7
Israelmei Meic 144,000
1 Mi tangv, kauh baanchara padeih kandih kwn padeih khou dingna, kandih ruc khou, duipui ruc khou, hamh e thei thing bangc khou mpwan nliulou mak khang mpwan padeih ta khaem ding bammei ta how e. 2 Khoutei ringhmei Racguangc tuang malac sinna kauh baanchara akhat neihpat thangc rui guangmei ta how e. Kandih khatni duipui ta swkasic khang pumtan tiiloumei kauh baanchara padeih khou tei kamei rui kauc ranvna sa the, 3 "Aniu Racguangc tuang bangc nunc ta kaniw sanpiang khou seal namlou mak saanv, kandih, duipui hamh e thei thing bang guay tei swkasic rio." 4 Kasanpiang khou Ravguangc tuang seal namloumei meic sing 144,000 e twmei ai chu e. Kaniw tei Israel kaikhwang ruhna kanei khou rui e. 5-8 Mi khou tei Israelmei kaikhwang ruhna kanei: Juda kaikhwang, Reuben kaikhwang, Gad kaikhwang, Asher kaikhwang, Naphtali kaikhwang, Manasse kaikhwang, Simeon kaikhwang, Levi kaikhwang, Issakhar kaikhwang, Zebulun kaikhwang, Joseph kaikhwang khatni Benjamin kaikhwang—kaikhwang kathuic khou meic ching ruhna kanei ruhna kanei khou mi seal tei namlou khwan e.
Kasing Kaling Thay Makmei Meic Kangdai
9 Mi tangv, ai zauc pw ki, meic kangdai akhat how e. Mi tei kasing kaling thay dat mak khe! Kaniw tei kaikhwang guay, zaatc guay, guanghdic guay khatni lat guay khou rui guangmei nunc e. Kaniw pheychuanh mphwanmei piuna tadanv kuang sinna Lauziu Nac tuang guanghbamvpaeng hu khou ding bam e. 10 "Aniu ta guloumei hei guanghbamvpaeng khou dungc bammei aniu Racguangc khatni Lauziu Nac rui e," twna kaniw kauc bam e. 11 Kauh baanchara guay tei guanghbamvpaeng, gaanvdaih guay khatni ramhkui padeih daeng khou tei ding huamc bam e. Kaniw tei guanghbamvpaeng hu khou tei nkhum laemv keyna Ravguangc ta kalumna, 12 "Amen! Thuanhmei, hymdaihmei, ningting, thuanckumei, chakhwang champouhmei, pumtan khatni baantan hei tingsaengzaeng aniu Racguangc khang e! Amen!" twna sa e.
13 "Mi pheychuanh mphwanmei piumei nunc hei tabui swmei nunc cho? Kaniw tabui khou rui guangmei nunc cho?" twna gaanvdaih nunc pang khou tei gaanv khat rui akhou thanv khwan e.
14 "Ai thay mak e. Nang rui thay khang di the," twna ai rui daw the.
Khoutei kamei rui akhou sa the, "Kaniw hei ryanra daihmei khou tei rui duak patmei nunc e. Kaniw hei kaniw tuang pheychuanh Lauziu Nac zei rui sou mphwanmei nunc e. 15 Mi zaeng rui, kaniw Ravguangc tuang guanghbamvpaeng hu khou ding bam tuang e, khatni katuang ravkai khou zingbangc kalaanv siamruai sw bam tuang e. Guanghbamvpaeng khou dungc bammeipu rui kaniw ta kasung khou gaeklou puni. 16 Kaniw ndaepc dat lak khe, tari dat lak khe; neih thiu suhmei rui hamh e thei baihmei suhmei rui pwni kaniw ta raw dat lak khe. 17 Kalam thu guanghbamvpaeng chung khou bammeipu tei rui kaniw ta gaengclou puni, kumna kaniw ta ringhmei duipuakkai khou zaylou puni, khatni Ravguangc rui kaniw mikdui guay roulou puni."