Yej achto ta̱gaꞌ iwá̱n siwa̱ꞌ kichi̱waj yej aye̱kti
Génesis 3:1‑24
3
Inó̱n kowa̱ꞌa poxsan tamatiá má̱j que inochi anima̱lmej yej Dios kichij. Iwá̱n kowa̱ꞌ kitajtan siwa̱ꞌ:—¿Ix Dios mitzijlijkej iga amo xikua̱ka̱n ita̱kilka inochi kuawimej yej onoꞌ ipan jardín?
Iwá̱n siwa̱ꞌ kijtoj:
—Wel nikuaj ita̱kilka inochi kuawimej, eꞌ inó̱n kuawiꞌ yej onoꞌ itajkoya̱n jardín, Dios ne‑ijlijkej iga amo manikua̱ka̱n iwá̱n niga manikchijchimika̱n ita̱kilka. Siga inó̱n nikchi̱waj niawij nimikitij.
Eꞌ kowa̱ꞌ kijlij siwa̱ꞌ:
—¡Ayá̱ꞌ anmikiskej! Dios kimati iga kua̱ꞌ amejeme̱n ankikua̱skej ita̱kilka inó̱n kuawiꞌ wel ankimatij katiapa yej ye̱kti iwá̱n katiapa yej aye̱kti iga mochi̱wa, iwá̱n anmochi̱waskej ken Dios.
Siwa̱ꞌ kitaꞌ iga ita̱kilka kuawiꞌ mo̱nsajtiꞌ iwá̱n kikua̱jnekiá. Yéj kijtowa̱ya anka siga kikua̱ya poxsan tamatis. Iwá̱n kikopej ka̱n pilojtoya inó̱n tá̱kil iwá̱n kikuaj. Iwá̱n no̱ kimáꞌ iwé̱j iwá̱n no̱ kikuaj. Iwá̱n nimani̱nsan mo‑itákeja iga onokej ipetzka̱mej. Iwá̱n kijtzonkej iyiswayo se̱ kuawiꞌ yej ken na̱na̱wi iga motzakuakej.
Despué̱j kikakikej iga Dios ompa nemiá ipan jardín se̱ tio̱taꞌ kua̱ꞌ tasese̱yay. Ta̱gaꞌ iwá̱n isiwa̱ꞌ mi̱ya̱nkej tajkokuayoj. Iwá̱n Dios kino̱tzaꞌ ta̱gaꞌ iwá̱n kitajtan:
—¿Ka̱n tonoꞌ?
Ta̱gaꞌ kijtoj:
—Nigaj nonoꞌ. Nikaguiꞌ iga tinemiá ipan jardín iwá̱n nimomajtij iga nonoꞌ nopetzka̱n. Inó̱n iga nimi̱ya̱n.
Iwá̱n Dios kitajtan:
—¿A̱ꞌyéj mitzijlij iga tonoꞌ mopetzka̱n? ¿Ixtaj tikuaj ita̱kilka kuawiꞌ yej nimitzijlij amo xikua?
Ta̱gaꞌ kijtoj:
—Kena, nikuaj. Ne̱máꞌ iní̱n siwa̱ꞌ yej tine̱máꞌ iga nosiwa̱ꞌ.
Iwá̱n Dios kitajtan siwa̱ꞌ:
—¿Te iga inó̱n tikchij?
Siwa̱ꞌ kijtoj:
—Iga kowa̱ꞌ ne̱kajkayaj; inó̱n iga nikuaj inó̱n tá̱kil.
Iwá̱n Dios kijlij kowa̱ꞌ:
—Iga inó̱n tikchij, nia nimitzcastiga̱ro̱ti má̱j que nochi anima̱lmej. Iná̱n nochipa tia timoe̱lwawatatzo̱ti, iwá̱n tia tikua̱ti ta̱jli. Iwá̱n nia nikchi̱wati iga tej iwá̱n siwa̱ꞌ amo ximoye̱ꞌitaka̱n, iwá̱n no̱ ayá̱ꞌ moye̱ꞌitaskej mopilowa̱n iwá̱n ipilowa̱n siwa̱ꞌ. Se̱ yej de ipilowa̱n yawi kixiti̱nati yej tej tikchi̱wa, eꞌ tej ayá̱ꞌ tiwelitiati iga xikxiti̱na yej yejpa kichi̱was.b
Iwá̱n Dios kijlij siwa̱ꞌ:
—Kua̱ꞌ tia tipilowati, pox kualo̱j iga titaonolti̱j. Malej iga kualo̱j iga titaonolti̱j, eꞌ tia tikijyo̱wi̱ti iga tia tiknekiti iga xono iwá̱n mowe̱wej iwá̱n yéj yawi mitzmanda̱ro̱ti.
Dios kijlij ta̱gaꞌ:
—Iga ticre̱doj mosiwa̱ꞌ iwá̱n tikuaj ita̱kilka kuawiꞌ yej nimitzijlij amo xikua, iga tej motechko ayꞌya ye̱ꞌonos ta̱jli iga ayꞌya mochi̱was ta̱kilmej ken ikya. Poxsan tikuajkualo̱j kua̱ꞌ tia titekipano̱ti iga tikasis motákual nochipa este que ximiki. Wejweyatij witzyoj ipan ta̱jli iwá̱n tia tikua̱ti kuaxiwiꞌ yej mokua. Titekipano̱j iwá̱n timili̱nas ijkó̱n iga tikta̱ni̱j motákual, este que ximochi̱wa sej ta̱jli iga de ta̱jli nimitzchij. Iga tejwaꞌ nokta ti de ta̱lpíno̱l iwá̱n de ta̱lpíno̱lsan sej timochi̱was.
Iwá̱n Dios kichij o̱me ken wí̱pi̱l de kuetax se̱ iga ta̱gaꞌ se̱ iga isiwa̱ꞌ iwá̱n motaajakijkej. Iwá̱n kijtoj Dios:
—Iná̱n ta̱gaꞌ mochij ken se̱ yej de tejéme̱mpa iná̱n kimati katiapa yej ye̱kti iwá̱n katiapa yej aye̱kti iga mochi̱wa. Iwá̱n iga amo kikuis ita̱kilka kuawiꞌ yej tamaka vida iwá̱n kikua̱j iwá̱n onos nochipa.
Dios kiki̱xtij inó̱n ta̱gaꞌ iwá̱n isiwa̱ꞌ ipan jardín de Edén iwá̱n kiti̱tan ta̱gaꞌ iga matekipano ipan mi̱jli. Dios kiti̱tan sekin a̱ngelejmejc iga makicuida̱ro̱ka̱n iga ni agaj amo maasi este ka̱n onoꞌ kuawiꞌ yej tamaka vida iga wel kikua̱liáj ita̱kilka.