6
Lauziu Nac rui Malac Guay Swbak Patmei
1 Lauziu Nac tei rui malac chanei khou tei reymei tei swbak patmei ta ai how the. Khoutei ramhkui padeih pang khou tei rui akhat rui ganhkeymei khwan kumcna "Pat tho!" twna samei ai chu the. 2 Khoutei ai zauc the, kumna takuanh mphwanmei akhat pat the. Mi khou tei tuanghmeipu tei sauhpai sin e khatni kakhou guangh pykhim tiilou kan e. Kamei ngammeipu swna ngam khang tat pat kan the.
3 Lauziu Nac tei rui kaneimei malac tei swbak pat pwkhou, kaneimei ramhkui tei rui "Pat tho!" twna samei ai chu the. 4 Khoutei takuanh haenghmei akhat pat the. Mi khou tei tuanghmeipu khou tei kandih khou rui chuzaenghmei laa pat khang tiilou kan the. Mi kiu maansei guay khat rui khat ta swluai khang e. Kakhou baengsaeng daihmei tiilou kan the.
5 Mi tangv Lauziu Nac tei rui kathumhmei malac tei swbak pat pwkhou, kathumhmei ramhkui tei rui "Pat tho!" twna samei ai chu the. Ai zauc the, khou tei takuanh miwmei pat the. Mi khou tei tuanghmeipu tei duh sin e. 6 Ramhkui padeih pang khou tei rui meic khwan kumcna, "Zaeng neih khat phy gehu haandwang akhat, khatni neih khat phy siupian haandwang kathumh. Tiki oliv bang lev luairyn lau guay tei thu swkasic rio!" twna samei ai chu e.
7 Lauziu Nac tei rui padeihmei malac tei swbak pat pwkhou, padeihmei ramhkui tei rui, "Pat tho!" twna samei ai chu the. 8 Ai zauc pw ki takuanh nzinh ndavmei akhat pat the. Mi khou tei tuanghmeipu zanc tei Theihmei kaw e, kumna kathei khou Taruaihd lay guang e. Suc rih rui, nap nkowmei rui, ravpyan rui, khatni nwmbangc khouringc rui, kandih kadam padeih khou akhat ta swluai khang kaney khou ngamv tiilou kan the.
9 Lauziu Nac tei rui panguhmei seal tei swbak pat pwkhou, Ravguangc lat piupui zaeng rui khatni dinhpui zaeng rui swluai kanmei bumaengc nunc tei ravchabamv bangc khou bammei ta how e. 10 "Ngamparimei Poubauhmei, nthanmei khatni kalingmeipu! Kandih khou lungc bammei nunc ta hei latzan sw makna khatni aniu zei tuang khwm khangh makna asaanh lou bam ni hena cho?" twna kaniw kauc bam e. 11 Kaniw kathuic khang tei pheychuanh mphwanmei tiilou the, kumna siamruaimei khatni chana nunc ta tei kaniw ta kumcna swluai nimei sing tei swluai ntangh mak saanv nkhwan kanaklou khang kaniw khou kadylou kan the.
12 Lauziu Nac tei rui charukmei seal tei swbak pat pwkhou, baengla dai zaymei ta ai how e. Neihmik pheymiw kumc miw kan the khatni bw zei kumc haengc kan the. 13 Pwanzingh rui tadut thai kanuk key kumc gaanchuangcna guay kandih khou taek key the. 14 Latrikzy kazih kumc tingpuk kazih gut kan the, chyng but khatni duipui kandic guay maan ngam the. 15 Kandih guangc guay, dihsinpouc guay khatni rihpy guay, lungcgaymei khatni ngammei guay, bangh khatni nyngswmei guay, meic katana chyng tuang khowlang tauhlang khou dup the. 16 Kaniw rui chyng but khatni khowlang khou, mi kumna kauc the, "Aniu ta pangv binlouna guanghbamvpaeng khou dungc bammeipu hu khou rui khatni Lauziu Nac lungpuam khou tei rui nkamhlou o! 17 Kaney tuang lungpuamdai keylou nimei tingmik kiu guang pw the, meic gaanv khat na sini ding chaek ngam ni tu hamh the."