4
Kalaic Patmei Panty
1 Khrista tei kapumc khou ryanra khaengv kan the. Mi zaeng rui, nangniw ni mi kumhmei lungning tei phungcna, mi tei rui nangniw tuang ricpwan sw nina the. Kalam thu meic pumc khou ryanra khaengv kanpui mei tei paapc khou bam dat mak khe. 2 Mi zaeng rui, ntaw khou rui thauna, nangniw tuang nai bammei mbaanv panty hei meic pumc rui kahawmei thei layna lungc dat lak nina the; Ravguangc rui ningmei thei layna lungc nina e. 3 Nangniw ni tat kanmei ganv khou tei Jentailmei nunc taanc niimei taanv zaat guay tei taancna lungc kan the. Nangniw panty tei lungcmaanv lungcmowmei khou, nthah boulahmei khou, tu zangvna mba nlaumei khou, chanymei ravmaengc kalummei khou lungc kan the. 4 Ntaw thu mi kumhmei simei lwnlung khou tei nangniw lay lungc dat tii makpui zaeng rui, kaniw khang kadath dat the, kumna nangniw ta sakasicna sw zak khang sw the. 5 Tiki theihmei, ringhmei katana ta latzan sw nimei Racguangc latzan hu khou kaniw ni guang ding puni. 6 Mi zaeng rui, meic pumc khou maansei ta swna latzan sw kan khwan sini, kaniw Ravguangc kumcna bumaengh khou ringh khang, gaychamv hei theihmei kaniw khou ni dinclou kan tuang e.
Ravguangc Kaipat Piu Chuymei nunc
7 Ramh guayna luailou nimei ganv na the. Kum thena ntak nrakna huayney bam o. 8 Ramh guayna ruc khou, nangniw khat khat ta nzian ntipna nzian bam o. Kalam thu nzianmei rui paapc heizumei ta gum binlou e. 9 Nangniw neihla neihlana khat khat ta ginkic phay pamcna lungc o. 10 Meic katana kakhou kakhou tiiloumei kaipat tei Ravguangc siamruaimei swna meic guayna khang gaeng khang sinsw o. 11 Chamv dinhmei nunc rui Ravguangc lat tei dinc o; siamruai swmei nunc rui kakhou Ravguangc rui tiiloumei pumtan tei sinswna taanc o. Kumna ramh lam guayna khou Khrista paan rui Ravguangc hym tidaih khang taanc o. Hymdaihmei khatni ngammei hei tingsaengzaeng Jisu Khrista khang e. Amen.
Khristian Swpui Zaeng rui Ryanra Khaengvmei
12 Nzianmei thiu, nchanvmei tuang ryanra daihmei nangniw khou guangpui ganv khou, mi tei nangniw khou kadath datpui tuang guanglou kumcna ning rio. 13 Mi phaan tei, Khrista tuang hymdaihmei ndauh patpui nungc kiu, nangniw neihlamei rui padik khang, nangniw katuang ryanramei dam lay phungc bam tuang e twna neihla o. 14 Khrista zanc khou meicnunc rui nangniw ta sw zak lou e thei, nangniw sangaymei e; mi tei hymdaihmei Bumaengc, Ravguangc Bumaengc nangniw khou bam tina the. 15 Meicdowmei, kaihouhmei, simei taanv taanhmei khatni meickai taanv khou baanh numloumei zaeng rui ryanra khaengvmei thu sw rio. 16 Tiki nangniw Khristian swpui zaeng rui ryanramei ariw e thei, mi khang tei zak rio; tiki nang ta Khristamei twmei zanc hei kawlou the twna Ravguangc ta thuancku o.
17 Latzan sw nipui ganv guang pw the, kumna Ravguangc mei nunc ta latzan sw rey puni. Latzan hei aniu khou rui kahouh e thei, Ravguangc tuang gaychamv piu makmei nunc ta thu akumh puni thah?
18 "Ravchaptatmei ta sini
kungc sihna gulou e thei;
ravning makmei paapcmei nunc ta
thu akumh puni thah?"