2
Riakdyn Kalingmei
1 Tiki nang thu, riakdyn kalingmei tei dinc nina e. 2 Gaanvthaih guay tei mba nlau mak khang, kachangc siph sip thay khang, kapumc sinriap thay khang; lwmmei khou, nzianmei khou khatni kadyng ntipmei khou kalingmei phaydyng ding ngam khang nchamlou o. 3 Mi tei kumcna ntumei gaanvdaih guay tei ni, ravningmei pui akhat tuang ziapmei kheiliak khou lungh khang nchamlou o. Kaniw tei meickai ta nrauc tanhmei khatni zouh bangc hamhna, gaymei lat nchamlouna lungc nina e. 4 Kumna puiliauh nunc ta tei kaniw gaanv gaanv khatni kaniw nac nunc ta nzian thay khang, 5 pumh sianriap khang, kheiliak nthanna lungh khang, kaikhunh phungc thay khang, zauzian thay khang khatni kaniw gaanv gaanv bangc khou bam thay khang kaniw rui nchamlou kan diu. Kum pwkhou Ravguangc lat ta meicnunc rui sakasic mak khang e. 6 Mi tei kumcna, chabwan guay ta tei ni kaniw pumc sinriap thay khang katiulou o. 7 Nang rui kalam kathuic khou gaymei kheiliak lungc lyanlou o. Lungning nthanna khatni kachangc siph sipna nchamlou o. 8 Meic rui khiat khang maekmei kalingmei lat tei sa o, kumna aniu ta zauczihmei nunc tei ramh sa kasiclou khang maekna zak kan diu.
9 Bangh guay tei ni kaniw tuang kaipouc guay bangc khou bam chuyna kalam kathuic khou kaniw ta tipianna lungh khang, kaniw kaipouc nunc mwang daw mak khang, 10 kaniw baanc saengh makna, kaniw tuang gaymei khatni lwmnuhmei tei lungc lyanna, kaniw rui taanhmei guay khou aniu ta Guloumeipu Ravguangc tuang latdyn tei tichingkhiuhlou khang nchamlou o.
11 Kalam thu maansei guayna guloumei laa kan khang, Ravguangc rui kazauzian ndauhlou the. 12-13 Aniu tuang daihmei Racguangc khatni Guloumeipu Jisu Khristab tuang hymdaihmei ndauhlou nimei suaihiam Tingmik ta rigwnna bammei dak khou, ravchap tat makmei lwnlung khatni mbaanv tuang kahawmei guay gancna, meic pumc sinriapna, nchumhna, khatni ravningmei panty khou mi mbaanv khou lungh khang, mi zauzian tei rui aniu ta nchamlou the. 14 Aniu khuay guay khou rui gulouna, aniu paap guay khou rui sw-nthanlouna, aniu ta katuang mei nunc tiswlou khang khatni gaymei taanv khang lunghgutna bammei nunc tiswlou khang kamei rui aniu khang kapanty tii patlou the. 2.14: Tat 19.5; Kar 4.20, 7.6, 14.2; Kal 130.8; 1Pi 2.9
15 Mi guay hei dinclou o; ngamv sinna katiulou o khatni luhlou o. Meic gaanv khat na rui sini nang ta mala mak khang sw o.