6
1 Mi zaeng rui Khrista tuang kabangbi latdyn guay tei ganclouna meicphamei panty latdyn khou gut di kho. Theihmei taanv guay khou rui lunghlaicna Ravguangc khou lwmloumei tuang, 2 duilupmeia khatni baanh boucloumei tuang, ringcthau datmei tuang khatni tingsaengzaeng latzan tuang latdyn guay tei na kathai hanc dat datna bam ri di kho. 3 Ravguangc rui nuhlou e thei aniu hu thangc tat gut khang sw ni the.
4 Kalam thu tigaanclou tangv kanmei, tingkauh tuang kaipat mbap tangv kanmei, Bumaengh Nthanmei laatow kazauh kanmei, 5 khatni Ravguangc lat ramgai khatni guang nimei zuk tuang pumtan mbap tangv kanmei kaniw rui, 6 lwmmei mpatlou dat kan e thei, kaniw ta tilunghlaic guang dat khang kachaeng maek khe. Kalam thu kaniw rui Ravguangc Nac Mpouh ta theihchouc khou thaengc luai kaluaih datna, kata meic guay hu khou sw zak lou dat e.
7 Kakhou katupna riu keyloumei ting tei rimlou lana kai lau taanhmei nunc khang phunling phunlu nthailouna bammei kandic tei Ravguangc suaihiam laatow e. 8 Tiki mi tei sauh raengh rana thau pat bam e thei, syang keylou khang kaganv na the. Mi tei mai ntei maan puni.
9 Nzianmei thiu, aniw mi kumcna sa bam sini, nangniw khang thu lwmsi tuang maek khe; nangniw khang ringhbamv nai the twmei aniw thay the. 10 Ravguangc thu nchumhmeipu de. Nangniw tuang taanv khatni Khristamei makaemv ta kazanc khou rui nangniw rui nkhavlou bammei nangniw ramzian hei kamei amuclou ni tu hamh e. 11 Nangniw tuang rigwnmei tei guang tangh khang, mi kumna nangniw tuang lunghgutmei hei katwan nganv nangniw kathuic khou nai bam khang aniw kahaw e. 12 Lwmna khatni khaengvthayna Ravguangc rui nrianhloumei laa kanmei nunc tei kumcna nangniw aliauh key makna, lunghmei ta aniw kahaw e.
Suai Makmei Ravguangc Latryan
13 Ravguangc rui Abraham khou latryan swlou khou, kakhang suangc daihmei nai dat tii makpui zaeng rui karana kazanc saancna, 14 "Ai rui nang ta suaihiamlou puni, kumna nang kikta tikingc nkiuclou puni," twna latryan swlou khwan e. 15 Abraham tei khaengvthayna nkhwan pui paan rui, mi latryan tei laatow kan the. 16 Meic nunc rui latryan swpui ganv khou kakhang suangc daihmei zanc saancna latryan sw e. Kumna, mi kumna syangdyng swna samei hei rui latlu tei luailou e. 17 Ravguangc rui katuang latryan tei kalaic dat ni tu hamh the twmei kamei rui nrianhloumei tei laa nimei nunc khou nthanna tithaylou nii lapui zaeng rui, katuang latryan tei syangdyng kazauhna swlou tuang e. 18 Kalat kalaic makmei khatni saraemh makmei Racguangc rui syangdyng swna swloumei latryan hei naipui zaeng rui, kakhou duploumei aniu hei aniu hu khou nai bammei latryan tei laa khang lwmgayna sin ntip bam khang katiu e. 19 Mi rigwnmei hei aniu bumaengc khang kalingmei ntipmei runghbanghchei the, kumna tingkauh ravkai khou khamthinghphey lungc khou gutna kalungc liangmei ravbamv khou tei gut the. 20 Mi khou tei Jisu chaeng humei swna aniu khang gut kan the, kumna Melkhizedek tuang amuc laeng khou b kamei tingsaengzaeng Tingkuh sw kan the.