Dios kichi̱wa achto ta̱gaꞌ iwá̱n siwa̱ꞌ
Génesis 2:7‑9, 15‑25
2
Kua̱ꞌ Dios kichij yej áchtopa ta̱gaꞌ, kichij iga ta̱lpíno̱l iwá̱n kiyagapi̱tzaꞌ iga kimáꞌ vida. Ijkó̱n pe̱waꞌ iga ta̱gaꞌ onoko. Iki̱sáya̱mpa to̱nati̱ꞌ onoya se̱ jardín ka̱n Dios kiwejweyiyaltij se̱seꞌpa kuawimej yej ta̱kilyowij. Ompa moto̱ka̱wia̱ya Edén. Ompa Dios kita̱lij yej áchtopa ta̱gaꞌ iga makicuida̱ro kuawimej. Iwá̱n itajkoya̱n inó̱n jardín kita̱lij o̱me kuawimej. Se̱ de ino̱mej kuawimej, siga mokua ita̱kilka wel mo‑i̱xmatiá katiapa yej ye̱kti iwá̱n katiapa yej aye̱kti iga mochi̱wa. Iwá̱n inó̱n seꞌ kuawiꞌ yej iga kikua̱lia̱ya ita̱kilka nike̱man ayá̱ꞌ mikiá.Dios ijkí̱n kijlij ta̱gaꞌ:
—Wel tikua ta̱kilmej yej onoꞌ ipan inochi kuawimej yej onoꞌ ipan jardín. Eꞌ amo xikua ita̱kilka kuawiꞌ yej tane̱xtiliá katiapa yej ye̱kti iwá̱n katiapa yej aye̱kti iga mochi̱wa. Siga tia tikua̱ti tia timikiti.
Dios kichij iga ta̱lpíno̱l inochi anima̱lmej, ken ta̱kayo̱mej, kowa̱mej iwá̱n inochi to̱to̱mej iwá̱n nochi ini̱mej kiwi̱guilij Adán iga makitojto̱ka̱wi. Adán kitojto̱ka̱wij sejsé̱ ino̱mej anima̱lmej iwá̱n iná̱n ino̱nsan ito̱ka̱mej.
Eꞌ Adán ise̱lti onoya iwá̱n ayagaj íwa̱n nemiá. Iwá̱n Dios kijtoj:
—Aye̱kti iga ta̱gaꞌ maono ise̱lti. Nia nikchi̱wati yej íwa̱n manemi iwá̱n makipale̱wi.
Iwá̱n Dios kikochtij ta̱gaꞌ iwá̱n mie̱j kochtoya kiki̱xtilij se̱ isíjkuil. Dios kichij se̱ siwa̱ꞌ iga inó̱n síjkuil iwá̱n kiwi̱guilij ta̱gaꞌ. Kua̱ꞌ kitachi̱lij kijtoj ta̱gaꞌ:
—Iní̱n mochij iga nonakayo iwá̱n iga noomiyomej, iwá̱n moto̱ka̱wi̱j siwa̱ꞌa iga Dios kiki̱xtij ipan ta̱gaꞌ.
Inó̱n iga ta̱gaꞌ moyokatiá kua̱ꞌ mona̱miktiá iwá̱n isiwa̱ꞌ. Iwá̱n kua̱ꞌ onókeja seka̱n iyo̱mextimej mochi̱waj se̱san iyi̱xtaj Dios.
Adán iwá̱n Eva onoyaj ipejpetzka̱mej iwá̱n ayá̱ꞌ mopi̱na̱wilia̱yaj.