John
RUI HYMEI REYMEI TATDYN
1
1 Puakthau puaksiak khou rui nai bammei ringhmei Lat lam khou aniw rui nangniw khou hy tuang e. Kamei rui sa kahakmei aniw chu the; aniw mik kahak rui kata how the. Ngguay, aniw how the khatni aniw baanc rui kata kahi tow the. 2 Mi ringhmei hei mik rui howmei khou ndauh pat the, kumna aniw kata how the. Mi zaeng rui aniw kalam khou sa bam tuang e khatni Pu khou naimei aniw khou ndauhloumei ringcsuangmei lam hei nangniw khou dinclou tuang e. 3 Aniw rui howmei khatni chumei guay aniw rui nangniw khou dinclou tuang e. Mi hei aniu Pu khatni Kanac Mpouh Jisu Khrista khou akhat na swna bammei khou hei nangniw ni kazauh khang e. 4 Aniwa neihla nthuih khang, mi hei hypui tuang e.
Ravguangc Thu Gaanhmei e.
5 Aniw kakhou rui chuna dinc ndauh bammei chamv kiu mi hei e: Ravguangc thu gaanhmei e, kumna kakhou zinghmei khat sini maek e. 6 Aniu kakhou lungc nchamc bam the twna sa laki, zinghmei khou lungc bam e thei, aniu saraemc e, nchumhmei khou lungh mak e. 7 Kamei gaanhmei khou bammei kumcna aniu ni gaanhmei khou bam e thei, aniu nchamc the, khatni Kanac Mpouh Jisu zei rui aniu ta paapc guay khou rui sw-nthanlou the.
8 Aniu rui aniu paap maek e twna sa e thei, aniu rana aniu ta guat tuang e, khatni aniu khou nchumhmei maek e. 9 Tiki aniu rui aniu paap Ravguangc khou kalauh ti thei, kamei thu kalat suai makmeipu e, khatni nchumhmei taanhmeipu e, kumna kamei rui aniu paap guay kuaklou puni khatni aniu khuay guay sw-nthanlou puni. 10 Aniu paapc taanh mak e twna sa e thei, aniu rui Ravguangc ta saraemhmei tiswlou the, kumna kalat aniu khou maek e.