5
Latrikzy khatni Lauziu Nac
1 Guanghbamvpaeng khou dungc bammeipu tei kabaanzat khou latrikzy sin bammei ta how e. Mi tei kathei kahu hy padiklou e, kumna mi tei kabamv chanei khou seal nap binlou e; 2 khou tei, "Mi nap binlou bammei guay hei laa ganc lana mi latrikzy hei ric pat ngammei thow nai cho?" twna tanhmei kauh baanchara khat rui kauc ranvna kauc bammei ta ai how e. 3 Tiki mi latrikzy tei ric patna kalungc khou hyloumei tei zauc ngammei tingkauh thangc ni, kandih khou ni, kandih bangcc thangc ni gaanv khat na sini maek khwan e. 4 Mi latrikzy tei ric patna pac ngammei meic maekpui zaeng rui ai kap ranvna kap khwan e. 5 Khoutei gaanvdaih pang khou tei gaanv khat rui, "Kap rio! Juda kaikhwang tuang kamangliangpui, David kikta kamei rui rihngamlou kan the, kumna kamei rui mi seal guay tei swbak patna mi latrikzy tei ric pat nuh the," twna sa the.
6 Ramhkui padeih khatni gaanvdaih nchuihna padeih rui guanghbamvpaeng ta bam haengv bammei chung khou tei Lauziu Nac ding bammei ta how e. Mi tei swluai kanmei Lauziu Nac kumc e. Mi tei kachei chanei khatni kamik chanei nai e. Mi tei mbaanv kapwm khou ndiulou kanmei Ravguangc bumaengc chanei tei e. 7 Khoutei guanghbamvpaeng khou dungc bammeipu tuang baanzat khou tei rui latrikzy tei kamei guang laa kan the. 8 Kamei rui mi tei laa kan pwkhou, ramhkui padeih khatni gaanvdaih nchuihna padeih tei Lauziu Nac hu khou tei nkhum laemv key the. Kaniw guayna tei nrah khatni kachaekc tuang agawkuak khat khat sin e. Mi kuak nunc khou lou padik bammei agaw tei nthanmei nunc tuang huayneymei ravsuai e. 9 Kaniw tei mi kumcna lu thanh swan bam e:
"Nang hei mi latrikzy hei laana,
nap binloumei malac guay ric pat khang biuhmei e.
Kalam thu nang ta swluai the,
kumna nang zei rui kaikhwang kathuic, zaatc kathuic, lat kathuic khatni guanghdic kathuic khou rui;
Ravguangc mei khang thuakpatlou the.
10 Nang rui kaniw ta guanghdic,
aniu Racguangc tuang amuc nunc tiswlou the,
kumna kaniw kandih khou guanghtu puni."
11 Kumna ai zauc dat pw ki, kauh baanchara nunc khwan chu e. Kasing kaling thay makmei kauh baanchara nunc, ramhkui padeih khatni gaanvdaih nchuihna padeih tei lev guanghbamvpaeng daeng khou tei ding huamcna, 12 swan ranvna mi kumna swan bam khwan e:
"Sw luai kanmei Lauziu Nac hei,
ngamv, lanv, ningting, khatni pumtan,
champouhmei, hymdaihmei,
khatni thuanhmei laa biuc e!"
13 Khatni tingkauh, kandih, kandih bangc, khatni duipui khou naimei katana—tingpuk kandih khou naimei katana rui mi kumna swan bammei ta ai chu e:
"Thuanhmei khatni chakhwang champouhmei,
hymdaihmei khatni pumtan hei,
Guanghbamvpaeng khou dungc bammeipu,
khatni Lauziu Nac khang hei tingsaengzaeng sw diu!"
14 Khoutei ramhkui padeih tei rui, "Amen!" twna daw e khatni gaanvdaih nunc tei nkhum laemv keyna kalum e.