Dios kitapejpena Abraham
Génesis 11:10, 27‑32; 12:1‑20
7
Onoya se̱ ta̱gaꞌ yej ito̱ka̱ꞌ Taré yej ipíltzi̱mpa ipilowa̱n Sem. Taré kipiáꞌ se̱ ipiltzi̱n yej kito̱ka̱wij Abraham. Abraham mona̱miktij wa̱n se̱ takotzi̱n yej ito̱ka̱ꞌ Sara. Iwá̱n yejeme̱n onoya se̱ isobri̱noj ito̱ka̱ꞌ Lot. Cha̱ntitoyaj ipan país yej ito̱ka̱ꞌ Babilonia,a ipan se̱ a̱ltepe̱ꞌ yej ito̱ka̱ꞌ Ur.Se̱ día Dios kijlij Abraham:
—Xikajte̱wa móta̱l, mokni̱wa̱n iwá̱n íkal motaj iga tia̱ti ipan ta̱jli ka̱n nej nia nimitzne̱xtili̱ti. Iwá̱n mopilowa̱n poxsan yawij pi̱witij iwá̱n ipan yejeme̱n nia nikchi̱wati se̱ weyi nación; nia nimitzyo̱lchika̱wati iwá̱n moto̱ka̱ꞌ poxsan yawij kiweyimati̱lti̱tij. Iwá̱n iga tej tine̱cre̱dowa, sekin no̱ yawij pa̱kitij. Nikye̱ꞌitas yej mitzye̱ꞌitas iwá̱n ayá̱ꞌ nikye̱ꞌitas yej ayá̱ꞌ mitzye̱ꞌitas. Iga tej inochi familias de iní̱n ta̱jli yawij yo̱lpa̱kitij iga kipiaskej yej ye̱kti.b
Taré yej ítajpa Abraham, ki̱saꞌ ipan íta̱l. Yajki iwá̱n Abraham iwá̱n Sara yej isíwa̱ꞌpa Abraham. Lot yajkij no̱ iwa̱mej ipan seꞌ ta̱jli yej ito̱ka̱ꞌ Canaán. Kua̱ꞌ asikej ipan a̱ltepe̱ꞌ yej ito̱ka̱ꞌ Harán, ompa ka̱wikej iga mocha̱ntijkej. Yej ítajpa Abraham miguiꞌ ipan inó̱n a̱ltepe̱ꞌ yej ito̱ka̱ꞌ Harán.
Kua̱ꞌ míguiꞌya itaj, Abraham kichij inewi kensan Dios kitekimáꞌ. Iwá̱n ki̱saꞌ Abraham iwá̱n Sara iwá̱n Lot ipan inó̱n a̱ltepe̱ꞌ yej ito̱ka̱ꞌ Harán iwá̱n iborre̱gojmej, igana̱doj iwá̱n yej kicuida̱rowa̱yaj igana̱doj. Iwá̱n asikej ka̱n kito̱ka̱wia̱yaj Betel, ipan inó̱n ta̱jli yej ito̱ka̱ꞌ Canaán. Yej icha̱mej Canaán kijlia̱yaj cananeo, eꞌ Dios kijlij Abraham iga inó̱n ta̱jli yawi ka̱witi iga ipilowa̱n. Iwá̱n Abraham kinechkoj teꞌti iga kichij ompa se̱ altarc iwá̱n iyi̱xko kitatij se̱ aníma̱l iga kimáꞌ Dios.
Iwá̱n a̱pistajtiáꞌ no̱ya̱n ipan inó̱n región. Abraham kijtoj iga ayꞌya kipiás te̱ kikua̱j iwá̱n yajki mocha̱nti̱to Egipto, iga kikaguiꞌ ompiga onoya tákual.
Kua̱ꞌ asitiá̱yaja Egipto, Abraham kijlij isiwa̱ꞌ:
—Nej nikmati iga tej tipoxmo̱nsajtiꞌ iwá̱n kua̱ꞌ egi̱pciojmej mitzitaskej, yawij mitze̱le̱wi̱tij. Iwá̱n yawij ne̱mikti̱tij iga xika̱wi iga yejeme̱n. Inó̱n iga xikijli̱ka̱n iga tinokni̱n.
Kua̱ꞌ asíkeja Egipto, egi̱pciojmej kitakej Sara iga poxsan mo̱nsajtiꞌ. Iwá̱n yajkij kijli̱toj Faraón, yej egi̱pciojmej irre̱ymej, iga inó̱n siwa̱ꞌ poxsan mo̱nsajtiꞌ. Despué̱j egi̱pciojmej kiwi̱gakej Sara icha̱n Faraón iga íwa̱n mamona̱mikti. Faraón kinekiá iga makipiá ken se̱ yej imelaꞌsiwa̱ꞌ. Inó̱n iga Faraón kimáꞌ Abraham borre̱gojmej, va̱cajmej, bu̱rrojmej, came̱llojmejd iwá̱n mo̱nsojmej. Eꞌ Dios akiye̱ꞌitaꞌ yej nemi kichi̱waj. Iwá̱n Dios kikno̱chij Faraón; isiwa̱mej iwá̱n ipilowa̱n menferma̱rojkej. Inó̱n iga Faraón tati̱tan iga makino̱tzatij Abraham iwá̱n kijlij:
—¿Te iga iní̱n tine̱chi̱wilij? ¿Te iga ayá̱ꞌ tine‑ijlij iga iní̱n siwa̱ꞌ tejpa mosiwa̱ꞌ? Tej tikijtoj iga mokni̱n iwá̱n tikmáꞌ lugar iga manikui katka mosiwa̱ꞌ iga nosiwa̱ꞌ. Nigaj onoꞌ mosiwa̱ꞌ. ¡Xíkuiya iwá̱n xá̱ka̱nya!
Iwá̱n Abraham ki̱saꞌ Egipto, iwá̱n isiwa̱ꞌ iwá̱n inochi yej kipiaya.