Dios kipolowa a̱ltepe̱ꞌ yej ito̱ka̱ꞌ Sodoma eꞌ kima̱nawiá Lot
Génesis 19:1‑29
11
Kua̱ꞌ nemiy takui̱kuiliwi, ino̱mej o̱me̱n a̱ngelejmeja yej kipaxa̱lowili̱to̱yaj Abraham asikej Sodoma, eꞌ ne̱siáj ken gente. Iwá̱n Lot e̱watoya ojte̱noj ka̱n kalákiya ipan a̱ltepe̱ꞌ. Kua̱ꞌ kitaꞌ, moketzaꞌ iga ko̱mema̱wij. Motzompiloj iwá̱n kijlijkej:—Nokni̱wa̱n nimitzijliáj iga matia̱ka̱n kalijtiꞌ iga ompiga xikochitij. Mo̱sta isajpa anya̱skej.
Eꞌ yejeme̱n kijtojkej:
—Anka ayá̱ꞌ nia̱skej, gracias. Niawij nitane̱sitij ipan calle.
Eꞌ Lot poxsan kitejtekiꞌijlijkej iwá̱n este que kinekkej iga senyajkij icha̱n. Kua̱ꞌ asikej, Lot kichij tákual iga paxa̱lowa̱nimej iwá̱n cena̱rojkej.
Aya kocháj kua̱ꞌ inochi tajta̱gaꞌ yej icha̱mej ompa Sodoma kiyawalojkej kajli. Chokomej iwá̱n we̱wetkej pe̱wakej iga kitzajtziliáj Lot:
—¿Ka̱n onokej in tajta̱gaꞌ yej ye̱wa asikej mocha̱n? ¡Xiki̱xti̱ka̱n! ¡Niknekij manimote̱kaka̱n iwá̱n yejeme̱n!
Iwá̱n Lot ki̱saꞌ iga kino̱tzkej, eꞌ kua̱ꞌ ki̱saꞌ, paré̱j kiye̱ꞌtzakuaꞌ ikalte̱n iwá̱n kijlijkej:
—Noami̱gojwa̱n, amo xikchi̱waka̱n yej pox aye̱kti.
Eꞌ yejeme̱n kijtojkej:
—¡Xicholo ompa!
Nimani̱nsan kipe̱waltijkej iga kimagakej Lot iwá̱n kina̱ꞌtechojkej kalte̱n iga makixiti̱naka̱n. Iwá̱n a̱ngelejmej kima̱tila̱nkej Lot iga kakijkej kalijtiꞌ. Iwá̱n a̱ngelejmej kitzakkej kalte̱n iwá̱n inochi kipachatilijkej ino̱mej tajta̱gaꞌ yej onoyaj jue̱raj. Inochi este yej chokótzi̱noꞌ iwá̱n este yej ma̱jya we̱wej, pachatiakej. Iwá̱n ijkó̱n siawikej iga kima̱ma̱te̱mojtinemiáj kalte̱n.
Iwá̱n inó̱n o̱me̱n paxa̱lowa̱nimej kijlijkej Lot:
—Xikui mosiwa̱pilowa̱n, iwá̱n yej mona̱mikti̱jnekij iwa̱mej, iwá̱n inochi yej tikpiá ipan iní̱n a̱ltepe̱ꞌ; xiki̱xti iwá̱n xikui̱ga wejka. A̱n sí niáwija nokta nikpolo̱tij in iní̱n a̱ltepe̱ꞌ iga poxsan kichi̱waj yej aye̱kti gente yej nij cha̱ntitokej iwá̱n ásiꞌya este iyi̱xtaj Dios, iwá̱n inó̱n iga ne̱ti̱tankej iga manikpolo̱ka̱n.
Iwá̱n Lot yajki kitato chokomej yej mona̱mikti̱jnekij iwá̱n itakomej, iwá̱n kijlijkej:
—¡Matiki̱sáka̱nya nigaj, iga Dios yawi kipolo̱ti iní̱n a̱ltepe̱ꞌ!
