Dios motajto̱ltiáj iwá̱n Abraham
Génesis 15:1‑6, 13‑14, 18; 16:1‑12, 15‑16; 17:1‑21, 23‑27
9
Despué̱j Dios kino̱tzaꞌ Abraham iwá̱n kijlij:—Amo ximokno̱mati Abraham, nej nimitzma̱nawiá iwá̱n nimitzmakas yej pox vale̱rowa.
Eꞌ Abraham kijtoj:
—¿Notejas iga xine̱maka inó̱n yej pox vale̱rowa? Tej tikmati iga ayá̱ꞌ nipilwaj.
Iwá̱n Dios kiki̱xtij Abraham ompa ka̱n ta̱tapojtoyaj iwá̱n kijlij:
—Xikye̱ꞌtachi̱li cielo iwá̱n xiconta̱ro si̱talimej, siga wel; iga ijkó̱n yawi pi̱witi mopilówa̱mpa ipilowa̱n.
Abraham moconfia̱roj iga wel mochi̱was yej Dios kijlij. Inó̱n iga Dios kitaꞌ ken se̱ ta̱gaꞌ yej poxsan ye̱ꞌnemi.
Dios no̱ kijlij Abraham:
—Xikmati iga mopilówa̱mpa ipilowa̱n yawij mocha̱nti̱tij ipan se̱ país ka̱n ayéj ita̱lmej. Ompa yawij onotij ken escla̱vojmej,a yawij kikno̱chi̱watij cuatrocientos años. Eꞌ nej nia nicastiga̱ro̱ti inó̱n nación iga poxsan yawij kitekipano̱lti̱tij mopilówa̱mpa ipilowa̱n. Iwá̱n despué̱j mopilówa̱mpa ipilowa̱n ompa kimajka̱waskej iwá̱n kua̱ꞌ ki̱saskej, poxsan motapiali̱skej. Iní̱n ta̱jli nia nikmakati mopilowa̱n, pe̱was ipan río de Egipto iwá̱n tamatiti este ipan we̱ya̱ꞌ, yej ito̱ka̱ꞌ Eufrates.
Panojkay má̱j de diez años desde iga Dios kijlij Abraham iga yawi kimakati yéj iwá̱n ipilówa̱mpa ipilowa̱n inó̱n ta̱jli yej de Canaán. Eꞌ Abraham iwá̱n Sara aya pilwajkej. Icha̱n Abraham onoya se̱ siwa̱ꞌ de Egipto ito̱ka̱ꞌ Agar, ompa onoya iga tekipanowa̱ya, iwá̱n inochi yéj kichi̱waya iga yéj onoya iga iyescla̱vaj Sara. Se̱ día Sara kijlij Abraham:
—Taꞌ xikita, Dios ayá̱ꞌ kineki iga manikpiá nopiltzi̱n, eꞌ nimitzijliá iga ximotecho iwá̱n noescla̱vaj Agar. Pues nej nikijtowa iga ipan yéj kena tikpiás mopiltzi̱n.
Abraham kineꞌ ken iga Sara kijtoj, iwá̱n despué̱j Abraham kitechoj Agar. Kua̱ꞌ Agar kimachí̱lija iga xo̱ló̱yoja, kijiyayay ipatro̱naj iwá̱n ayꞌya kiye̱ꞌitaya. Iwá̱n Sara mote̱lwij iná̱ꞌ Abraham, iwá̱n Abraham kijtoj:
—Taꞌ xikita, moescla̱vaj tej tikmanda̱rowa. Xikchi̱wili ken tej tikneki.
Iwá̱n íkua̱ꞌya Sara kipe̱waltij iga kikno̱chij Agar. Iwá̱n Agar choloj iwá̱n yajki ipan desiertob ka̱n ayagaj cha̱ntitoꞌ. Eꞌ iyá̱ngelc Dios kasiꞌ ipan desierto ite̱noj a̱tzontekon, iwá̱n kijlij:
—Xaj sej ka̱n onoꞌ mopatro̱naj iwá̱n xikchi̱wa inochi yej yéj yawi mitzijli̱ti. Tia tikpiati poxsan mopilowa̱n. Inó̱n mopiltzi̱n yej tia tikpiati tia tikto̱ka̱wi̱ti Ismael, iga Dios mitzítaꞌya iga ticho̱katoꞌ. Kua̱ꞌ yéj yawi yo̱lasiwiti, yawi lucha̱ro̱ti iwá̱n a̱ꞌsan ne̱sis, iwá̱n nochi yawij lucha̱ro̱tij ico̱ntraj yéj.
