Yej achto tamiktij
Génesis 4:1‑22, 25‑26; 5:3‑5, 9‑29; 6:1‑3
4
Kua̱ꞌ kí̱skeja Edén, Adán iwá̱n isiwa̱ꞌ kipiakej o̱me ipilowa̱n. Ipiltzi̱n yej má̱j te̱ko̱ko kito̱ka̱wijkej Caín, iwá̱n yej te̱tzo̱yo̱ꞌ Abel. Abel tekipanowa̱ya iga kipi̱wia̱ya borre̱gojmej.a Caín tekipanowa̱ya ipan mi̱jli.Se̱ día iyo̱mextimej kiwi̱guilijkej se̱ ofrenda Jehová Dios. Caín kiwi̱gaꞌ se̱ ofrenda yej kiki̱xtij ipan ími̱l, Abel kiwi̱gaꞌ borre̱gojtzi̱n yej séligoꞌ iwá̱n yej paré̱j chikaktiꞌ. Jehová Dios kiye̱ꞌitaꞌ Abel iwá̱n iyofre̱ndaj, eꞌ ayá̱ꞌ kiye̱ꞌitaꞌ Caín iwá̱n iyofre̱ndaj. Iwá̱n Caín poxsan kuejkuesiwiꞌ.
Jehová Dios kijlij Caín:
—¿Te iga tikuesiwi? Siga tikchijka katka ken kichij mokni̱n iga ne̱miktilij borrego, nimitzye̱ꞌitaya, eꞌ como tikchij ken tej tikneꞌ, ayéj ken nej nikneꞌ inó̱n iga aye̱kti yej tikchij. Eꞌ siga tikchi̱wa ken nej nikijtowa, ayꞌya tikchi̱was yej aye̱kti.
Se̱ día Caín kijlij Abel iga maya̱ka̱n ipan kuayoj. Kua̱ꞌ ompiga asikej, Caín kimiktij iyikni̱n. Iwá̱n Jehová Dios kitajtan Caín:
—¿Ka̱n onoꞌ mokni̱n?
Caín kijtoj:
—Ayá̱ꞌ nikmati. ¿Ix nej nicuida̱rowa nokni̱n?
Jehová kijlij:
—Malej iga amo xine‑ijli, nej nikmati iga tikmíktija mokni̱n. Inó̱n iga nia nimitzcastiga̱ro̱ti. Iní̱n mochi̱was mokasti̱goj, kua̱ꞌ iga ipan mi̱jli tia titekipano̱ti, ayá̱ꞌ yawi mochi̱wati yej tia tikto̱kati ipan mómi̱l. Tia tinejnentinemiti no̱ya̱n iga tikte̱mojtinemis ta̱jli yej má̱j ye̱kti iwá̱n nikanaj ayá̱ꞌ yawi mochi̱wati yej tia tikto̱kati.
Iwá̱n Caín kijlij Dios:
—Ayá̱ꞌ nikijyo̱wi̱j iga poxsan xine̱castiga̱ro. Siga nia ninemiti ipan sejséꞌ ta̱jli, agaj yawi neasiti iwá̱n yawi ne̱mikti̱ti.
Eꞌ Dios kijlij:
—Yej yawi mitzmikti̱ti, poxsan nia nicastiga̱ro̱ti.
Iwá̱n Dios kita̱lilij se̱ marca ipan ikajlo̱ꞌ Caín iga ijkó̱n kua̱ꞌ agaj íwa̱n masis, amo makimikti. Caín ki̱saꞌ ompa ka̱n ta̱tapojtoya iwá̱n Dios iwá̱n yajki mocha̱nti̱to ipan seꞌ ta̱jli yej ito̱ka̱ꞌ Nod.
Iwá̱n Caín siwa̱yowiꞌ iwá̱n kipiakej se̱ ipiltzi̱n yej kito̱ka̱wijkej Enoc. Caín kichij se̱ a̱ltepe̱ꞌ iwá̱n kito̱ka̱wij Enoc kensan ipiltzi̱n. Enoc kipiáꞌ se̱ ipiltzi̱n yej kito̱ka̱wijkej Irad. Irad kipiáꞌ se̱ ipiltzi̱n yej kito̱ka̱wij Mehujael. Mehujael kipiáꞌ se̱ ipiltzi̱n yej kito̱ka̱wij Metusael. Metusael kipiáꞌ se̱ ipiltzi̱n yej kito̱ka̱wij Lamec.
Lamec kipiáꞌ o̱me isiwa̱ꞌ, iwá̱n yej ipilówa̱mpa Lamec kipiáꞌ se̱ iyokichpiltzi̱n yej achto ve̱j iga mocha̱ntij ipan se̱ kuetaxkajli iwá̱n kipi̱wij ganado; sewoꞌ yajki achto iga kitzotzonaya arpab iwá̱n kipi̱tzaya a̱katzi̱n, iwá̱n sewoꞌ sej yej achto yajki iga tekipanowa̱ya ipan tepos.
Kua̱ꞌ Adán kipiaya 130 años, kipiáꞌ seꞌ ipiltzi̱n yej kito̱ka̱wij Set. Adán kipiáꞌ no̱ má̱j ipilowa̱n. Asiꞌ este 930 años de edad. Set kipiáꞌ se̱ ipiltzi̱n yej kito̱ka̱wij Enós. Set iwá̱n Enós kicre̱dojkej Dios.
Enós kipiáꞌ se̱ ipiltzi̱n yej kito̱ka̱wij Cainán. Enós kipiáꞌ no̱ má̱j ipilowa̱n. Cainán kipiáꞌ se̱ ipiltzi̱n yej kito̱ka̱wij Mahalaleel. Cainán kipiáꞌ no̱ má̱j ipilowa̱n. Mahalaleel kipiáꞌ se̱ ipiltzi̱n yej kito̱ka̱wij Jared. Mahalaleel kipiáꞌ no̱ má̱j ipilowa̱n. Jared kipiáꞌ se̱ ipiltzi̱n yej kito̱ka̱wij Enoc. Jared kipiáꞌ no̱ má̱j ipilowa̱n. Enoc kipiáꞌ se̱ ipiltzi̱n yej kito̱ka̱wij Matusalén. Enoc kipiáꞌ no̱ má̱j ipilowa̱n. Enoc nochipa kichi̱waya ken kineki Dios. Inó̱n iga kua̱ꞌ Enoc kipiaya 365 años Dios kiwi̱gaꞌ pan cielo. Enoc ayá̱ꞌ miguiꞌ, isatiajki pan cielo.
Matusalén kipiáꞌ se̱ ipiltzi̱n yej kito̱ka̱wij Lamec. Matusalén kipiáꞌ no̱ má̱j ipilowa̱n. Matusalén miguiꞌ kua̱ꞌ kipiaya 969 años. Lamec kipiáꞌ se̱ ipiltzi̱n yej kito̱ka̱wij Noé. Lamec kipiáꞌ no̱ má̱j ipilowa̱n.
Ijkó̱n pe̱waꞌ iga pi̱wikej poxsan gente ipan ta̱jli. Eꞌ ijkó̱n ken iga pi̱wikej yejeme̱n no̱ poxsan kichijkej yej aye̱kti. Inó̱n iga Dios kijtoj:
—Ayoꞌ nia nikmakati iga la gente mavivi̱ro poxsan. Nia nikmakátisan iga mavivi̱ro̱ka̱n malej 120 años.