Abraham kite̱ne̱wiá Dios iga amo mapoliwika̱n gente yej cha̱ntitokej Sodoma
Génesis 18
10
Se̱ día toTe̱ko Dios ki̱xne̱xtilij Abraham. Abraham e̱watoya ipan ikalte̱n kua̱ꞌ kitaꞌ e̱yi tajta̱gaꞌ ejejkatokej iyi̱xtaj. Iwá̱n se̱ de yejéme̱mpa, Dios.Kua̱ꞌ Abraham kitaꞌ imaní̱n moketzaꞌ iga ki‑o̱mema̱wij iwá̱n kiwi̱gakej iga mamose̱wi̱tij itampa kuawiꞌ ka̱n tasejka̱n, iwá̱n tatekimáꞌ iga mamokuiti a̱ꞌti iga mamokxipa̱kaka̱n iwá̱n no̱ tatekimáꞌ iga mamokuiti tákual iga yejeme̱n.
Kua̱ꞌ támiꞌya takuajkej, paxa̱lowa̱nimej kitajtankej Abraham:
—¿Ka̱n onoꞌ mosiwa̱ꞌ Sara?
—Ne̱ onoꞌ kalijtiꞌ —kijtoj Abraham.
Iwá̱n se̱ de yejeme̱n kijtoj:
—Se̱ xiwiꞌ sej niwi̱ꞌ nimitzpaxa̱lowili̱ki iwá̱n íkua̱ꞌ mosiwa̱ꞌ Sara yáwiya kipiati se̱ ipiltzi̱n.
Mie̱j kalijtiꞌ Sara kikaktoya inochi yej kijtojtoyaj, wejwetzkaꞌ iga yéj iwá̱n Abraham póxsanya katka yo̱lejkej.
Iwá̱n Dios kijlij Abraham:
—¿Te iga wetzka Sara? Iga Dios ateyi yej awel makichi̱wa.
Despué̱j ino̱mej paxa̱lowa̱nimej mokejketzkej iwá̱n ojkuikej ila̱doj a̱ltepe̱ꞌ Sodoma. Iwá̱n ijkí̱n kijtoj Dios: “Anka ye̱kti iga manikijli Abraham yej nia nikchi̱wati, iga yéj yawi mochi̱wati te̱taj de se̱ weyi nación. Pues nej nikijlij iga nia nikmakati yej ye̱kti inochi gente iga yéj kichi̱wa ken nikijliá; iwá̱n no̱ niktapejpen iga makitekimaka ipilowa̱n iwá̱n yej ipilówa̱mpa ipilowa̱n iga makichi̱waka̱n yej nikmachtijkej iwá̱n makichi̱waka̱n inochi yej ye̱kti iwá̱n ijkó̱n nej nia nikchi̱wati inochi yej nikijlij.”
Iwá̱n ijkí̱n Dios kijlij Abraham:
—Ge̱ntejmej yej cha̱ntitokej Sodoma iwá̱n Gomorra momati iga ayá̱ꞌ ye̱ꞌnemij iwá̱n kipoxchi̱waj yej aye̱kti. Iná̱n nia ompiga iga manikita siga kichijtokej yej poxsan aye̱kti ken iga mojtowa. Siga kichijtokej nia nikmatiti.
Iwá̱n iyo̱mexti paxa̱lowa̱nimej yajkij Sodoma, eꞌ Dios ká̱wigoꞌ achi má̱j iwá̱n Abraham. Iwá̱n Abraham kitajtan Dios:
—¿Ix tia tikchi̱wati iga mamikika̱n seka̱n yej ye̱ꞌnemij iwá̱n yej kipoxchi̱waj yej aye̱kti? Siga onoꞌ ipan inó̱n a̱ltepe̱ꞌ cincuenta tajta̱gaꞌ yej ye̱ꞌnemij, ¿ix tia tikikne̱liti ino̱mej cincuenta? Awel xikmíktiya yej ye̱ꞌnemij iwá̱n ino̱mej yej ayá̱ꞌ ye̱ꞌnemij. Tej tijue̱z yej tikmanda̱rowa inewi ta̱jli, iwá̱n nochipa tia tikchi̱wati yej ye̱kti.
Iwá̱n Dios kijtoj:
—Siga nikasi cincuenta yej ye̱ꞌnemij ipan a̱ltepe̱ꞌ Sodoma, iga yejeme̱n nia nikikne̱liti inochi yej cha̱ntitokej ompa.
Abraham sej kijlij:
—Xine̱perdona̱ro iga nimi̱xe̱wiá iga nimitzno̱tza ijkí̱n, pues tej tiDio̱s iwá̱n nej nichijtoꞌ iga ta̱lpíno̱l. Eꞌ siga políwi‑oꞌ cinco yej ye̱ꞌnemij iga mamasi cincuenta, ¿ix tikpólo̱jsan inewi a̱ltepe̱ꞌ iga inó̱n cinco yej poliwi?
Dios kijtoj:
—Siga nikasi cuarenta y cinco yej ye̱ꞌnemij ayá̱ꞌ nia nikpolo̱ti.
—Siga maono cuarenta yej ye̱ꞌnemi, ¿ix tikpólo̱joꞌ in a̱ltepe̱ꞌ? —ki‑ojpatajtan Abraham.
—Iga inó̱n cuarenta ayá̱ꞌ nia nikpolo̱ti a̱ltepe̱ꞌ —kijtoj Dios.
Eꞌ Abraham sej kijlij:
—Nimitzijliá iga amo xine̱kuesowili iga nimitzojpa‑ijliá ino̱nsan sej. Eꞌ siga tikasis ompa treinta yej ye̱ꞌnemij, ¿ix tikpolo̱j in a̱ltepe̱ꞌ?
Dios sej kijlij:
—Siga nikasi treinta ayá̱ꞌ nia nikpolo̱ti a̱ltepe̱ꞌ.
Abraham sej ki‑ojpa‑ijlij:
—NoTe̱ko nimajmawi iga sej nimitzojpatajtani, eꞌ ¿ix tikpolo̱j in a̱ltepe̱ꞌ siga tikasis veinte yej ye̱ꞌnemij?
Dios kijtoj:
—Iga inó̱n veinte yej ayá̱ꞌ kichi̱waj yej aye̱kti, ayá̱ꞌ nia nikpolo̱ti a̱ltepe̱ꞌ.
Abraham sejoꞌ ki‑ojpa‑ijlij:
—NoTe̱ko achi xine‑ikne̱li iga amo xine̱kuesowili, eꞌ nia nitajto̱ti iná̱n se̱san ve̱j iwá̱n ayꞌya má̱j nia nimitzkuejkueso̱ti; ¿ix tikpolo̱j in a̱ltepe̱ꞌ siga tikasis diez yej ye̱ꞌnemij?
Dios kijlij:
—Nike maono diez yej ye̱ꞌnemij aya̱ꞌsan nia nikpolo̱ti a̱ltepe̱ꞌ.
Kua̱ꞌ Dios tamiꞌ tajtoj iwá̱n Abraham, yajki. Iwá̱n Abraham yajki sej ka̱n onoꞌ ikuetaxkajli.