Resumen del Antiguo Testamento
Achto ayá̱ꞌ onoya ta̱jli, niga si̱talimej; ayá̱ꞌ nokta onoya nité̱
Génesis 1:1‑2:3
1
Kua̱ꞌ pe̱waꞌ, Dios kichij cielo iwá̱n ta̱jli. Ta̱jli ane̱siá te̱ iteki. Ta̱jli te̱ntoya iga a̱ꞌti iwá̱n no̱ya̱n tamichka̱ntitoya. Iwá̱n iyEspí̱ritoj Dios nemiá a‑i̱xko.Iwá̱n Dios kijtoj:
—¡Maono ta̱wi̱lyo̱ꞌ!
Iwá̱n tata̱wijtiki̱saꞌ. Dios kitaꞌ iga to̱nati̱ꞌ ye̱kti iwá̱n kiyojyokatij ta̱wi̱lyo̱ꞌ iwá̱n tako̱mitilyo̱ꞌ. Iwá̱n ta̱wi̱lyo̱ꞌ Dios kito̱ka̱wij “día”, iwá̱n tako̱mitilyo̱ꞌ kito̱ka̱wij “yówal”. Inó̱n kichij Dios achto día.
Iwá̱n ipan o̱me día Dios kijtoj:
—Mamoyojyokati a̱ꞌti. Tajko ka̱witi ajko iwá̱n seꞌ tajko ka̱witi tani.
Iwá̱n in a̱ꞌti moyojyokatij. Iwá̱n inó̱n espacio yej ka̱wiꞌ ajko Dios kito̱ka̱wij “cielo”. Inó̱n kichij Dios ipan o̱me día.
Ipan e̱yi día Dios kijtoj:
—A̱ꞌti yej ka̱wiꞌ tani mamonechko iga mane̱si ta̱jli.
Iwá̱n ijkó̱n mochij. Inó̱n a̱ꞌti yej monechkoj kito̱ka̱wij “láma̱r”. Iwá̱n ka̱n tawa̱ktika̱wiꞌ, Dios kito̱ka̱wij “ta̱jli”. Dios kitaꞌ iga inó̱n onoꞌ bien iwá̱n kijtoj:
—Ma‑ixwaka̱n kochkimej iwá̱n kuawimej yej ta̱kilyowij yej welpa mokua ita̱kilka.
Iwá̱n ijkó̱n mochij iga wejweyakej kochkimej iwá̱n kuawimej yej ta̱kilyowij yej mokua̱liá ita̱kilka. Dios kitaꞌ iga onoya bien. Inó̱n kichij Dios ipanya e̱yi día.
Ipan na̱wi día Dios kijtoj:
—Maono yej xo̱taj ipan cielo iga mata̱wi̱ka̱n ipan ta̱jli; iwá̱n maservi̱ro iga makimarca̱ro días, meses iwá̱n a̱ñojmej.
Ijkó̱n iga Dios kichij o̱me ta̱wi̱lyo̱ꞌ, yej má̱j weyi iga mata̱wi ipan día, yej má̱j ali̱mpa iga mata̱wi tayowaka̱n. Iwá̱n no̱ kichij si̱talimej iga nochi ini̱mej mata̱wi̱ka̱n ipan ta̱jli. Iwá̱n kitaꞌ inó̱n iga onoꞌ bien. Inó̱n kichij Dios ipan na̱wi día.
Ipan día cinco Dios kijtoj:
—Maono to̱pojmej ipan lama̱rmej iwá̱n ipan a̱pamej, iwá̱n maono to̱to̱mej iga mapata̱nika̱n.
Ijkó̱n kichij Dios se̱seꞌpa to̱pojmej iwá̱n to̱to̱mej iwá̱n kitaꞌ iga inó̱n onoꞌ bien. Iwá̱n Dios kijlijkej ino̱mej anima̱lmej:
—Xipi̱wika̱n iwá̱n xa̱ka̱n ximocha̱nti̱tij no̱ya̱n ipan ta̱jli.
Inó̱n kichij Dios ipan día cinco.
Iwá̱n kua̱ꞌ asiꞌ seis día Dios kijtoj:
—Maono se̱seꞌpa anima̱lmej: yej momatij ipan kuayoj, iwá̱n yej momatij ipan patio, ta̱kayo̱mej iwá̱n yej moe̱lwawatatzowaj.
Ijkó̱n kichij Dios inochi anima̱lmej, ta̱kayo̱mej iwá̱n kowa̱mej. Iwá̱n kitaꞌ iga inochi ye̱ꞌkajtia̱ya. No̱ kijtoj Dios:
—Matikchi̱waka̱n se̱ ta̱gaꞌ ken tejeme̱n, iga makimanda̱ro to̱pojmej, to̱to̱mej, ta̱kayo̱mej iwá̱n kowa̱mej.
Ijkí̱n iga Dios kichij gente. Achto kichij se̱ ta̱gaꞌ iwá̱n despué̱j kichij se̱ siwa̱ꞌ iwá̱n kijlijkej:
—Ximocha̱nti̱ka̱n nigaj ipan ta̱jli. Xipi̱wika̱n iwá̱n xikte̱mi̱ka̱n inochi ta̱jli. Amejeme̱n anyawij ankimanda̱ro̱tij inochi yej onoꞌ ipan ta̱jli. Nimitzmakaj iga amotakualmej inochi kochkimej yej wel mokua iwá̱n ita̱kilka kuawimej. Iwá̱n inochi anima̱lmej, ta̱kayo̱mej, kowa̱mej iwá̱n to̱to̱mej nikmaka kochkimej iga makikua̱ka̱n.
Ijkó̱n Dios kichij nochi iwá̱n kitaꞌ iga inochi ye̱ꞌka̱wiꞌ. Inó̱n kichij Dios ipan día seis.
Ijkó̱n kua̱ꞌ tamiꞌ seis día, tamiꞌ iga kichij cie̱lojmej iwá̱n ta̱jli iwá̱n inochi yej onokej ípan.
Kua̱ꞌ asiꞌ día siete, Dios mose̱wij iga kichij inochi itekipáno̱l; inó̱n iga kitapejpen día siete, iwá̱n kijtoj iga ye̱kti iga mamose̱wilo inó̱n día.