2
Aniu ta Nkhavloumei Khrista
1 Anac thiu, nangniw paapc taanh mak khang mi hei nangniw khang hy tuang e; tiki thowkumhmei paapc taanclou e thei, Pu khou aniu khang huayneylou khang nchumhmei, ravchaptatmei sungpouc Jisu Khrista nai e. 2 Kapaan rui aniu paap guay kuaklou tuang e; aniu paap khang na hamh e; mbaanv kapwm paap khang kamei lynlou the.
3 Aniu katuang latdanv guay piu e thei, aniu kata thay the twmei nthan the. 4 Thowkumhmei rui kamei kata thay the twna sa laki, katuang latdanv guay thu piu makpui mei tei saraemhpui mei e, khatni kakhou nchumhmei maek e. 5 Tiki kalat piu bampui mei tei thu kamei Ravguangc ta nzianmei tei ti-nthuihlou bampui mei e. Aniu kakhou bam changh the twmei thay nimei kiu thu mi hei e, 6 twmei thu: thow pwni kamei Ravguangc khou bam the twna sapui mei tei Jisu Khrista kumcna lungc nina e.
Latdanv Kathanc
7 Nzianmei thiu, mi ai rui nangniw khou hy bammei latdanv hei kathanc hamh e; mi hei thaurey khou na rui nangniw khou tiiloumei latdanv guangc tei de. Latdanv guangc kiu thu nangniw chu tangv kanmei tei the. 8 Tiki ntaw ai nangniw khou hy bammei latdanv hei thu kathanc e. Kalam thu mi tuang kalingmei tei Khrista khou ni, nangniw khou ni how e, kumna gaanhmei ling tei gaanc bam the.
9 Thow pwni kamei gaanhmei khou bam the twna sa laki, kachana punav ta karaeng e thei, ntaw nganv kamei zinghmei khou bam di he. 10 Thow pwni kachana punav ta nzianpui mei tei gaanhmei khou bam the, kumna kamei rui meickai taa tiphaysuy nipui tuang maek e. 11 Tiki thow pwni kachana punav ta karaengpui mei tei zinghmei khou bam di he; kamei zinghmei khou tat bam e, kumna kamei tabui thangc tat bam tu cho twmei kamei thay mak e. Kalam thu zinghmei rui kamik sw tiat the.
12 Achanathiu, ai nangniw khang hy bam tuang e. Kalam thu Khrista paan rui nangniw paap guay kuaklou kan the. 13 Pu thiu, ai nangniw khang hy bam tuang e, kalam thu puakthau puaksiak khou rui nai bammeipu ta nangniw thay the. Chabwanthiu, ai nangniw khang hy bam tuang e, kalam thu nangniw Simeipu ta tei ngam kan the.
14 Alaucthiu, ai nangniw khang hy bam tuang e, kalam thu nangniw Pu ta nangniw thay the. Pu thiu, ai nangniw khang hy bam tuang e, kalam thu puakthau puaksiak khou rui nai bammeipu ta nangniw thay the. Chabwanthiu ai nangniw khang hy bam tuang e, kalam thu nangniw tanc the; Ravguangc lat nangniw khou nai the, khatni nangniw rui Simeipu ta ngam the.
15 Mbaanv ta nzian rio khatni mbaanv tuang guay ta nzian rio. Nangniw mbaanv ta nzian e thei, nangniw Pu ta nzian mak e. 16 Mbaanv tuang guay twmei thu—meic pumc rui kahawmei, mik rui kahawmei, lanv tuang gaengh swmei mi guay hei Pu khou rui guang tu hamh e; mbaanv khou rui de. 17 Mbaanv khatni meicnunc rui kahawmei mi khou naimei guay hei ni maan kan ni de; tiki Ravguangc ningmei taanhpui mei na tei tingsaengzaeng ringc bam e.
Khrista ta Zauczihmeipu
18 Alaucthiu, mi hei nkhamhmei ganvdak di the! Khrista ta zauczihmeipu guang puni twna nangniw khou dinclou kan the, kumna ntaw thu Khrista ta zauczihmei mei mpeyna pat the. Kumna ntaw thu nkhamhmei ganv na the twmei aniu thay the. 19 Kaniw aniu pang khou rui tat pat kanmei hei kaniw aniu pang khou kazauhmei hamh tina e. Aniu pang khou kazauhmei nunc khwan e thei, kaniw tat pat makna bam kan ni tuang de. Kaniw tat pat kanmei hei rui kaniw hei aniu pang khou kazauhmei hamh e twmei nthanna lyan the.
20 Tiki nangniw thu Nthanmeipu rui bun keymei Bumaengh Nthanmei tei laatowmei nunc the, kumna nangniw thu nchumhmei tei thay the. 21 Kum thena, nangniw nchumhmei tei thay mak e twna ai hy bam tu hamh e; tiki nangniw thaypui zaeng rui hy tuang e, khatni nchumhmei khou rui saraemhmei pat mak e twmei ni nangniw thay e.
22 Kum e thei saraemhpui mei kiu thow tei cho? Jisu hei Khrista hamh e twna sapui mei tei e. Mi kumhpui mei tei Khrista ta zauczihmei the—kamei Pu ta ni, Kanac mpouh ta ni nuh mak e. 23 Ka Nah Mpouh ta laalou makpui mei tei Pu ta ni laalou mak e. Ka Nac Mpouh ta laaloupui mei tei Pu ta ni laalou e.
24 Nangniw thaurey khou rui chu kanmei latdyn tei nangniw lungc khou lou o. Mi tei nangniw lungc khou nai bam e thei, nangniw Ka Nac Mpouh khatni Pu khou bam bam puni. 25 Khrista rui aniu khang nrianhloumei ringcsuangmei kiu mi hei the.
26 Nangniw ta guat khang sw bammei nunc lam khou ai nangniw khou hy bam tuang e. 27 Tiki nangniw thu Khrista rui tiimei Bumaengc tei laatowmei nunc di the. Bumaengh tei nangniw khou bam saanv, nangniw ta meic baihmei rui ncham dat bam khang kage maek khe. Kalam thu katuang Bumaengc rui nangniw ta ramh lam katana nchamlou bam tuang di the. Kamei rui nchamloumei tei nchumhmei e; saraemc dat mak khe. Mi zaeng rui, Bumaengh rui dincloumei tei piu o, kumna Khrista khou bam tanh tan o.