Pitar
RUI HYMEI REYMEI TATDYN
1
1 Jisu Khrista tuang Latdiutatmei Pitar rui— Pontas, Galatia, Kappadokia, Asia, khatni Bithunia kandic khou gin swna lungc bammei Ravguangc rui kapahloumei mei nunc, 2 Jisu Khrista lat piu khang khatni kazei rui sw nthanlou khang Pu Ravguangc tuang raeng thei layna kapahlouna Bumaengh rui nthanmei mei tiswloumei nunc khou hymei:
Zauzian khatni chuzaenghmei nangniw khou padikna tiilou mbu hay hay bam kan diu.
Khristian Rigun
3 Aniu Poubauhmei Jisu Khrista Racguangc khatni Pu ta aniu thuanc kho! Kalam thu kamei rui aniu ta heidikamv nzianna, Jisu Khrista ta tiringcthaulou datmei paan rui, maan dat lakmei rigun khou aniu ta puanclou the. 4 Kum thena Ravguangc rui tingkauh thangc nangniw khang lou bammei maan dat lakmei, mphuam dat lakmei khatni kamv dat lakmei ringhmei tei nangniw laa puni the. 5 Mi tei nkhamhmei nungc ndauh pat punimei guloumei tei tangh mak saanv lwmmei paan rui Ravguangc pumtan rui gaeklou bammei nangniw khang the.
6 Nchanvmei kazaat azuh ariwna matak khat khang nangniw ryanra khaengv bam pw sini, mi khang hei rui nangniw neihla bam o. 7 Mi nchanvmei hei thu nangniw ramlum kalyng bam tuang e. Maan kan nimei kachaekc ta sini kalingmei pat khang mai ntei e. Mi tei kumcna kachaekc khang suangc kunghmei nangniw ramlum tei kalingmei sw khang kalyng ni tina di the. Mi hei Jisu Khrista ta ndauh patpui nungc kiu thuanckuloumei, hymdaihmei khatni champouhmei nangniw laatow khang e. 8 Nangniw kata how mak he, tiki nangniw kata nzian the, khatni ntaw nangniw kata how mak sini nangniw kakhou lwm the, kumna sa pat khang thay makmei hymdaihmei ramneila nangniw neihla bam e. 9 Kalam thu nangniw kakhou lwmmei thay nangniw bumaengc ta guloumei nangniw laatow the.
10 Nangniw khang tiilou nimei kaipat lam hei dinc kasuakcloumei muczwng nunc mi guloumei lam hei phu mincna kathai khwan e. 11 Khrista ryanra khaengv nimei khatni hymdaic nimei lam khou kaniw lungc khou bammei Khrista Bumaengc rui dinc kasuakclou pwkhou, mi kiu thow puni cho khatni tabui ganv khou pat puni cho a twmei kaniw kathai khwan e. 12 Tingkauh thangc rui ndiu keymei Bumaengh Nthanmei paan rui, gaychamv dinhmei nunc rui ntaw nangniw khou dincloumei chamv hei, kaniw dinc kasuakc bammei tei kaniw khang hamh e, nangniw khang e twmei Ravguangc rui kaniw khou ndauhlou khwan e. Tingkauh baanchara nunc thay niimei kiu ni mi hei the.
Nthanmei Panty khou Lungh khang Kawloumei
13 Mi zaeng rui nangniw lungning sianlangv langv o; ntak nrak bam o; Jisu Khrista guangpui nungc kiu nangniw khang tiilou nimei suaihiam khang tei lwmgay bam o. 14 Nangniw lat piumei nac nunc sw o; ramhthay makna bammei douc tei kumcna meic pumc rui kahawmei rui nangniw kheiliak kasiamh dat ri tho. 15 Nangniw ta kawloumeipu hei thu nthanmeipu e. Mi zaeng rui nangniw kheiliak guay hei ni nthan nina e. 16 "Nangniw nthan nina e, kalam thu ai hei nthanmei e," twna hylouna nai e.
17 Zawkhu zawru zauh makna, meic guayna ta kataanv kataanv thei layna latzan swmeipu ta nangniw rui "Apu" twna kaw e thei, nangniw mi mbaanv khou gin swna lungc bammei panty khou hei kata pingna lungc o. 18 Nangniw ta, nangniw pupouc nunc khou rui laamei tuang nsa panty lwnlung khou rui thuak patloumei hei maan kan nimei daandi kachaekc rui hamh e twmei nangniw thay e. 19 Mi hei nthuihmei, hiaksuimei lauziunac kumhmei Jisu Khrista tuang kunghmei zei rui e. 20 Mbaanv damh mak khou rui kata kadahlou tangv the; tiki nangniw khang mi nkhamhmei ganv khou hei ndauh patpui tuang e. 21 Kata tiringcthaulouna kata tihymidaicloumei Racguangc khou nangniw kapaan rui lwm the. Kum thena nangniw lwmmei khatni rigwnmei Ravguangc khou nai the.
22 Ntaw thu nchumhmei lat tei piupui paan rui nangniw ta sw-nthanlou the. Kumna nangniw chana punav khat khat ta nzian changhna lungc nipui tuang di the. Kum thena, nangniw lungsyng khou rui b khat khat ta nzianna lungc o. 23 Kalam thu ringhmei khatni maan dat lakmei Ravguangc lat paan rui, nangniw ta theic dat makna ringc bammeipu nac nunc swna puanclou the. 24 Kalam thu,
"Maansei hei thu puc bwan kumh tuang de,
kaniw tuang hymdaihmei guay tei ni
mwnpwang na kumh tuang de.
Puc bwan guay tei theic e,
mwnpwang guay tuai e;
25 tiki Ravguangc lat thu tingsaengzaeng nai bam e."
twna nthanmei latrik rui samei lat kiu nangniw khou dincloumei gaychamv hei the.