Jacob iwá̱n Esaú
Génesis 25:11, 19‑34; 26:1‑5, 12‑14, 34‑35
15
Isaac kipiaya cuarenta años kua̱ꞌ mona̱miktij iwá̱n Rebeca, iwá̱n mocha̱ntijkej ipan ta̱jli yej ito̱ka̱ꞌ Canaán; iwá̱n Dios poxsan kipale̱wijkej. Eꞌ Rebeca ayá̱ꞌ kitaya ipiltzi̱n, iwá̱n Isaac kitajtanilij Dios iga isiwa̱ꞌ makita ixo̱lo̱ꞌ. Dios kikaguiꞌ yej kitajtan Isaac, iwá̱n Rebeca xo̱lo̱yowiꞌ. Yéj ayá̱ꞌ kimatiá siga yawi kitati kua̱tejmej; entonces, kua̱ꞌ iga mokuejkuesowa̱yaj xo̱lo̱mej iyijtiko iye̱ꞌ, te̱ye̱ꞌ kijlij Dios: “¿Te iga ijkí̱n ne̱pasa̱rowa?” Iwá̱n Dios kijlij Rebeca iga yawi kitati kua̱tejmej. Kijlij: “Mopilowa̱n mochi̱waskej o̱me país. Desde motalaxijtiko moyojyokatíjkeja. Se̱ de yejemej má̱j tajpalej que seꞌ, yej achto tikitas yawi kipale̱wi̱ti itzo̱yo̱ꞌ.”Asiꞌ día iga Rebeca taonoltiaya, iwá̱n kitaꞌ kua̱tejmej, kensan iga Dios kijtoj. Yej achto kitaꞌ este chí̱ltiꞌsan itzónkal iwá̱n poxsan tzojmiyoj isempan, iwá̱n kito̱ka̱wijkej Esaú. Después onoko iyikni̱n, kiki̱tzkilijtiwa̱laj iyikxitzontekon Esaú iga se̱ ima̱ꞌ, inó̱n iga kito̱ka̱wijkej Jacob yej kijto̱jneki: yej takui̱liá.
Ko̱kone̱ꞌ moskaltijkej. Esaú tekiya̱ya ipan kuayoj iwá̱n poxsan wel tatojtokaya; Jacob, mochij se̱ ta̱gaꞌ yej kicuida̱rowa̱ya borrego iwá̱n tawelnemiá, yéj akanaj má̱j ya̱ya. Iwá̱n Isaac kikua̱ya yej Esaú kimiktia̱ya, inó̱n iga kinekiá má̱j que sewoꞌ; eꞌ Rebeca kipoxnekiá Jacob.
(Inó̱n ve̱j kipiayaj costumbre kua̱ꞌ iga te̱taj mikiá, te̱piltzi̱n yej te̱ko̱ko ka̱wiá iga manda̱rowa̱ya cha̱n itaj. Te̱taj, antes iga mamiki, kitajtanilia̱ya Dios iga te̱piltzi̱n yej te̱ko̱ko makimaka yej ye̱kti. Kikuiá o̱me parte herencia yej de itaj iwá̱n yej te̱tzo̱yo̱mej kikuiáj sejse̱san.)
Se̱ día Jacob nemi tamanaya, iwá̱n Esaú asiꞌ iga yajka ipan kuayoj poxsan siatiwa̱laj iwá̱n kijlij:
—Ne̱maka molente̱jaj, poxsan nimaya̱na.
Jacob kijtoj:
—Nia nimitzmakati nolente̱jaj, eꞌ nejwaꞌ manimochi̱wa ken nite̱ko̱ko.
Esaú kijtoj:
—¿Téjastaj ne̱servi̱rowa iga nite̱ko̱ko, siga nemi nimaya̱nmiki? Siga tine̱maka molente̱jaj, nia nimitzmakati iga ximochi̱wa xite̱ko̱ko.
Entonces Jacob kimáꞌ lenteja Esaú iwá̱n kikuaj.
Dios kiye̱ꞌitaꞌ poxsan Isaac, eꞌ inó̱n tiempo poxsan a̱pistajtiáꞌ no̱ya̱n ipan inó̱n ta̱jli.
Entonces Dios kijlij Isaac:
—Amo xaj Egipto, xika̱wi nigaj iwá̱n nia nimitzye̱ꞌchi̱wati. Inochi yej nikijlij Abraham yej mótajpa, inochi nia nikchi̱wati iga yéj ne̱cre̱doj iwá̱n kichij yej nikijlij. Ipilowa̱n mopilowa̱n yawij pi̱witij poxsan, iwá̱n pan ipilowa̱n mopilowa̱n, miaꞌ gente de inewi ta̱jli nia nikmakatij yej pox yejye̱kti.
Kua̱ꞌ iga Isaac to̱gaꞌ, poxsan mochij yej kito̱gaꞌ. Dios poxsan kiye̱ꞌchi̱j Isaac. Inochi yej kipiaya komatiáꞌ poxsan.
Kua̱ꞌ Esaú kipiaya cuarenta años, mona̱miktij iwá̱n o̱me siwa̱tkej Cananeas. Isiwa̱mej Esaú kipoxyo̱lmiktia̱yaj Rebeca iwá̱n Isaac.