Kua̱ꞌ a̱poliwilo̱ꞌ iga tiawa̱ꞌ
Génesis 6:5‑18, 20, 22; 7:1–8:22; 9:1‑3, 11‑13
5
Kua̱ꞌ Dios kitaꞌ iga póxsanya mialo̱ꞌ iwá̱n nochipa kejla̱ntokej iga kichi̱waj yej aye̱kti, poxsan mokno̱matiꞌ iga kichij gente. Iwá̱n kijtoj:—Bá̱ldejsan nikchij gente. Iná̱n nia nikpolo̱ti inochi yej onoꞌ ipan ta̱jli, iwá̱n inochi anima̱lmej yej wejweyi iwá̱n yej ajali̱mpa ken ta̱kayo̱mej, kowa̱mej iwá̱n to̱to̱mej. Masejtaj anikchij.
Onoya se̱tzi̱n ta̱gaꞌ yej Dios kiye̱ꞌitaꞌ. Inó̱n ta̱gaꞌ ito̱ka̱ꞌ Noé. Yéj poxsan ye̱ꞌnemiá iga nochipa kicre̱dowa̱ya Dios más que inochi tajta̱gaꞌ yej de itie̱mpoj. Noé imelaꞌse̱lti yej kichijtoya ken Dios kineki. Noé kipiáꞌ e̱yi ipilowa̱n yej kito̱ka̱wijkej Sem, Kam iwá̱n Jafet.
Iwá̱n Dios kijlij Noé:
—Niksentá̱lija noa̱lmaj iga nia nikpolo̱ti gente yej onoꞌ ipan ta̱jli iga poxsan kichijtokej yej aye̱kti iwá̱n san kejla̱ntokej iga kichi̱waj yej aye̱kti. Inó̱n iga nia nikpolo̱ti ipan ta̱jli, eꞌ nia nimitzma̱nawi̱ti tej iwá̱n mosiwa̱ꞌ wa̱n mopilowa̱n. Iná̱n nikneki xikchi̱wa se̱ weyi á̱ka̱l de kuawiꞌ iwá̱n xikta̱tajkotzakua ka̱n makalakika̱n yo̱lka̱mej iwá̱n ka̱n no̱ makalakika̱n mopilowa̱n. Xiktzajtzakua iga sása̱l kajká̱n takoyajtoꞌ iga amo maa̱kalaki. Inó̱n á̱ka̱l achí̱n yawi medi̱ro̱ti: 135 metros iweyajka, 23 metros ikoyajka iwá̱n 14 metros iwejkapanka. Makipiá e̱yi pisos iwá̱n se̱ ventana ken a medio metro tánipa del techo. Iwá̱n no̱ yawi kipiati puerta se̱ lado. Kua̱ꞌ támisya tikchi̱was in á̱ka̱l, nia nikti̱taniti poxsan komati tiawa̱ꞌ ipan ta̱jli iga nia nikpolo̱ti inochi yej iná̱n vivi̱rowa ipan ta̱jli. Tejsan nia nimitzma̱nawi̱ti iwá̱n mosiwa̱ꞌ wa̱n mopilowa̱n wa̱n mosiwa̱momej.
Noé kichij inewi kensan Dios kijlij. Kua̱ꞌ weyi á̱ka̱l tzó̱piꞌya, Dios kijtoj:
—Xikalákiya ipan á̱ka̱l iwá̱n inochi mofami̱liaj, iga inochi yej vivi̱rowaj iní̱n tiempo, mose̱lti yej tiye̱ꞌnemi no‑i̱xtaj.
Iwá̱n Noé kalaꞌ ipan á̱ka̱l iwá̱n isiwa̱ꞌ, ipilowa̱n iwá̱n isiwa̱momej iga mamoma̱nawi̱ka̱n ipan inó̱n tiawa̱ꞌ yej pox recio. Iwá̱n yejeme̱n kalakkej inochi clase anima̱lmej, ta̱kayo̱mej, kowa̱mej iwá̱n to̱to̱mej. Kalakkej se̱ yej okich iwá̱n se̱ yej siwa̱ꞌ de cada anima̱lmej, ijkó̱n ken Dios kijlij Noé iga makichi̱wa iga amo mapoliwika̱n inochimej. Iwá̱n no̱ kalakkej seꞌ seis pareja de sejse̱pa clase aníma̱l yej welpa mokua. Kua̱ꞌ pánoja siete día inochimej onóyaja iyijtiko á̱ka̱l. Iwá̱n Dios kikalte̱ntzakuaꞌ iwá̱n íkua̱ꞌ tzi̱ntiꞌ tiawa̱ꞌ yej poxsan recio.
Cuarenta día iwá̱n cuarenta yówal tiawa̱tajtitoya. Kua̱ꞌ a̱ꞌti téjkaja ipan ta̱jli, á̱ka̱l majkej iwá̱n pé̱waꞌya iga ajki. A̱ꞌti tejkatia̱ya ajachi ajachi este kitzakuaꞌ inochi tepe̱yoj yej má̱j wejwejkapan. Ijkó̱n iga a̱mikikej inochi gente yej onoyaj ipan ta̱jli iwá̱n no̱ mikikej nochi anima̱lmej. Ise̱lti Noé iwá̱n yej onoyaj ipan á̱ka̱l ayá̱ꞌ a̱mikikej; eꞌ yej ayá̱ꞌ kalakkej ipan á̱ka̱l a̱mikikej.
