4
Tingkauh khou Ravguangc ta Kalummei
1 Mi tangv ndawman akhat khou, tingkauh thangc kaikhamv laanclou bammei ta ai how e.
Tiangka khwan kumhmei, akhou sa guang reymei khwan tei rui, "Mi khou hei ku o; guang punimei tei ai nang khou lyanlou puni," twna samei ai chu khwan e. 2 Mi dyng khou tei ata Bumaengh rui zyn the. Khoutei tingkauh thangc guanghbamvpaeng akhat how e; mi khou tei gaanv khat dungc bam e. 3 Kazawpaanv tei jaspar khatni karnalia tauc kumc karaeng e, kumna guanghbamvpaeng tei emeral tauc kumhmei muangsingc souc ngguic bam e. 4 Guanghbamvpaeng nchuihna padeih mi guangc bamvpaeng daeng khou tei lou nkuay bam e. Kumna mi guangc bamvpaeng guay khou tei phey mphwanmei piuna kachaekc tuang guangh pykhim runmei gaanvdaih nchuihna padeih dungc bam e. 5 Guanghbamvpaeng khou tei rui tingpalik pat e khatni mi khou tei ganhkeymei khwan mpeyna chu e. Guanghbamvpaeng hu khou tei mairam chanei daanclou bam e. Mi tei Ravguangc bumaengc chanei e. 6 Guanghbamvpaeng hu khou tei kangranh ranvmei dandik duipui kumhmei nai e.
Kathei kahu kamik ranamei ramhkui padeih rui mi guangc bamvpaeng tei bam haengv bam e. 7 Reymei ramhkui tei kamangliangpui kumc e; kaneimei tei guaichic launa kumc e; kathumhmei tei kazaw maansei zaw kumc e; padeihmei tei samc bammei moucriang kumc e. 8 Mi ramhkui padeih tei kaswkaeng charuk charuk nai e, khatni kalungc kapaengc kamik rui padik e.
"Nthanmei, nthanmei, nthanmei,
nai bam khwanmei, nai bammei, nai bam punimei,
Ngamparimei Poubauhmei Ravguangc,"
twna kaniw zingbangc kalaanv taek makna swan bam e.
9 Mi ramhkui padeih tei rui, guanghbamvpaeng khou dungc bammeipu, tingsaengzaeng ringc bammeipu ta hymthuancna, chakhwang champouhna khatni thuanckuna swan bam khou, 10 gaanvdaih nchuihna padeih tei guanghbamvpaeng khou dungc bammeipu hu khou tei nkhum laemv keyna tingsaengzaeng ringc bammeipu ta tei kalum e. Kaniw tuang pykhim kahu khou lou keyna,
11 "Aniw Kaipouc khatni aniw Racguangc,
Nai bammei katana damcloumeipu,
kachwnphuakh rui ramh katana
damclouna tinai bammeipu,
Hymdaihmei, chakhwang champouhmei, khatni pumtan hei nang khang e,"
twna swan bam e.