2
Heidi Daihmei Ringcbamv
1 Mi zaeng rui, aniu ta nzuan maanlou pw ramc e twna, aniu chu kanmei nchumhmei lat tei sin ntip ranv bam nina the. 2 Kauh baanchara guay rui phungc guangmei lat tei kalingmei e, kumna mi tei twanlyammei, hamh e thei piu makpui mei ruc khou tei kakhuay thei layna dandi keylou e thei, 3 aniu hei di daihmei guloumei chaeng ta hei ntaemv lana akumhna duak ngam nina cho? Mi guloumei chamv hei reymei khou Poubauhmei rui kauc ndauhlou the, kumna mi tei kakhou rui chumei guay rui nchumhmei the twmei nchinlou the. 4 Ravguangc rui ni charynmei sw nchinmei taanv kaza mpeyna lyanlouna, khatni kamei rui ningmei thei layna Bumaengh Nthanmei tuang kaipat nzanhlouna kaniw lat hei nchumhmei e twmei lyanlou the.
Ringhbamv khou Zayloumei
5 Aniu rui sa bammei guang nimei kandih kathanc tuang kaipouc sw khang Ravguangc rui kauh baanchara nunc ta lou mak e. 6 Nthanmei latrik khou mi kumna hylou e:
"He Ravguangc,
nang rui ningtow bammei meic nac mpouh hei;
kakhang nang rui kadanlou bammei maansei hei akumhpui mei cho?
7 Nang rui kata matak khat khang kauh baanchara guay suangc tinalou the;
nang rui kakhou hymdaihmei khatni chakhwang pyrun runlou the,a
8 kumna ramh guayna ruc khou kata kaipouc tiswlou the."
Ravguangc rui maansei ta "ramh guayna tuang kaipouc tiswlou the," twna samei khou hei kabangc khou lou makmei ramh khat na sini maek khe. Tiki maansei rui ramh guayna ruc khou kaipouc sw bammei ta aniu ntaw how mak he. 9 Tiki Ravguangc zauzian paan rui, kamei meic katana khang theiclou khang, matak khat kauh baanchara guay suangc na keyloumeipu, kamei theicloumei paan rui hymdaihmei khatni chakhwang kakhou tiiloumeipu Jisu ta aniu how the.
10 Nah mpouh mpeyna ta hymdaihmei khou phungc guanglou khang ringhbamv kaipouc Jisu kamei ryanra khaengvpui paan rui kadwan ti-nthuihloumei hei ramh katana damcloumei khatni tinailou bammei Racguangc tuang nchumhmei taanv e.
11 Sw nthanloumeipu kamei khatni kamei rui sw nthanloumei nunc hei pu akhat na nac nunc di the. Mi zaeng rui kamei rui kaniw ta chana kaw khang zak dat mak khe. 12 Mi zaeng rui,
"Ai rui nang zanc achana nunc khou kauc ndauh puni;
kaniw guang kariupui bamv khou,
ai nang ta thuanc puni,"
twna kamei rui Ravguangc khou sa e. 13 Kamei rui, "Ai Ravguangc khou ngangvlou ni," twna ni sa e. Kumna, "Ravguangc rui akhou tiiloumei nac nunc, ai lev mi khou hei bamv e," twna ni kamei rui sa e.
14 Kamei rui alauc nunc twna sa bammei nunc hei zei lev zanh rui swmei maansei nunc e. Jisu kamei kahak mi nunc mi kumhmei swna maansei lwnlung lay laa the. Mi hei kamei theicloupui paan rui, theihmei pumtan naimei Ravsic ta swmaanlouna, 15 ringhting saanv saengh, theih khang pingmei rui bangh kumcna bammei nunc ta tiduaklou khang e. 16 Kalam thu kamei rui nkhavloumei hei kauh baanchara nunc ta hamh e; tiki nthanmei latrik rui, "Kamei Abraham kikta guay ta nkhavlou e," twmei hei kachangcpui lat e.
17 Mi kiu thu, kamei Ravguangc siamruai taanv khou lwmnuhmei khatni nzianthaymei Tingkuc swna meicnunc paap guay sw nthanlou khang, kalam katana khou kamei kachana guay lev nchamc nipui thouc tina e. 18 Mi kumna kamei ni nthiammei khatni ryanramei ariw laa thena, nthiammei akhangv bammei nunc ta kamei nkhavlou ngam e.