3
Jisu hei Mousi Suangc Daic e
1 Ravguangc rui kawloumei khou kazauhmei nthanmei chana thiu! Aniu laaloumei lwmriak tuang latdiutatmei khatni Tingkuh Jisu ta kakhanh o. 2 Mousi hei kakhou tiiloumei taanv tei lwmnuhmei swna Ravguangc kai khou taanc kanmei kumcna, Jisu ni mi kakhou tiiloumei taanv hei Ravguangc khang lwmnuhmei swna taanclou kan the. 3 Kai kasiamhloumeipu ta tei kai ta suangc chakhwang swmei kumcna, Jisu ta hei Mousi ta suangc mbuna chakhwang sw nipui thouc e. 4 Kai kathuic hei meic gaanv khat rui kasiamhlou tuang e. Mi tei kumcna Ravguangc hei ramh guayna kasiamhloumeipu e. 5 Mousi hei Ravguangc kaikhunc kapwm khou lwmnuhmei tamthiwmei swna, thei thangc Ravguangc rui sa nimei tei sameipu e. 6 Tiki Khrista thu Ka Nac Mpouh swna Ravguangc kaikhunc tampypouc e. Aniu rui rigwnmei khou tei tangkhyn makna ntipna bam e thei, aniu hei Ravguangc kaikhunc mei e.
Ravguangc Meic nunc khang Naimei Zaengthaek
7 Mi zaeng rui, Bumaengh Nthanmei rui sa e:
"Nangniw aseic Ravguangc khwan chu e thei,
8 nangniw pupouc nunc Ravguangc lat liamna,
kaniw rui tazikramv khou Ravguangc ta nchanv kanmei tei kumcna,
nangniw sw riu.
9 Kaniw tingkwm riakdei ataanv how khwan sini,
mi khou tei kaniw ata nchanv the.
10 Mi zaeng rui 'Kaniw athei lay nii mak khe
khatni alat piu zat mak khe,'
twna kaniw ta lunghpuamcna ai sa kan the.
11 'Ai rui kaniw ta zaeng timalalou nimei kandic khou tei,
kaniw ta tigut lak khe!'
twna alung puamcna kalaic dat lakpui lat sa kan the."
12 Chana thiu, nangniw thowkumhmei khou simei khatni lwm makmei lung naina, mi tei rui nangniw ta ringhmei Racguangc khou rui sw ntamvlou mak khang kasiaththay o. 13 Paapc tuang guatmei rui nangniw lungc titaanc mak khang, "Aseic" twna kawmei ganv hei nai bam khou, nangniw tingmik kathuic khat khat ta katiu karyna bam o. 14 Kalam thu thaurey khou aniu lwmloumei tei katwan nganv lwm ntip bam e thei, aniu hei Khrista khou kazauhmei nunc e.
15 "Nangniw aseic Ravguangc khwan chu e thei,
nangniw pupouc nunc rui latliamna sw kanmei tei kumcna,
nangniw lungc taanc rio."
twna hylouna nai e.
16 Ravguangc lat chu lana liammei nunc kiu thow tei cho? Mousi thei Ijipt khou rui tat patmei nunc tei hamh nah cho? 17 Kaniw ruc khou tingkwm riakdei Ravguangc lunghpuamc guang kanmei nunc kiu thow tei cho? Paapc taancna tazikramv khou theic kanmei nunc tei hamh nah cho? 18 "Kaniw ta zaeng timalalou nimei kandic khou tei kaniw ta tigut ni tu hamh the," twna Ravguangc rui samei kiu thow ta cho? Latliammei nunc ta tei hamh nah cho? 19 Kumna kaniw lwm makmei zaeng rui mi kandic khou tei kaniw gut ngam kan mak khe twmei aniu how the.