Eꞌ chokomej ayá̱ꞌ kicre̱dojkej yej Lot kijtoj, iwá̱n como némiya tane̱siá, a̱ngelejmej kijlijkej Lot:
—¡Ximapora̱do! xiki̱xti mosiwa̱ꞌ nigaj iwá̱n inó̱n o̱me motakomej, siga ayá̱ꞌ tikneki iga ximiki kua̱ꞌ niawij niktati̱tij ge̱ntejmej de iní̱n a̱ltepe̱ꞌ.
Eꞌ como Lot pox i̱ꞌsan ne̱nentoya, inó̱n o̱me a̱ngelejmej kima̱tila̱ntiajkij, yéj iwá̱n isiwa̱ꞌ iwá̱n itakomej iga Dios kikné̱lijoꞌ yejeme̱n, iwá̱n kiki̱xtij ipan inó̱n a̱ltepe̱ꞌ iga kima̱nawij.
Kua̱ꞌ kí̱skeja ipan a̱ltepe̱ꞌ, se̱ de ino̱mej a̱ngelejmej kijtoj:
—¡Ximotalo̱ka̱n, ximoma̱nawi̱ka̱n! Amo xitachaka̱n amotepotztaj, niga ximoke̱ketztia̱ka̱n ka̱n planada. Xa̱ka̱n pan tepe̱mej siga ankinekij ximoma̱nawi̱ka̱n.
Eꞌ Lot kijlijkej:
—¡Ayá̱ꞌ nokni̱mej! Amejeme̱n anne̱pale̱wíjkeja poxsan, anmochijkej pox ante‑ijikni̱mej iwá̱n nej iga anne̱ma̱nawijkej. Eꞌ awel niawij ipan tepe̱mej, iga ompa wel ne̱pasa̱rowaj tejté̱ yej aye̱kti iwá̱n nimikiskej. Ne‑iga onoꞌ se̱ a̱ltepe̱ꞌ poxsan ali̱mpatzi̱n. Na̱ꞌsan onoꞌ wa̱n wel nimoma̱nawiáj ípan. Ompiga xine̱ti̱tanika̱n.
Se̱ de yejeme̱n kijtoj:
—Onoꞌ bien. Nia nikchi̱wati yej tine‑ijlij. Ayá̱ꞌ nia nikpolo̱ti a̱ltepe̱ꞌ iga yej tine‑ijlij. ¡Xá̱ka̱nyawaꞌ ompiga!, awel nikchi̱wa nité̱ mie̱j iga aya amasij ompiga.
Kua̱ꞌ tané̱siꞌya, Lot asiꞌ ipan inó̱n a̱ltepe̱ꞌ yej ito̱ka̱ꞌ Zoar, Dios kiti̱tan tiꞌti iwá̱n azufre yej wetziꞌ ipan Sodoma iwá̱n Gomorra ken tikita tiawa̱ꞌ; kipoloj inochi yej cha̱ntitoyaj ompa iwá̱n kipoloj no̱ inochi mi̱jlimej iwá̱n inochi yej ta̱kilyowij yej onoya pan planada.
Isiwa̱ꞌ Lot ya̱ya tatepotztaj, tacháꞌ itepotztaj iwá̱n ómpaya ejkatika̱wiꞌ, ayꞌya semi mo̱li̱n iga móchija estatua de istaꞌ.
Seꞌya día isajpa, Abraham yajki ka̱n nokta ta̱tapowaꞌ iwá̱n Dios; tacháꞌ ila̱doj Sodoma iwá̱n ila̱doj Gomorra iwá̱n no̱ya̱n ka̱n planada, iwá̱n kitaꞌ iga no̱ya̱n tejkawiá po̱kti, ken tikita se̱ weyi tiꞌti. Ijkó̱n Dios kejla̱n Abraham iwá̱n kiki̱xtij Lot ompa ka̱n poliwilo̱ꞌ.