Philemon
KHOU Paul RUI HYMEI TATDYN
1
Chaengriw Lat
1 Khrista Jisu khang kang bammei Paul khatni aniu chana Timothi rui—
Aniw nzianmei taanv taanc nchamcmei Philemon, 2 aniu tanpui Apphia, aniu rihmei sw nchamcmei Arkhippas, khatni nang kai khou kariu bammei phwamling khang hymei:
3 Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu o.
Philemon Ramzian khatni Karamlwm
4 Ai huayneymei kathuic nang ta ningtowna, ai aRacguangc ta thuancku bam e. 5 Kalam thu nang rui Ravguangc mei guay ta nzianmei ramzian khatni Poubauhmei Jisu khou lwmmei ramlum tei ai chu the. 6 Khrista khou lwmmei khou nang ni aniw lev kadam laa nchamcmei paan rui Khrista khou bammei aniu khang naimei suaihiam guay tei thay diangh khang ai huayney bam e. 7 Achana le, nang ramzian tei rui ata mpeyna tineihlalou e khatni katiulou e. Nang rui Ravguangc mei guay ta tichaenghringclou e.
Philemon khou Zaenghuaymei
8 Mi zaeng rui, nang rui sw nimei tei mi kumcna sw o twna Khrista khou nang chana akhat swna latdanv tii nuh de; 9 tiki ai nang ta nzianpui zaeng rui, gaanvdaih khatni ntaw Khrista Jisu khang kangkai khou bammei Paul ai rui nang khou huaycha e. 10 Kangkai khou rui anac swmei Onesimas lam khou ai nang khou huaycha e. 11 Kahunungc nang khang gaeng makmei mei sw bam khwanmei kamei hei ntaw thu nang khang ni akhang ni gaengmei mei di the.
12 Nzianmei kazauhna, kata ai rui nang khou ndiu guang dat tuang the. 13 Ai gaychamv khang kang bam bam khou hei, kamei rui nang phaan asiamruai sw bam khang ai kata adaeng khou tibam nii e; 14 tiki ai nang chwn thay makna mi tei sw nii mak e. Nang rui taanclou niina taancloumei hamhna, nang chwn hamhmei khou ti-nthanlou nii mak e.
15 Kamei nang daeng khou tingsaengzaeng bam dat khang, kamei nang khou rui matak khat tat pat tu khuangh the. 16 Ntaw thu kamei bangh na hamh the; bangh khang suangc mbuna, akhang ni, nang khang ni, pumh khou ni, Khrista khou ni nzianmei chana di the.
17 Nang rui ata nang lev taanv taanc kariumei twna ning e thei, ata laalou tu kumcna kata laalou o. 18 Kamei rui nang khou nkhuaimei swlou tuang nai e thei, hamh e thei tabui pwni kamei rui laalou tuang nai e thei, mi tei akhou chaklou tho. 19 Mi hei ai rui abaanc kahak rui hy tuang e: Paul, ai rui khangclou puni. Nang kahak hei akhou pow phunghmei e twmei hei sa nii makna sa tuang e. 20 Mi zaeng rui, achana le, Poubauhmei khou nang mi hei akhang taanclou o—ata tineihlalou o. 21 Ai rui samei nang piulou puni twmei lwmna, ai rui samei suangc sini mbuna taanclou puni twmei thayna ai mi hei hy tuang e.
22 Akhang bangv bamv chamdaanvlou o; nangniw rui huayneymei Ravguangc rui dawlouna, ata nangniw khang tiilou dat khang lwmgayna e.
23 Khrista Jisu khang ai lev kangkai khou bam nchamcmei Epaphras rui nangniw khang dwangay kady e. 24 Ai lev taanv sw nchamcmei Mark, Aristarkhas, Demas, khatni Luk rui ni dwangay kady e.
25 Poubauhmei Jisu Khrista zauzian nangniw khou nai diu!