JOHN KHOU
NDAUHLOUMEI
1
1 Mi hei Ravguangc rui dincloumei, Jisu Khrista rui ndauhloumei guay lyanloumei tuang buk e. Ravguangc rui kabangc nunc khou ndauhlou khang Jisu Khrista khou tiilou tina, kamei rui katuang baanchara ndiu guangna, mi asaanh mak khou pat punimei guay hei kabangc John khou ndauhlou khwan e. 2 Kumna John rui kamei how kanmei guay tei raclou the. Ravguangc rui sa guangmei lat khatni Jisu Khrista rui ndauhloumei kamei rui dincloumei kiu mi hei e. 3 Mi hylou bammei lat guay hei meicnunc khou pacloumei kamei tei, khatni mi dinc kasuakcloumei lat hei nking lana mi khou hyloumei lat guay hei piumei kamei tei sangaymei e! Kalam thu mi guay hei asaanh mak khou pat puni the.
Phwamling Chanei khang Dinc Guangmei
4 John khou rui Asia kandic tuang phwamling chanei khou hymei:
Nai bammei, nai bam khwanmei khatni nai bam punimei Racguangc khatni katuang guangc bamvpaeng mav khou bammei bumaengc chanei khou rui zauzian khatni chuzaenghmei nangniw khang sw diu; 5 khatni lwmnuhmeipu, theihmei khou rui ringcthau dat reymei, khatni kandih guangc guay tuang kaipouc Jisu Khrista khou rui zauzian khatni chuzaenghmei nangniw khou tiilou pw diu.
Aniu ta nzianna kazei rui aniu paap khou rui aniu ta tiduakloumeipu, 6 aniu ta guanghdic, kapu Ravguangc siamruai swmei amuc nunc tiswloumeipu Jisu Khrista khang hymdaihmei khatni pumtan tingsaengzaeng sw diu! Amen
7 Zauc lo, kamei muangh khou guang pw the! Meic katana kata how puni, kata buy biwmei nunc nganv how puni. Kandihmei zaatc kapwmna kazaeng rui kap puni. Ngguay, Amen! 8 Nai bammei, nai bam khwanmei, khatni nai bam punimei Ngamparimei Poubauhmei Ravguangc rui, "Ai hei Alpha khatni Omega, reymei khatni nkhamhmei e," twna sa e.
Khrista ta Howmei
9 Nangniw chana khatni Jisu thei laymei swpui zaeng rui guanghdic nac nunc khou guangloumei ryanramei nangniw lev khaengv nchamcmei John ata, Ravguangc lat khatni Jisu rui dincloumei nchumhmei lat tei dinc tipui zaeng rui Patmos duipuidic khou lou bam khwan e. 10 Poubauhmei tuang Tingmik nungc ai Bumaengh khou bam khwan e. Khoutei tiangka khwan kumcna ranvmei khwan akhat rui athei thangc rui sa guang khwan e. 11 "Nang howmei guay tei hyna Ephesia, Smurna, Pergamos, Thuatira, Sardis, Philadelphia, khatni Laudikia kaidai guay khou naimei phwamling chanei khou tei tii o," twna sa the.
12 Akhou sa bammei kiu thow cho twna ai thei ziangrih patna zauc pw ki, kachaekc tuang thaucmai hyang chanei how khwan e. 13 Mi thauhmai hyang ding khou kiu kaphaypav key tanghmei pheychuanh piumei meic nac mpouh kumhmei gaanv khat ta how e. Kangaengv khou kachaekc paek duap e; 14 kasam ramhhiw kumc khatni gunh kumc mphwan e; kamik mai bwang kumc e; 15 kaphay tei ntei nthanna thut palikloumei kuanzinc kumc karaeng e; khatni kakhwan khowduang khwan kumc e. 16 Kabaanzat khou gaanchuangcna chanei sin e, kumna kamwang khou rui ntukmei kamun kaneimei baengsaeng pat e. Kazawpaanv tei neih ndyng neic kumc kachan e.
17 Ai kata how pwkhou, theihmei kumcna kahu khou pun key the. Khoutei kabaanzat baanc aruc khou bouclouna, sa the, "Ping rio! Ai hei reymei khatni nkhamhmei e. 18 Theic dat makmeipu kiu ai hei e! Ai theiclou kan the, tiki ntaw thu ai tingsaengzaeng ringc bam e. Theihmei khatni taruaihram khamvtaan abaanc khou nai e.