8
Jisu Aniu tuang Tingkuc
1 Ntaw aniu rui sa bammei kiu thu, tingkauh khou Ravguangc hymdaihmei guangcbamvpaeng tuang baanzat khou dungc bammei Tingkuh aniu khang nai the twmei hei e. 2 Maansei rui hamhna Poubauhmei rui katinghloumei kalingmei kalummei pheykai khou naimei Nthan Liangmei Bamv khou kamei Tingkuh sw bam e.
3 Tingkuh kathuic ta hei puatkat kat khang khatni Ravguangc khang khaeng khang suanglou tuang e. Mi zaeng rui aniu tuang Tingkuc hei ni khaengna kat khang kage nai e. 4 Kamei kandih khou bam khwan e thei, kamei amuh sw ni tu hamh e. Kalam thu Riakdanv thei layna taanc bammei amuc nunc nai de. 5 Kaniw sw bammei hei tingkauh thangc tuang maengc e. Kalam thu Mousi kamei Pheykai katingh thau ni khou tei, "Nang khou chyng but khou lyanlou kanmei kahak tei kumcna taanc o," twna salou khwan e. 6 Tiki ntaw thu, kaniw tuang khang suangc gay ranvmei amuh taanv Jisu khou tiilou the. Kamei rui Ravguangc lev kamei nunc kak khou chaguat swloumei latdyng hei ni gay ranvmei e. Kalam thu mi khou hei gay ranvmei laatow nimei tuang latryan nai the.
7 Reymei latdyng tei nthuih khwan e thei, kaneimei latdyng kage nai dat lak ni tuang e. 8 Ravguangc rui kaniw tuang khuay kalauh patna sa e:
"Israelmei nunc khatni Judamei nunc lev
ai latryan thanh sw dat puni twna Poubauhmei rui sa e.
9 Mi tei ai rui kaniw baanc zayna
Ijipt khou rui nduangh pat khou,
kaniw pupouc nunc khou swlou kanmei latryan tei lev nchamc ni tu hamh e.
Ai rui kaniw khou swlou kanmei latdyng tei kaniw ngaek mak khe;
mi zaeng rui ai kaniw ta ganclou the.
10 Ai rui Israelmei nunc khou swlou nimei latryan kiu mi hei e twna
Poubauhmei rui mi sa e:
Ai rui atuang kariak latdanv guay
kaniw lungning khou lou puni
khatni kaniw lungthw khou hylou puni.
Ai rui kaniw Racguangc sw puni,
khatni kaniw amei nunc sw puni.
11 Kaniw makaemv khat khat ta
kaniw chana khat khat ta,
'Poubauhmei ta thay o,'
twna ni ncham dat ni tu hamh the.
Kalam thu nthyammei khou rui daihmei nganv,
meic guayna ata thay puni.
12 Ai rui kaniw simei taanv guay kuaklou puni,
kumna kaniw paap ningtow dat lak khe."
13 Mi kumna latdyng thanh lam khou samei hei rui kamei rui reymei latdyng ta tei karaan tiswlou the. Karaan tei thu maan kan ni the.