2
Ephisiamei Phwamling khang
1 "Ephesasmei phwamling tuang baanchara khou tei mi hei hy o:
"Mi hei kabaanzat khou gaanchuangcna chanei sinna kachaekc tuang thauhmai hyang chanei pang khou tat bammeipu rui sapui lat e. 2 Nang taanv guay tei ai thay e; nang taanc ranvna taanc kanmei khatni khaengv tancna khaengv kanmei tei thay e. Meic gay makmei nunc ta nang khaengv bam ngam mak e khatni kaniw rana kaniw ta Latdiutatmei nunc e twna sa laki kiuc thu kiuc hamhmei nunc ta tei nchanv lana kaniw saraemhmei nunc e twmei nang thay kanmei tei ai thay e. 3 Nang khaengv thay e, nang akhang rui ryanramei khaengv the, kumna liat lak khe twna mpat mak e.
4 "Kum e tiki nang ruc khou ai nuh makmei kiu mi hei e: thaurey khou nang ata nzianmei ramzian tei ntaw nang khou maek khe. 5 Nang asaanh ducna tangkhyn key the cho twmei makumh o! Lunghlaic datna nang thaurey khou sw bammei kumcna sw dat o. Nang lunghlaih mak e thei, ai guangna nang tuang thaucmai hyang tei laa pat kan puni. 6 Tiki ai karaengmei Nikolasmei nunc tuang taanv ta tei nang ni karaengmei khang tei thu nang ruc khou neihlalou khang nai e.
7 "Bumaengh rui phwamling guay khou samei hei nukuanc naimei guay chu laa tho!
"Rihngamna guangmei kathuic Ravguangc tuang paradais pikwan khou naimei ringhmei thingbang thay tei tu puni.
Smirnamei Phwamling khang
8 "Smurna phwamling tuang baanchara khou mi hei hy o:
"Mi hei reymei khatni nkhamhmeipu, theiclouna ringc datmeipu kamei rui sapui lat e. 9 Nang ramrianra tei ai thay e; nang ramlungsi ai thay e; tiki kaling thu nang lungcgay de! Kaniw rana kaniw ta Jihudimei e twna sa laki kiuc thu kiuc hamhmei, Seitan tuang sinagogmei nunc rui nang ta sakasicna sa bammei guay tei ai thay e. 10 Nang ariw punimei ryanramei khang tei ping rio. Zauc lo, nangniw gaanv saekc ta Ravsic rui kangkai khou louna nang ta nchanv puni, kumna nang zaeng ruh ryanra khaengv puni. Theihmei nganv lwmnuhmei sw o, kumna nang khang ringhmei swan pykhim tii puni.
11 "Bumaengh rui phwamling khou samei hei nukuanc naimei guay chu laa tho!
"Rihngampui mei ta tei theic kaneimei tei rui kabiu dat lak khe.
Pargamamei Phwamling khang
12 "Pergamos phwamling tuang baanchara khou mi hei hy o:
"Mi hei kalat ntukmei kamun kaneimei baengsaeng kumhmeipu rui sapui lat e. 13 Nang bammei bamv tei Seitan guangc bamvpaeng naipui bamv e twmei ai thay e. Nang ata mpat mak e, kumna atuang lwmnuhmei sakhi—Antipas ta mi Seitan bampui bamv khou tei sw luaipui ganv khou tei nganv nangniw akhou lwmmei mpat mak e.
14 "Tiki ai rui nang ruc khou nuh makmei tuang asaekc naimei kiu thu: Israelmei ta ravkhaengmei zanc tu khang nthiam patna nthah boulahpui taanv titaanclouna tiphaysuy khang Balak ta nchamloumei Balaam tuang latdyn laamei gaanv saekc nang khou nai e. 15 Mi tei kumcna Nikolasmei nunc tuang latdyn laamei nunc nang khou nai e. 16 Mi zaeng rui, nang lunghlaic o! Lungh laih mak e thei, ai asaanh mak khou, nang khou guangna amwang tuang baengsaeng rui kaniw ta adow puni.
17 "Bumaengh rui phwamling guay khou samei hei nukuanc naimei guay chu laa tho!
Rihngammei nunc khang tei ryloumei manna tii puni. Ai rui kaniw khang zanh thanh hyloumei ntauh mphwanmei tii puni. Mi tei laatowmei kamei na hamhna, mi zanc tei meic baihmei gaanv khat na sini thay mak e.
Thuatiramei Phwamling khang
18 "Thuatiramei phwamling tuang baanchara khou mi hei hy o:
"Mi hei kamik maibwang kumhmei, kaphay thaemc karangloumei kuanzinc kumhmei, Ravguangc Nac Mpouh rui sapui lat e. 19 Nang taanv guay tei ai thay e. Nang ramzian, nang ramlum, nang taanv, khatni nang ramkhaengthai tei ai thay e. Thaurey khou khang tei suangc ntaw thu nang taanc mbu the twmei ai thay e.
20 Tiki ai nang ruc khou nuh makmei kiu mi hei e: Karana kata muhzwng e twna samei Jezebel rui Ravguangc lat e twna dincna amei nunc ta nthah boulahmei paap khou zaylou bammei khatni ravmaengc khang katloumei taektw titu bammei ta tei nangniw nuhlou bammei tei ai nuh mak e. 21 Kamei lunghlaih khang ai kaganv tii kan the, tiki kamei nthah boulahmei khou tei rui lunghlaih mak khe. 22 Mi zaeng rui, mi pui ta tei nnaumei laeng khou ganc keylou puni the, kumna kamei khatni kamei lev lungcmaanv lungcmowmei taanv taanhmei guay tei taraina makmei ramrianra ariw puni. Kaniw kamei lev taanc bammei simei taanv khou tei rui lunghlaih mak e thei, mi hei ai taanc puni the. 23 Kanac guay ta tei ni swluai puni. Mi khou kiu, ai hei maansei guay ta kalungc kapaengc thay ngammeipu e twmei phwamling guay thay puni. Ai rui meic katana khang kataanv kataanv thay tii puni.
24 "Tiki Thuatiramei, mi simei latdyn khou hei tat makmei; 'Seitan tuang ningting' twna meicnunc rui kawmei tei thay makmei nangniw khou thu ramh baihmei sa haplou lak khe; 25 nangniw khou naimei tei ai guang mak saanv ntipna sin bam o. 26-27 Rihngamna guangmei nunc, ai rui nsinloumei taanv nkhamhmei tingmik nganv taanc suakmei nunc khang, apu rui akhou tiiloumei ngamv tei ai rui tiilou puni: zaatc guay ta kaniw baanc khou tiilou puni; ntanh builwang rui kaniw ta syan khang, kumna nianglai ta kumc bai puatlou khang tiilou puni. 28 Ai rui kaniw khang laukhwan gaanphiu ni tiilou puni.
29 "Bumaengh rui phwamling guay khou samei hei nukuanc naimei guay chu laa tho!