7
Amuh Melkhizedek
1 Mi Melkhizedek hei Salemmei guangc khatni Kauh Liangmei Racguangc tuang amuc e. Abraham guangh padeih ta rihngamlouna guang dat pwkhou, Melkhizedek rui kata riuna suaihiamlou khwan e. 2 Khoutei Abraham rui kamei phungc guangmei guayna tuang kadam ruh tuang akhat kakhang tii khwan e. (Kazanc kabac thu reymei khou "Ravchaptatmei Guangc" tw tuang e, kaneimei kabac rui kamei Salemmei guangc twmei thu "Chuzaenghmei Guangc" tw tuang e.) 3 Melkhizedek hei, kapui kapu, kapu kapouc riang, khatni kamei puanhmei, theihmei lam khou hyloumei tuang maekmeipu, Ravguangc Nac Mpouh kumcna tingsaengzaeng amuh sw bammeipu e.
4 Zauc lo, kamei adih daic kan tu cho?! Aniu pu pouc Abraham rui kamei rui rih khou rui laa guangmei tuang kadam ruh tuang akhat kakhang tii khwan e. 5 Kumna Levi kikta amuc nunc ta tei, kaniw chana nunc, Abraham kikta nunc khou rui kadam ruh tuang akhat laa o twna Riakdanv khou kaniw khang latdanv tii khwan e. 6 Melkhizedek hei Levi kikta hamh e, tiki Ravguangc rui kalatryan tiiloumeipu Abraham khou rui kadam ruh tuang akhat tei laa khwan e, kumna kata suaihiamlou khwan e. 7 Suaihiamloumei hei thu daihmei rui nthyammei khang suaihiamlou tuang de twmei hei mathiuc rui nuhpui lat e. 8 Ntaw ruh dam laa bammei Levimei nunc hei thu theic kan nimei nunc de, tiki Abraham khou laamei tei thu nthanmei latrik rui samei kumcna ringc bammeipu e. 9 Abraham rui kadam ruh tuang tikhou tei, kadam ruh tuang laamei Levi hei ni lay kazauh muai the. 10 Kalam thu mi ganv khou tei kamei Abraham pumc khou nai bam the twna sa nuh the.
11 Levimei nunc taanv hei rui nthuih the tw e thei, Aaron khou rui hamhmei, amuhlang baihmei Melkhizedek amuclang khou rui amuh kaza baihmei guang dat khang kage maek kan ni tuang the. Levimei rui amuh sw bammei bangc khou Israelmei khang Riakdanv hei tiilou tuang e. 12 Kumna amuhlang kalaihmei thei layna Riakdanv ni kalaic khang kage nai e. 13 Ntaw aniu sa bammei amuc hei kaikhwang baihmei de, kumna kakai kaikhwangmei gaanv khat na sini amuh sw zat kan mak e. 14 Aniu Poubauhmei hei Juda kaikhwang khou puanclou e, kumna Mousi rui amuh lam khou sapui ganv khou mi kaikhwang ta hei sa kahi tow mak e.
Melkhizedek Kumhmei Baihmei Amuc
15 Aniu rui sa bammei hei nthan thiakna how the—Melkhizedek kumhmei amuc baihmei gaanv khat guang the. 16 Kamei amuh swmei hei kamei zanhpumc tuang kaikhwang suicna kariak thei layna sw tuang hamh e; tiki nganvmei nai dat makna ringhmei pumtan paan rui e. 17 Kalam thu, "Melkhizedek tuang amuclang khou, nang hei tingsaengzaeng amuh sw puni," twna nthanmei latrik rui sa e. 18 Kalam thu karaanmei latdanv tei pumtan maekpui zaeng rui gaeng mak khena lou key the. 19 Kalam thu Mousi tuang Riakdanv rui nthuihmei tiguanglou ngam mak khe. Ntaw thu aniu Ravguangc daeng guang tuanc nuh khang gay ranvmei rigwnmei tiilou the.
20 Mi ruc khou rui, Ravguangc latryan ni mi khou hei nai the. Baihmei guay ta amuh suangloumei hei latryan swlouna suanglou tuang hamh e. 21 Tiki Jisu ta amuh suangloumei thu latryan kazauhna suanglou tuang de. Mi hei sa e,
" 'Nang tingsaengzaeng amuh sw puni,'
twna Poubauhmei rui latryan sw kan the,
kamei mi hei kalaic dat lak khe."
22 Mi zaeng rui Jisu hei gay ranvmei latryan tuang sungpouc sw the.
23 Mi amuclang kanei khou hei, reymei khou tei amuh mpeyna nai e, kalam thu theihmei rui kaniw ta amuh tisw suangc ngam mak e. 24 Tiki Jisu hei thu theic dat mak khe; tingsaengzaeng amuc di the. 25 Mi zaeng rui ntaw ni nniauc ni kapaan rui Ravguangc khou guangmei kamv ta kamei rui gulou ngam e. Kalam thu kamei hei kaniw khang huaychalou khang theic dat makna ringc bam e.
26 Kalam thu aniu khang mi kumhmei nthuihmei Tingkuc nai the. Kamei hei nthanmei, khuay maekmei, sw-mphuam makmei, paapcmei pang khou rui tarangmei tingkauh khou tidaicloumeipu e. 27 Kamei hei Tingkuh baihmei nunc lev nchamc mak e; tingmik pum kapaap khang khaeng rey lana meicnunc paap khang khaeng bammei tei kumcna sw khang kage maek e. Kamei kapumc kahak ta meicnunc paap khang tingsaengzaeng khang luan guayna khaenglou kan the. 28 Riakdanv rui nthuih makmei maansei ta Tingkuh suanglou e; tiki Riakdanv tangv guangmei syangdyng swloumei latryan rui tingsaengzaeng khang ti-nthuihloumei Ka Nac Mpouh ta suanglou e.