2
Ringhmei Tauc khatni Nthanmei Zaat
1 Mi zaeng rui karaeng zauczihmei, rouh raengh simei, kakheswmei, howtimei khatni meickai ta sakasicmei kapwmna ganc o. 2 Nangniw ngasatna nunc rui noucdui ningmei kumcna kalingmei bumaengh tuang noudui ta kahaw o. Kumna mi paan tei rui nangniw guloumei nganv daic thau khang e. 3 Kalam thu Poubauhmei ramgai nangniw mbap kan the.
4 Meic nunc rui thu gancpatloumei, tiki Ravguangc khang thu kapahloumei khatni kunghmei ringhmei tauc Poubauhmei daeng khou na guang o. 5 Nangniw ni ringhmei tauc swna guangna bumaengh tuang ravkai sw thaumei tauc tei tisw o. Mi khou tei nangniw nthanmei amuc nunc swna Ravguangc rui laalou nuhmei, bumaengh tuang khaengpui taanv Jisu Khrista paan rui taanc bam khang e.
6 "Zauc lo, kapahloumei kunghmei tauc
Zion khou kaikwntauc swna ai rui lou e.
Kakhou lwmmei mei ta zakmei ti-ariw lak e,"
twna hylouna nai e. 7 Mi tauc hei lwmmei nangniw khang kunghmei tauc e; tiki lwm makmei nunc khang thu,
"Kai swmei nunc rui gancpatloumei
"Mi tei meicnunc ta tiphaysuy nipui tauc e,
kaniw ta tibow nipui tauc e,"
twna hyloumei kumcna, kaniw lat tei lwm makpui zaeng rui mi khou tei phaysuy the. Mi tei kaniw dam the.
9 Tiki nangniw thu, nangniw ta zinghmei khou rui katuang charynmei gaanhmei khou kaw patloumeipu Racguangc tuang charynmei taanv guay dinc ndauh khang, Ravguangc rui kapahloumei nunc e; guangh tuang amuc nunc e; nthanmei zaat e; Ravguangc mei nunc e. 10 Kahunungc nangniw Ravguangc mei nunc hamh bam khwan e; tiki ntaw thu nangniw kamei nunc di the. Kahunungc nangniw Ravguangc zauzian laatow makmei nunc sw bam khwan e; tiki ntaw thu nangniw kazauzian laatow the.
Ravguangc Bangc nunc
11 Nzianmei thiu, mi mbaanv ramc khou gin swna lungc khanv bammei ai rui nangniw khou huaycha e! Bumaengh ta adow bammei meic pumc rui kahawmei khou rui karei pat o. 12 Jentailmei pang khou nangniw khei liak gayna lungc o. Kaniw rui nangniw ta meicsimei nunc de twna sa bam pw sini, kaniw nangniw tuang gaymei taanv guay tei howna katuang latzan nungc kiu Ravguangc ta thuanc kan diu.
13 Nangniw Poubauhmei khang kandih tuang ngamv phunghmei guay bangc khou bam o. Ngamv karucsinghmei guanghdaihmei bangc khou ni bam o. 14 Simei taanhmei nunc ta riap khang khatni gaymei taanhmei nunc ta thuanckulou khang ngamv tiiloumei guanghkhyn nunc bangc khou ni bam o. 15 Mpangmei nunc rui thay makna sakasic bammei lat guay tei nangniw tuang gaymei taanv rui munthimloumei hei Ravguangc rui kahawmei e. 16 Nangniw nyngswmei nunc swna lungc o; tiki nyngswmei tei simei taanh khang thu sinsw rio. Ravguangc bangc nunc swna lungc o. 17 Meic guayna ta chakhwang sw o, chana guay ta nzian o; Ravguangc ta ping o; khatni guanghdaihmei ta kangamv kaziu sw o.
Khrista Kumcna Khaengv o
18 Bangh thiu, nangniw kaipouc nunc bangc khou chakhwang champouhna bam o. Lunghzaenghmei bangc khou ni, meicsimei bangc khou ni bam chuyna bam o. 19 Meic nunc rui nchumh makna swkasicna swmei tei nangniw Ravguangc ta thayna khaengvlou e thei, mi tei suaihiam de. 20 Tiki nangniw khuay zaeng rui nangniw ta baimei zam suhmei tei thu nangniw khaengv bam sini tabui gaeng tuang naina cho? Tiki nangniw nchumhmei taancna ryanramei khaengvlou e thei, mi khang tei Ravguangc rui suaihiamlou puni. 21 Ravguangc rui nangniw ta kawloumei hei mi kumcna lungh khang the. Khrista kamei nangniw khang ryanra khaengvlou the, kumna kathei lay nzeic khang taanclou the. Mi kiu kakaemv lay kaemh khang the. 22 Kamei paapc taanh mak e; kamwang khou rui saraemhmei lat khat sini sa pat mak e. 23 Karuc khou latsic salou tisini kamei latsic sa khangc dat mak e. Kata rai tisini, khwm laa ni twna sa mak e. Mi phaan tei nchumhmei latzanpouc khou kata nsinlou e. 24 Aniu paap khou rui duak patna ravchaptatmei khou lungh khang kamei kahak rui thing ruc khou kapumc khou aniu paap phungclou the. Katuang zam guay tei rui aniu ta tigaylou the. 25 Nangniw hei ruan maan tat kanmei lauziu nunc kumc bam khwan the; tiki ntaw thu nangniw bumaengc ta gaengclou nimei khatni gaeklou nimeipu khou guang dat the.