacob iwá̱n kijlij:
—Ayá̱ꞌ nikneki ximona̱mikti iwá̱n takotzi̱n yej cha̱ntitoꞌ nigaj Canaán. Xaj cha̱n moko̱ko Labán iwá̱n ximona̱mikti ompiga iwá̱n se̱ de isiwa̱pilowa̱n.