Ibrimei 1

Ibrimei

KHOU HYMEI TATDYN

Kanac Mpouh Paan rui Saloumei

¹ Reydouc tei thu Ravguangc rui kathak baih baihmei mpeyna khou, aniu pupouc nunc khou, muhzwng nunc ta tisalou khwan e; ² tiki mi nkhamhmei ganv khou hei thu, aniu khou, Kanac Mpouh ta tisalou the. Mi Nac Mpouh hei, Ravguangc rui kapaan rui mbaanv damhmeipu, khatni nkhamh khou Ravguangc rui ramh katana kakhou tiilou nimeipu e. ³ Ravguangc tuang hymdaihmei kakhou nai e khatni kamei hei Ravguangc kahak e; ngammei kalat paan rui mbaanv hei nai bam tuang e. Kamei maansei paap guay sw-nthanloumei taanv taanc luailou lana, tingkauh thangc Ravguangc baanzat khou dungc keyna, kauh liangmei ngamv laa kan the.

Kanac Mpouh hei Kauh Baanchara nunc Suangc Daic e

⁴ Ravguangc rui Kanac Mpouh khang, kauh baanchara nunc khang tiiloumei zanc suangc daic taph tapmei zanc tiiloumei kumcna, kata kauh baanchara nunc suangc daic taph tapmei tiswlou the. ⁵ Kalam thu,

"Nang hei anac mpouh e,

aseic thu ai hei nang pu di the,"

twna tabui kumhmei kauh baanchara khou Ravguangc rui salou kanmei tuang naina cho? Khatni

"Ai kapu sw puni,

kamei anac mpouh sw puni,"

twna ni tabui kumhmei kauc baanchara khou salou kanmei tuang naina cho? ⁶ Tiki Ravguangc rui kanac nareimei mpouh ta mbaanv khou ndiu guang khou,

"Ravguangc baanchara guayna rui

kata kalum kan diu,"

twna kamei rui sa kan e.

⁷ "Ravguangc rui kabaanchara guay ta mpwan,

katuang siamruaimei guay ta maibwang tiswlou the,"

twna kauh baanchara guay lam khou Ravguangc kamei rui sa e. ⁸ Tiki Ravguangc rui Ka Nac Mpouh lam khou thu sa e:

"He Ravguangc, nang guangcdic hei

tingsaengzaeng nai bam puni!

Nang rui nang mei nunc ruc khou

nchumhna dihsin puni.

⁹ Nang nchumhmei ta kahaw e;

nkhuaimei ta karaeng e.

Mi zaeng rui nang Racguangc rui

nang ta kadahlou the,

kumna nang pam pang khou rui,

nang khou neihlamei tuang chakhwang tiilou the." ¹⁰ Kamei rui mi kumna ni sa e:

"He Poubauhmei, nang rui

puakthau puaksiak khou rui,

mbaanv damclou the,

kumna tingpuk hei nang tuang baansyam e.

¹¹ Mi guay hei thu maan kan ni de,

mi guay hei phey kumc karaan key kan ni de,

tiki nang thu kachac makna bam puni.

¹² Mi tei nang rui pheybaan ganh kumc ganc kan puni,

khatni pheybaan kalaic kumc kalaic kan puni;

tiki nang thu kalaic lak e,

nang panty nganvmei nai lak e."

¹³ "Nang ta zauczihmei ta

nang phaypav bangc khou tini binlou mak saanv,

nang atuang baanzat khou bam o,"

twna kauh baanchara gaanv khat na khou sini sa kan mak e.

¹⁴ Kumna mi kauh baanchara guay hei thu, Ravguangc siamruaimei, guloumei laa nimei nunc ta nkhav khang ndiuloumei bumaengc nunc hamhna cho?