Iwá̱n Agar yajki sej icha̱n Abraham. Despué̱j Agar kitaꞌ se̱ ichoochi̱n. Inó̱n ve̱j Abraham kipiaya ochenta y seis años iwá̱n inó̱n xo̱lo̱ꞌ kito̱ka̱wij Ismael.
Kua̱ꞌ Abraham kipiaya noventa y nueve años, Dios ki̱xne̱xtilij iwá̱n kijlij:
—Nej niDio̱s yej nochi wel nikchi̱wa. Xiye̱ꞌnemi, amo xikchi̱wa yej aye̱kti no‑i̱xtaj iwá̱n tiawij timotajto̱lti̱tij. Nia nikpi̱wi̱ti poxsan mopilówa̱mpa ipilowa̱n iwá̱n ipan tej yawij ki̱satij yej mochi̱wati re̱yejmej iwá̱n kichi̱waskej pai̱smej. Inó̱n pacto yej nikchi̱wa iwá̱n tej iwá̱n inochi mopilowa̱n, iga nej nia nimochi̱wati nochipa amoDio̱s. Tej iwá̱n yejeme̱n nia nimitzmakatij ta̱jli yej ito̱ka̱ꞌ Canaán, inó̱n ta̱jli ka̱n iná̱n ticha̱ntitoꞌ. Nia nimitzmakatij iga nochipa mamochi̱wa amotatki iwá̱n nej nia nimochi̱wati amoDio̱s.
’Amo xike̱lka̱waka̱n yej nimitzijlijkej. Iní̱n anyawij ankichi̱watij: inochi tajta̱gaꞌ yej de amejéme̱mpa yawij kichi̱wili̱tij se̱ operación yej kijliáj circuncisión.d Inochi tajta̱gaꞌ makitekili̱ka̱n ikua̱kajlo̱tzi̱n ípan. Inó̱n yawi mochi̱wati iga mane̱si iga nimotajtó̱ltija iwá̱n amejeme̱n. De a̱man iwá̱n nochipa, inochi tajta̱gaꞌ yej de amejéme̱mpa yawij mocircuncida̱ro̱tij kua̱ꞌ kipiaya ocho día iga nace̱rojkej. Ijkó̱n nopa̱ctoj ne̱stika̱witi ipan ikajlo̱mej ipan inochi ivi̱dajmej. Yej ayá̱ꞌ kinekis iga mocircuncida̱ro̱j awel mocha̱nti̱j iwá̱n amejeme̱n iga ayá̱ꞌ kichi̱wa ken kijtowa nopa̱ctoj.
Dios kijlij no̱ Abraham:
—Nia nimitzmakati se̱ mopiltzi̱n ipan Sara.
Abraham moto̱lojtiajki este ipan ta̱jli iga motankua̱ketzaꞌ iwá̱n kijtoj ipan iya̱lmaj: “¿Ixtaj se̱ ta̱gaꞌ de cien años weljoꞌ kipiá ipiltzi̱n? ¿Ix a̱n cierto iga Sara weljoꞌ kitas ipiltzi̱n, eꞌ kipiaya noventa años?”
Iwá̱n Dios kijlij:
—Nej nikijtoj iga mosiwa̱ꞌ Sara yawi mitzmakati se̱ mopiltzi̱n iwá̱n tia tikto̱ka̱wi̱ti Isaac. Yéj yawi kitati ixo̱lo̱ꞌ iní̱mejsan fechas ipan ini̱nsan año yej wi̱ꞌ.
Abraham kichij ken Dios kijtoj, iwá̱n no̱ kicircuncida̱roj Ismael, iwá̱n ino̱nsan día no̱ kicircuncida̱rojkej iyescla̱vojmej iwá̱n inochi yej onoyaj icha̱n Abraham yej ompa tekipanowa̱yaj, ijkó̱n ken Dios kitekimáꞌ. Abraham no̱ mocircuncida̱roj.