9
Kandih khou tuang lev Tingkauh khou tuang Kalummei
1 Reymei latdyng khou tei kalum nipui thiak riak khatni mbaanv tuang ravkai nai e. 2 Mi kiu thu kalummei pheykai akhat katinghlou khwan e. Mi khou tei reymei kailangv khou thauhmai tiangc khatni Ravguangc khang katloumei tyan khatni kapaeng nai e. Mi tei nthanmei bamv twna kaw e. 3 Kaneimei khamthinghphey thei khou tei Nthan Liangmei bamv twna kawmei kailangv nai e. 4 Mi lungc khou tei agaw nteimei tuang kachaekc ravchabamv khatni kachaekc rui duamloumei Latryan Khuk nai e. Mi khuk lungc khou tei manna loumei kachaekc laizuangc, kazik kasatmei Aaron builwang khatni latdanv guay hyloumei tauc paek kanei tei lou e. 5 Mi khuk ruc khou tei kaswkaeng naimei hymdaihmei tuang kherubim kanei nai e, kumna kaney swkaeng rui zauzian bamv khou tei sungclou bam e. Ntaw mi lam khou hei katuk kalik sa bam ngam mak khe.
6 Mi kumcna kasiamhloumei khou tei, amuh guay tei tingmik pum tatna kapaengcmei Pheykai khou tei thouh sw e. 7 Tiki kalungcmei Pheykai khou tei thu Tingkuh na, tingkwm khou gut guay na gut e. Mi tei kakhang khatni thay makna taancloumei meicnunc tuang khuay guay kuaklou khang khaengloumei zei tei sin makna gut mak e. 8 Mi kumna kapaengcmei Pheykai tei nai bam saanv thu, Nthan Liangmei Bamv khou gut khang chaeng laanclou mak he twmei Bumaengh Nthanmei rui dinc e. 9 Mi hei ntaw ganv khang taanc lyanlou tuang e. Mi hei rui puatkat khatni kiruai khaengmei rui kalummei nunc tuang lungsyng tei thu sw nthan ngam mak e twmei lyan tuang e. 10 Kalam thu mi tei tu zangvmei tuang khatni baih baihmei kapaengc tuang khiu nthanmei riak khang na sw bam tuang de. Mi hei nthuihmei riak thanh tii guang makmei dak khou khang na tiilou tuang de.
11 Tiki ntaw guang tangclou bammeia gay nthuihmei tuang Tingkuc swna Khrista guang the. Kumna baanh rui kasiamh makmei, mi kandic tuang hamhmei daic ranv, nthuih ranvmei pheykai khou kamei gut kan the. 12 Khrista kamei Nthan Liangmei Bamv khou liang guai na gut khou, ziuchic khatni guaih zei hamhna, kazei kahak sin gutna aniu khang tingsaengzaeng ringcbamv laalou the. 13 Ziuchic khatni guaichic zei khatni guaihnay nteina khaengmei mbut kazinhloumei rui mphuammei nunc ta sw-nthanlou e thei, 14 Khrista zei rui thu adihkamv mbuna sw-nthanlou puni thah! Tingsaengzaeng Bumaengc paan rui kata hiaksuimei ravcha swna Ravguangc khou khaenglou kan the. Theihmei kachap kariak twanlyammei tuang aniu lungning khou phungc bammei chabangc tei kazei rui sw nthanlou puni, kumna aniu ringhmei Racguangc tuang siamruai sw nuh khang e.
15 Mi zaeng rui, Ravguangc rui kawloumei guay nrianhloumei tingsaengzaeng suaihiam laa kan khang Khrista rui latryan thanh tuang chaguatpouc swlou the. Reymei latryan bangc khou taanclou kanmei khuay guay khou rui thuak patlou khang kamei theiclou the. 16 Thowkumhmei rui katuang lanv nsinlou khang hyloumei latryan tei, 17 kamei theic pwkhou na rui mi tei kabah naimei latryan sw ni tuang de, kamei ringc bam saanv mi latryan tei nsa di he. 18 Mi zaeng rui reymei latdyng tei ni zei keyna swlou tuang de. 19 Mousi rui Riakdanv tuang latdanv guay tei meicnunc khou kauc pat rey liang khou, kamei rui guaichic khatni ziuchic zei laana mi khou tei dui lowna, hissop thing chiang khou mphaeng louna, mi zei tei khou tei ntinna Riakdanv zy khatni meic guay khou tei kazinhlouna, 20 "Mi hei nangniw khang Ravguangc rui tiimei latryan tuang zei the," twna sa khwan e. 21 Mi tei kumcna mi zei tei Pheykai khatni kalummei khou sinswmei puat guay khou tei ni kazinhlou the. 22 Kumna Riakdanv thei layna ramh guayna zei rui sw nthan e. Zei key makna paapc kuaklou mak e.
Khrista ta Khaengloumei Paan rui Paapc Kuakloumei
23 Tingkauh thangc tuang maengc swmei puat guay ta mi kumna sw nthan nipui thouc nai e. Tiki tingkauh thangc tuang khang thu mi khang suangc gay nthuih ranvmei khaengmei zei kage nai e. 24 Kalam thu Khrista gut kanmei Nthan Liangmei Bamv tei thu kamaengc tuang, baanh rui kasiamhmei kai khou hei hamh e. Kamei ntaw aniu khang Ravguangc hu khou gut bam bammei bamv hei thu kalingmei tingkauc kahak khou de. 25 Jihudimei Tingkuc thu kiruai zei sin lana Nthan Liangmei Bamv khou tei tingkwm pum gut e; tiki Khrista thu mi khou tei gutna kata khaeng dat dat bam khang kage maek khe. 26 Kum mak khwan e thei, mbaanv damclou rap khou rui thauna kamei katupna ryanra khaengv bam ni tuang e. Tiki kapumc kahak khaenglouna paapc kuaklou khang, luan guayna swna, ntaw zuk twan zuk ruai guang pwkhou, kamei guang the.
27 Maansei hei theic guay puni, kumna mi tangv kata latzan sw puni twmei hei nai bam tuang the. 28 Mi tei kumcna Khrista ni meic mpeyna paap laa ganclou khang luan guayna khaenglou the. Kamei guang dat puni. Mi tei paapc khang taanv swlou dat khang hamh the; kamei guangmei ta nkhwan bammei nunc ta gulou khang e.