10
1 Jihudimei tuang Riakdanv hei guang punimei kalingmei tuang maengc tei e; kalingmei thu hamh e. Mi zaeng rui kanganv maekna tingkwm pum khaeng kaluaih kaluaih bammei tei rui Ravguangc daeng khou guangmei nunc ta tei ti-nthuihlou ngam mak e. 2 Ravguangc ta kalum bammei nunc ta tei khaenglou guaimei rui sw-nthanlou khwan e thei, kaniw khou paapc nai e twmei kaniw ning dat bam lak ni tuang e, kumna khaeng kaluaih dat dat bam lak ni tuang e. 3 Tiki tingkwm pum khaeng bammei hei rui kaniw paap nai bam e twmei tiningtow bam e. 4 Kalam thu guaichic khatni ziuchic zei rui paapc laa ganclou ngam mak e.
5 Mi zaeng rui Khrista kamei mbaanv khou guang ni khou, kamei rui sa e:
"Puatkat katmei khatni khaengmei ta nang kahaw mak e,
tiki nang rui akhang meic pumc tiilou the.
6 Kiruai kapumc kapwm nteina khaengmei khatni
paapc khang khaeng bammei guay tei rui nang ta tipian ngam mak e.
7 Kum thena ai rui sa e,
'Zauclo, Riakdanv zy khou
alam khou hylou bammei tei kumcna,
nang ningmei taanclou khang ai guang the.' "
8 Mi guay hei Riakdanv thei layna kat bam tuang khwan sini, "Khaengmei khatni katmei, mai nteina katmei khatni paapc khang katmei, mi guay hei nang kahaw mak e, khatni mi tei rui nang ta tipian ngam mak e," twna reymei khou tei sa kan the. 9 Kumna, "Zauc lo, nang ningmei taanclou khang ai guang the," twna kamei rui sa the. Kumna kamei rui karaanmei khaengmei riak guay tei ganc lana Khrista ta khaengloumei rui mi guay phaan tei lynlou the. 10 Ravguangc rui ningmei tei Jisu Khrista rui taanclouna, luan guayna kapumc kahak paapc khang khaengloumei tei rui aniu ta paapc khou rui sw nthanlou the.
11 Amuh guay tei kaniw thouc taancna, dingna tingmik pum kaza akhat na kaluaih phikna, paapc kuaklou ngam lakmei ramkhaeng tei khaeng bam e. 12 Tiki Khrista thu tingsaengzaeng khang paapc khang khaenglou guay tangv lana Ravguangc baanzat thangc dungc key kan the. 13 Kumna katuang zauczihmei ta kaphaypav bangc khou tini binlou mak saanv kamei mi khou tei nkhwan bam e. 14 Kalam thu sw nthanlou kanmei nunc ta tei, khaenglou guaimei tei rui tingsaengzaeng khang sw nthuihlou the.
15 Bumaengh Nthanmei rui ni aniu khou sa e:
16 "Thei thangc ai rui kaniw khou swlou nimei latryan kiu mi hei e,
twna Poubauhmei rui sa e:
Ai rui atuang latdanv guay
kaniw lungc khou lou puni,
khatni kaniw lungning khou hylou puni."
17 "Kaniw paap guay khatni
kaniw tuang simei taanv guay
ai ningtow dat lak khe."
twna kamei rui sa e. 18 Kumna mi guay hei kuaklou kan thena, paapc kuaklou khang khaeng dat bam khang kage maek khe.
Aniu Ravguangc Daeng Tuanc Guang Di kho
19 Mi zaeng rui, chana thiu, aniu Nthan Liangmei Bamv khou gut khang Jisu zei paan rui khamv namv tuang nai dat mak khe. 20 Kamei rui aniu khang chaeng thanh, ringhmei chaeng laanclou the—kapumc kahak rui khamthinghphey tei laanclou the. 21 Ravguangc kai khou aniu khang taanv sw bammei amuh daihmei nai the. 22 Mi zaeng rui, paapc nai e twna khoukhaekna bammei lungning tei kazinh nthanlouna khatni aniu pumc nthanmei dui rui low nthan lana, lungning nthanna khatni lwm tiph tipna aniu Ravguangc daeng khou guang di kho. 23 Aniu pat pat gut gut tuang sw makna, aniw rigwnmei tei ntipna sin di kho. Kalam thu latryan swloumeipu hei lwmnuhmeipu e. 24 Nzian thay khang khatni gaytaanv taanc thay khang khat khat ta akumhna katiu thau kho cho twmei kakhanh kho. 25 Meic gaanv saekc kaniw chav sw bammei tei kumcna, aniu guang kariumei khou ntaemv ri kho. Poubauhmei tuang Tingmik na guang the twmei nangniw howpui thei layna aniu khat khat ta katiu thau mbu hay hay bam di kho.
26 Kalam thu nchumhmei thay tang lana aniu thayna thayna paapc taanc bam e thei, aniu paap khaeng kuak dat khang ramh baihmei maek khe. 27 Mi kumhmei nunc tei thu guang nimei latzan khatni Ravguangc ta nuh makmei nunc ta swmaan nimei mai ta tei pingna nkhwan bam khang na di the. 28 Mousi tuang Riakdanv twanlyampui mei ta tei thu, gaanv nei gaanv thumh mwang khou rui mi tei kiuc di the twmei nthan e thei, zauzian nai dat makna swluai tu di the. 29 Kum e thei, Ravguangc Nac Mpouh ta ni binpui mei, kata sw-nthanloumei latryan tuang zei ta ramh sak makna swpui mei, zauzian tuang Bumaengc ta sw zakpui mei ta tei thu akumh puni thah? Karuc khou keylou nimei mat adih nthuk puni cho kakhanh zauc o. 30 "Ai rui khwm khangc puni, ai rui lauguat khangc puni," twna khatni, "Poubauhmei rui kamei nunc ta latzan sw puni," twna samei hei thow cho twmei aniu thay e. 31 Ringhmei Racguangc baanc khou keyloumei hei meic pingpui tuang e.
32 Nangniw tuang tat kanmei ganv tei makumh zauc o. Nangniw ta tigaancloumei tangv tei nangniw ryanramei mpeyna ariw khwan sini ding ngamna ding khwan e. 33 Kaluan luan nangniw ta charuangc khou sakasicna sw zak lou khwan e khatni swkasicna swlou khwan e. Nangniw kaluan luan mi kumna swloumei nunc tei lev khaengv nchamc khwan e. 34 Nangniw kangkai khou bammei nunc lev ryanramei phungc nchamc khwan e, khatni nangniw tuang guay asut ngam kan tisini, maan dat lakmei gay ranvmei nangniw khang nai de twmei thayna nangniw neihlana khaengvlou khwan e. 35 Mi zaeng rui, nangniw lwmmei tei ganc dat ri tho; mi khang tei swan daicna nai the. 36 Ravguangc rui ningmei taanh khang khatni kamei rui nrianhloumei tei laa khang nangniw khaengvthay khang kage nai e. 37 Nthanmei latrik rui sa e:
"Guang nimeipu tei asaanh mak khou guang puni;
kamei nyan ni tu hamh e.
38 Atuang ravchaptatmei nunc tei lwmmei paan rui ringc puni,
tiki thei hanc kanpui mei ta tei ai karuc khou pianlou ni tu hamh e."
39 Tiki aniu thu thei hancna maan kanmei nunc tei hamh e; lwmna ringhmei nunc tei de.