4
1 Ravguangc kamei rui sa bammei zaengthaek tei tiilou nimei tuang latryan aniu khang ntaw nai bam khou hei, aniu ta mi tei laa biuh makmei nunc the twlou pw ramc e twna pingthay kho. 2 Kaniw kumcna aniu ni gaychamv hei chu the. Kaniw lat tei chu the; tiki mi tei rui kaniw khang gaeng tuang maek khe. Kalam thu kaniw mi tei lwmna laalou mak khe. 3 Kumna lwmmei aniu mi zaengthaek tei laa puni. Kalam thu, "Kaniw ta atuang zaengthaek khou tigut lak e twna alung puamcna ai sa kan the," twna Ravguangc rui sa the. Mbaanv damclou rap khou rui mi tei chamdaanv luailou khwan sini, kamei rui mi tei sa kan the. 4 Kalam thu, "Ravguangc zaeng chaneimei nungc kataanv guay nthaekc the," twna Nthanmei Latrik kabamv akhat khou zaeng chaneimei tingmik lam khou hylouna nai e. 5 Kumna, "Kaniw ta atuang zaengthaek khou tigut lak e," twna ni mi bamv khou hei kamei rui salou the. 6 Gaychamv chu reymei nunc tei kaniw lwm makpui zaeng rui mi zaengthaek tei laatow kan mak khe. Kum tina mi zaengthaek tei laa nimei baihmei gaanv saekc nai e. 7 Mi kiu thu Ravguangc rui "aseic" twna kawmei tingmik baihmei akhat kak patlou dat bammei hei rui lyan e. Mi kiu thu sa tow rey kanmei,
"Nangniw aseic Ravguangc khwan chu e thei,
nangniw lungc taanc rio,"
twmei hei tingkwm mpeyna tangv kamei rui David ta ni tisa dat e. 8 Mi zaengthaek tei Joshua rui tiilou khwan e thei, katangv thangc Ravguangc rui baihmei zaengthaek lam khou sa dat bam lak ni tuang e. 9 Mi zaeng rui Ravguangc zaeng chaneimei nungc nthaekcmei zaengthaek tei Ravguangc mei nunc khang nai bam e. 10 Zaeng chanei nungc Ravguangc kataanv nthaekcmei kumcna, Ravguangc zaengthaek khou gutmei guay, kaniw taanv khou rui nthaekc puni. 11 Mi zaeng rui, latliampui zaeng rui laatow makna taan kanmei nunc tei kumh makna, mi zaengthaek khou tei aniu gut khang ngammei kasang karamc kho.
12 Ravguangc lat hei thu ringhmei, kapumtan naimei lat e. Mi hei kamun kaneimei baengsaeng suangc ntuk e—du lev bumaengh khatni meicrou meicbing nganv biw tangc e. Mi hei maansei lungc khou naimei chwn khatni lungning nganv thay tangc e. 13 Ravguangc hu khou ramh khat na sini nkamh ngam mak e. Damcloumei katana hei kahu khou how ndauh daek tuang de. Kakhou aniu taanv chakh guang ndaw puni.
Jisu hei Tingkuh Daihmei e
14 Ravguangc hu khou guang bam kanmei Ravguangc Nac Mpouh Jisu hei aniu tuang Tingkuc swna bampui zaeng rui, aniu rui kauc patlou kanmei lwmmei phaydyng hei ntipna ding di kho. 15 Aniu tuang Tingkuc hei aniu ramsuan ta zauclou thay makmeipu hamh e. Kamei hei aniu kumcna kalam katana khou nthiammei ariw kanmeipu e; tiki kamei thu paapc khou keylou kan mak e. 16 Kum thena, aniu khang kage naipui ganv khou nzianlouna nkhavlou khang, lwmsi datpui tuang maekna zauzian tuang guanghbamvpaeng daeng khou guang di kho.