3
Sardismei Phwamling khang
1 "Sardismei phwamling tuang baanchara khou mi hei hy o:
"Mi hei, Ravguangc bumaengc chanei khatni gaanchuangcna chanei sinmeipu rui samei lat e. Nang taanv guay tei ai thay e; nang hei ringhmei zanc phungc e, tiki theihmei de twmei ai thay e! 2 Mi zaeng rui thau tho, theic changh mak khou nang khou naimei tei titanc thau tho. Nang taanv ta Ravguangc hu khou pian mak khe twmei ai how the. 3 Nang khou dinclou kanmei khatni nang chu kanmei guay tei ningtow o; mi tei piu o, kumna lunghlaic o. Nang zipthau makna bam e thei, ai kaihouhmei guang kumc guang puni, ai guang nimei ganv nang thay ni tu hamh e. 4 Tiki kaniw tuang pheybaan sw-mphuam makmei Sardismei nangniw pang khou meic gaanv saekc nai e. Kaniw mphwanmei pwan piuna ai lev tat nchamc puni. Kalam thu kaniw mi khang hei biuhmei nunc e. 5 Rihngammei nunc tei, mi hei kumcna mphwanmei pwan piu puni, kumna kaniw zanc ringhmei latrik khou rui thut maan dat lak khe. Ai rui, kaniw hei amei e twna aPu hu khou khatni katuang baanchara guay hu khou kauc ndauh puni.
6 Bumaengh rui phwamling guay khou samei hei nukuanc naimei guay chu laa tho!
Philadelphiamei Phwamling khang
7 "Philadelphia phwamling tuang baanchara khou mi hei hy o:
"Mi hei nthanmei khatni kalingmeipu rui sapui lat e. Kakhou David tuang khamvtaan nai e; kamei rui laanclou kan e thei meic gaanv khat na sini mbangh dat ngam mak khe, kamei rui mbangh kan e thei meic gaanv khat na sini laanc dat ngam mak khe.
8 "Nang taanv guay tei ai thay e. Nang khou pumtan katitna nai e twmei ai thay e. Nang alatdyn piu the, kumna atuang lwmnuhmei mei sw the. Ai rui nang khang kaikhamv laanclou kan the. Mi tei meic gaanv khat na rui sini mbangh dat ngam lak khe. 9 Zauc lo! Kaniw rana kaniw ta Jihudimei e twna samei kiuc thu kiuc hamhmei, saraemhmei, Seitan tuang mei nunc ta tei kaw guangna nang hu khou ti-nkhum key puni. Ai nang ta nzian e twmei kaniw thay puni. 10 Khaengvthay o twna ai rui nang khou samei tei nang piupui zaeng rui, kandihmei guay ta nchanv khang mbaanv kapwm khou ryanramei tii guangmei ganv khou kiu, ai rui nang ta gulou puni. 11 Ai guang zaic puni the. Nang tuang swan pykhim tei meic gaanv khat na rui sini swmaan mak khang, nang khou naimei tei sin ntip bam o. 12 Rihngampui mei ta tei ai rui aRacguangc tuang ravkai tiangc akhat tiswlou puni, kumna kamei mi khou tei rui tat pat dat lak khe. Ai rui kakhou aRacguangc zanc, Ravguangc khou rui tingkauh thangc rui keymei, aRacguangc tuang kaidai, Jerusalem thanh zanc, khatni azanc thanh hylou puni.
13 "Bumaengh rui phwamling guay khou samei hei nukuanc naimei guay chu la tho!
Laudikiamei Phwamling khang
14 "Laudikiamei phwamling tuang baanchara khou mi hei hy o:
"Mi hei Amen twna kawmeipu, kalat suai makmei kalingmeipu, Ravguangc baansyam kaguayna tuang bangbia kamei rui sapui lat e. 15 Nang taanv guay ai thay e; nang hei nchu ni nchu mak e, chaengc ni chaengh mak e twmei ai thay e. Nang nchu ni thei nchu kham, chaengc ni thei chaengc kham tw e thei gay ni tuang e! 16 Nang hei chaenghmei ni hamh, nchumei ni hamhna manuan kuanpui zaeng rui, nang ta amwang khou rui mphiu pat puni the! 17 'Ai lungcgay de, akhang ramh gaat tuang maek e' twna nang sa e. Tiki nang lwnlung ta nang thay mak e! Nang hei lungcsimei e, pheybaan maekmei e, khatni mik tiatmei e twmei nang thay mak e. 18 Nang lungcgay khang akhou rui kachaekc nthanmei liu o; nang paliucna zakna bammei tei duam liam khang mphwanmei phey akhou rui liu o, khatni nang mik how khang nang mik khou lou khang mik pu akhou rui laa o. 19 Ai nzianmei guay ta luh e khatni riaplou e. Mi zaeng rui nangniw lungh gut o, kumna lunghlaic o. 20 Zauc lo! Aai chaengmun khou dingna kaikhamv nchow bam e. Thow pwni akhwan chuna kaikhamv laanclou e thei, ai kakhou gutna kamei lev tu nchamc zangv nchamcna bam puni. 21 Ai rihngamna aPu lev kaguangc bamvpaeng khou dungc nchamcmei kumcna, rihngammei nunc ta tei aguangc bamvpaeng khou adaeng khou tidungclou puni.
22 "Bumaengh rui phwamling guay khou samei hei nukuanc naimei guay chu la tho!"