5
Ravguangc Lauziu Pang
1 Ai kahak ni gaanvdaih akhat swna nangniw phwamling gaanthaic guay khou huaycha e. Khrista ryanra khaengvmei tuang sakhi, khatni ndauh pat punimei hymdaihmei tei laa nchamc nimei ai rui nangniw khou huaycha e: 2 Nangniw khou nsinloumei Ravguangc lauziu pang ta tei gaengc o. Taanc zih zihna taanhmei hamhna, Ravguangc rui kahawpui thei layna taanc niina taanc o. Syan lanv khang hamhna, taanclou nii changhna taanc o. 3 Nangniw khou nsinloumei lauziu pang ruc khou tei nangniw kaipouc kumcna sw riu, tiki lauziu pang tei rui lay nzeic nuhpui lwnlung swna lungclou o. 4 Kumna lauziu gaenghmei kapypu tei guang pwkhou, tuai dat lakmei hymdaihmei swan pykhim nangniw laa puni.
5 Mi tei kumcna alaucthiu, nangniw ni gaanvdaih guay bangc khou bam o. Nangniw niamhna khat khat siamruai sw o. "Daihriw swmei ta Ravguangc nuh mak e." 6 Mi zaeng rui, ngammei Ravguangc baanc pwam bangc khou nangniw niamh key o. Kum e thei kamei rui nuhloupui ganv khou nangniw ta zay kauh thaulou puni. 7 Nangniw tuang lungc geic kadanmei guay tei kakhou tiilou o; kamei nangniw khang kadanlou bam e.
8 Nangniw ramhthayna ntak nrakna bam o! Nangniw ta zauczihmei Ravsic hei rah bammei kamangliangpui kumcna thowkumhmei ta swluai tow puni cho twna rik tat bam e. 9 Nangniw lwm ntip o khatni ravsic ta ding khaengv o. Chana guay thu mbaanv kapwm khou nangniw ryanra bammei kumcna ryanramei ariw bam muai tuang de twmei nangniw thay e. 10 Matak khat mi kumna ryanra khaengvloumei tangv, Khrista paan rui katuang tingsaengzaeng hymdaihmei laa khang nangniw ta guloumeipu, zauzian guay Racguangc kamei rui, nangniw ta ti-nthuihlou puni, sw ntiplou puni, titanclou puni, khatni tiding ntiplou puni. 11 Ngamv hei kakhang e tingsaengzaeng. Amen
Dwangay Kadymei
12 Lwmnuhmei chana akhat e twna ai laa bammei Silbana paan rui mi duimei tatdyn hei ai hy tuang e. Mi hei rui ai nangniw ta katiumei tuang e khatni mi hei Ravguangc zauzian ling the. Mi khou hei ding ntipna ding bam o.
13 Ravguangc rui kapah patloumei, Babilond khou bammeipui rui nangniw khang dwangay kady e. Anac mpouh Mark rui ni dwangay kady e. 14 Nzianmei tuang khat khat ta kaputna dwangay kady kary o.
Khristamei nunc nangniw khou chuzaenghmei nai diu.