3
Khristian Nowpuc
1-2 Mi tei kumcna now nunc nangniw ni nangniw gaanv gaanv bangc khou bam o. Kum pwkhou thowkumhmei Ravguangc lat piu makmei gaanv nunc ta lat sa mak sini, kaniw now now tuang nthanmei khatni chakhwang gaymei kheiliak rui zay guang khang e. 3 Kapaengc tuang swmei—sam kasiamhmei, kachaekc khatni pheybaan rui karuhmei tei nangniw sw nangh e; 4 mi phaan tei Ravguangc mikzaw khou kamanv kunghmei, maan dat lakmei lanv—lunghzaenghmei khatni kachangc siph sipmei tei rui nangniw tuang kalungcmei mei tei karuh o. 5 Reydouc Ravguangc khou lwmmeipui nunc tei ni mi tei kumcna kaniw gaanv bangc khou bamna kaniw lwnlung kapuih kan e. 6 Sara Abraham bangc bamna, kagaanv ta kakaipouc twna kaw khwan e. Nangniw ni gaymei taanc e thei, kanac aluh nunc the, kumna ping bam dat khang maek khe.
7 Mi hei kumcna, gaanv thiu, nangniw ni nangniw now now ta kaniw hei suanmei e twmei kabah thayna lungc o. Nangniw lev ringhmei laa nchamc nimei nunc e twna chakhwang swna lungc o. Mi kum pwkhou, nangniw huayneymei khamv namv mak khang e.
Nchumhmei Taanhmei khang Ryanra Khaengvmei
8 Nkhamh khou salou niimei thu: lunghchamc o, kadan kary o, khat khat ta nzian o, lunghzaengh o khatni lunghniamh o. 9 Simei khang simei khangc riu; siangloumei khang tei siang khangc dat riu. Mi phaan tei suaihiamlou tio. Kalam thu Ravguangc rui nangniw ta kawloumei hei mi khang the. Kum pwkhou, nangniw suaihiam laatow puni. 10 Kalam thu nthanmei latrik rui sa e:
"Thow pwni ringhpaan khou amanvna
khatni neihlana lungc nii e thei,
kamei simei lat sa lak nina e,
khatni saraemhmei lat sa lak nina e;
11 Kamei simei ta mpatlouna gaymei taanc nina e;
kamei chuzaenghmei ta phuna,
chuzaengh khang karamc nina e.
12 Kalam thu Poubauhmei thu
ravchaptatmei nunc ta zauc bam e,
khatni kaniw huayneymei chulou bam e;
tiki simei taanhpui mei ta kamei zauc zih e."
13 Nangniw nchumhmei taanc nii bam ti thei, nangniw ta swkasic nimei thow naina cho? 14 Tiki nchumhmei taanc tina nangniw mi khang tei ryanramei ariw e thei, nangniw sangay e. Kaniw ta ping rio khatni lunghgeih rio. 15 Tiki Khrista ta nangniw kaipouc e twna nangniw lungc khou chakhwang sw o. Nangniw lwmmei lam khou meicnunc rui thanv pwkhou daw khang chamdaanv bam o. 16 Mi tei lungh zaenghna khatni chakhwang naina sa o. Nangniw thu khuay maekna lungh khang sw o. Khrista khou nangniw tuang gaymei kheiliak ta tei sakasic khang swmei nunc tei zak kan diu. 17 Nkhuaimei taanhmei suangc, Ravguangc rui ningmei e thei, nchumhmei taanhmei khang ryanra khaengv kanmei rui gay e. 18 Khrista ni luan guaina paapc khang theiclou the. a Nangniw ta Ravguangc khou zay guanglou khang ravchaptatmei rui ravchaptatmakmei nunc khang theiclou the. Kapumc ta thu swluai the, tiki bumaengh khou tiringcthaulou the. 19 Kumna kabumaengc tei tatna kangkai khou bammei bumaengc guay khou chamv dinclou the. 20 Mi tei Noa rui hih kasiamh bammei ganv khou Ravguangc rui khaengvna nkhwan bam khou lat piu makna bam kanmei nunc tuang bumaengc tei e. Mi khou tei meic katitna—gaanv tachat na hih khou gutna dui khou tei rui duak khwan e. 21 Mi tei ntaw nangniw ta guloumei duilupmei ta hei taanc lyanlou tuang e. Duilupmei hei meic pumc tuang mphuammei ta khiu ganhmei tuang hamh e; tiki lwmnuhmei Khristamei sw khang Ravguangc khou latryan swmei tuang e. Nangniw ta guloumei hei thu Jisu Khrista ringcthau datmei paan rui de. 22 Mi kiu tingkauh ku lana Ravguangc baanzat khou rui kauh baanchara guay, tingkauh khou ngamv naimei guay, khatni pumtan naimei guay ta sin bammeipu hei e.