3
Ravguangc Nac nunc
1 Zauc lo, Pu rui aniu ta adih nzian cho! Kamei rui aniu ta heidikamv nzianna aniu ta Ravguangc nac nunc twna kawlou the—aniu Kanac nunc changh the! Mi zaeng rui Ravguangc ta thay makmei mbaanv rui aniu ta thay mak e. 2 Nzianmei thiu, aniu hei Ravguangc nac nunc the; tiki aniu tabui kumc puni cho twmei ntaw nthanna thay mak he. Tiki Khrista guang pwkhou kiu, aniu kakumc puni the twmei aniu thay e. Kalam thu kalwnlung kahak tei aniu how puni the. 3 Mi kumcna Khrista khou rigwnmei naimei kathuic tei, Khrista nthanmei kumcna nthanna bam puni.
4 Thow pwni paapc taanhpui mei tei riakdanv liammei e, kalam thu paapc hei thu riakdanv piu makmei e. 5 Paapc guayc laa ganclou khang Khrista guang tuang e, kumna kakhou paapc maek e twmei nangniw thay e. 6 Mi zaeng rui, Khrista khou bampui mei rui paapc taancna bam mak e; paapc taanc bampui mei tei thu kata how mak e, kata thay ni thay mak e.
7 Anac thiu, nangniw ta tiguat rio! Thow pwni nchumhmei taanhpui mei tei, Khrista ravchaptatmei kumcna kamei ni ravchaptatmei e. 8 Paapc taanc bampui mei tei thu Ravsic tuang de. Kalam thu Ravsic hei thaurey khou na rui paapc taanc the. Mi zaeng rui, Ravsic tuang taanv guay swmaan khang Ravguangc Nac Mpouh guang tuang e.
9 Ravguangc nac swna puanc kanmei guay thu paapc taanc bam dat mak khe. Kalam thu Ravguangc lwnlung kakhou nai the. Kamei Ravguangc nac lapui zaeng rui paapc taanc bam ngam mak e. 10 Thow tei Ravguangc nac cho, thow tei Ravsic nac cho twmei thay nimei kiu mi hei e. Nchumhmei taanh makpui mei khatni kachana punav ta nzian makpui mei tei Ravguangc nac hamh e.
Khat Khat ta Nzian o
11 Thaurey khou na rui nangniw chu kanmei latdyn kiu thu: aniu khat khat ta nzian nina e twmei hei e. 12 Aniu Kain kumc nina hamh e. Kamei Simeipu tuang mei swna kachana kahak Abel ta swluai kan e. Tabui zaeng rui Kain kakainac ta dowluai tu cho? Kalam thu kataanv tei si khwan e; kakainac tuang taanv rui nchumhmei khwan e.
13 Chana punav thiu, mbaanv rui nangniw ta karaeng pwkhou ngak rio. 14 Aniu thu theihmei ta ganclouna ringhmei khou kaan pat tuang di the twmei aniu thay e. Kalam thu aniu chana punav ta nzian the. Nzian makpui mei tei thu theihmei pumtan bangc khou bam di he. 15 Kachana punav ta karaengpui mei tei meicdowmei e, kumna meicdowpui mei khou ringcsuangmei maek e twmei nangniw thay e. 16 Nzianmei kiu mi hei e: Khrista rui aniu khang kapanty tii pat the. Mi tei kumcna aniu ni aniu chana punav guay khang aniu panty tii pat nipui thouc e! 17 Naimeipu gaanv khat rui kachana punav lungc ryanrana bammei ta how sini kakhou nzianmei pat mak e thei, kamei Ravguangc ta nzian e twna akumhna sa ngam nina cho? 18 Anac thiu, aniu lat na rui nzian ri kho; tiki taanv khou khatni nchumhmei khou nzian kho.
Ravguangc hu khou Bauc Ngammei
19 Aniu nchumhmei khou bam the twmei thay nimei kiu mi hei the; aniu rouh tuang maekna Ravguangc hu khou guang ngammei kiu mi hei the. 20 Aniu lungning rui aniu ta nkhuai e twna sa pw sini, Ravguangc thu aniu lungning khang suangc mbumei de, kumna kamei ramh guayna thay e. 21 Mi zaeng rui, nzianmei thiu, aniu lungning rui aniu ta nkhuai e twna salou mak e, aniu Ravguangc hu khou rouh dat khang maek khe. 22 Aniu katuang latdanv guay piu tipui zaeng rui khatni kamei ningmei taanc tipui zaeng rui aniu kakhou ney neymei laatow e. 23 Katuang latdanv kiu thu Kanac Mpouh ta lwm o khatni Khrista tuang latdanv kumcna khat khat ta nzian o twmei hei e. 24 Ravguangc latdanv guay piumei guay tei Ravguangc khou bam the khatni Ravguangc kakhou bam the. Ravguangc aniu khou bam the twmei kamei rui aniu khou tiiloumei Bumaengc paan tei rui aniu thay e.