Ta̱jli a̱te̱ntoya ciento cincuenta día, eꞌ Dios ayá̱ꞌ ke̱lkaj Noé iwá̱n inochi anima̱lmej yej onokej ipan á̱ka̱l. Inó̱n iga Dios kichij iga maejekatajtiá ipan ta̱jli, iwá̱n a̱ꞌti pe̱waꞌ iga temoj ajachi ajachi, este ipan mes siete, inó̱n á̱ka̱l moketzato ipan tepe̱yoj yej ito̱ka̱ꞌ Ararat. A̱ꞌti segui̱roj iga temo̱tiajki iwá̱n ipanya mes diez, ne̱siaja tepe̱mej yej má̱j wejwejkapan.
Kua̱ꞌ pánoja cuarenta día Noé kitapoj iventa̱najyo á̱ka̱l iwá̱n kimajkaj se̱ to̱to̱ꞌ yej ito̱ka̱ꞌ cuervoa, eꞌ inó̱n to̱to̱ꞌ pa̱pata̱ntinemiá iwá̱n mokuepaya sej. Ijkó̱n kichijtoya este que wa̱guiꞌ a̱ꞌti. Despué̱j Noé kimajkaj se̱ jojtoko iga makimati siga ye̱ꞌwa̱ꞌya in a̱ꞌti. Iwá̱n inó̱n jojtoko mokuepaꞌ sej ipan á̱ka̱l iga ayá̱ꞌ kasiꞌ nikanaj ka̱n tawa̱ktoꞌ iga mamoketza. Puej ta̱jli te̱ntoya‑oꞌ iga a̱ꞌti. Iwá̱n Noé kimajkuiꞌ in jojtoko iwá̱n kakij a̱ka̱lijtiꞌ. Iwá̱n kicha‑oꞌ má̱j seꞌ siete día iwá̱n sej kiti̱tan ino̱nsan jojtoko iga maki̱sa ipan á̱ka̱l. Kua̱ꞌ némiya pe̱ tako̱miti jojtoko mokuepaꞌ kitankuajtiwi̱tziaya se̱ kuaxiwiꞌ. Inó̱n iga Noé kimatiꞌ iga a̱ꞌti wa̱ktoyay. Noé kicháꞌ seꞌ siete día má̱j iwá̱n sej kiti̱tan ino̱nsan jojtoko. Eꞌ inó̱n jojtoko ayꞌya mokuepaꞌ ipan á̱ka̱l. Iwá̱n Noé kimatiꞌ iga témoja a̱ꞌti.
Dios kijlij Noé:
—Xiki̱sa pan á̱ka̱l wa̱n mosiwa̱ꞌ, mopilowa̱n iwá̱n mosiwa̱momej. Xiki̱xti no̱ inochi anima̱lmej, to̱to̱mej, kowa̱mej inochi ta̱kayo̱mej iga maya̱ka̱n no̱ya̱n pan ta̱jli iwá̱n poxsan mapi̱wika̱n.
Ijkó̱n iga ki̱skej ipan á̱ka̱l. Iwá̱n Noé kichij se̱ altarb iga kiweyimati̱ltij Dios. Iyi̱xko inó̱n altar kitatij sekin yo̱lka̱mej iwá̱n to̱to̱mej iwá̱n kimáꞌ iga ofrenda Dios. Kua̱ꞌ Dios kitaꞌ, poxsan yo̱lpa̱guiꞌ iwá̱n kijtoj:
—Nike̱man iná̱n ayá̱ꞌ nia nika̱te̱mi̱ti ta̱jli iga itechko ta̱gaꞌ, porque ta̱gaꞌ, este kua̱ꞌ aya yo̱lej kejla̱miki iga kichi̱wa yej aye̱kti. Niga no̱ nia nikpolo̱ti anima̱lmej ken nikchij iná̱n.
’Mie̱j ónogoꞌ ta̱jli, onos to̱kalis iwá̱n tapixkalis, yawi onoti sekti iwá̱n taroto̱n, wi̱ꞌ tiempo iga sektajtiás iwá̱n wi̱ꞌ tiempo iga taroto̱nitiás, tane̱sis iwá̱n tayowatis.
Iwá̱n Dios kijtoj iga maye̱ꞌonoka̱n Noé iwá̱n ipilowa̱n iga iní̱n tájto̱l:
—Xipi̱wika̱n iwá̱n xa̱ka̱n no̱ya̱n pan ta̱jli. Amejeme̱n anyawij ankimanda̱ro̱tij inochi anima̱lmej yej onoꞌ ipan ta̱jli. Ta̱kayo̱mej, kowa̱mej, to̱to̱mej iwá̱n to̱pojmej. Inochi anima̱lmej iwá̱n kuaxiwimej yej mo‑i̱xmati iga mokua, wel ankikua̱skej.
’Ayꞌya má̱j nia nikpolo̱ti nochi yej isatoꞌ iga maa̱mikika̱n. Ayꞌya yawi wi̱tzeti seꞌ ijko̱mpa tiawa̱ꞌ yej poxsan recio yej kipolowa nochi yej onoꞌ ipan ta̱jli. Niktá̱lija a̱kosama̱lo̱ꞌ ipan mixti iga mane̱si iga ayꞌya yawi wi̱tzeti nisé̱ yej poxsan recio tiawa̱ꞌ yej kipolowa nochi yej onoꞌ ipan ta̱jli.