Tita
KHOU Paul RUI HYMEI TATDYN
1
Chaengriw Lat
1 Ravguangc bangc khatni Jisu Khrista tuang Latdiutatmei Paul rui hymei:
Ai hei, Ravguangc rui kapahloumei nunc ta lwmmei khou zay guang khang khatni kaniw ta Khrista tuang nchumhmei latdyn khou zaylou khang kapahlouna ndiuloupui mei e. 2 Mi nchumhmei latdyn kiu ringcsuangmei tiilounimei khou lwmgaymei lat e. Mi ringcsuangmei hei saraemh makmei Racguangc rui puakthau puaksiak hu thangc rui aniu khang nrianhlouna, 3 kaganv tangc pwkhou mi hei katuang latdyn khou rui ndauh pat the. Mi latdyn tei akhou nsinlou the, kumna aniu ta Guloumeipu Ravguangc latdanv thei layna mi tei ai dinc ndauh the.
4 Lwmmei nchamcmei khou anac ling swmei Tita khang hymei:
Pu Ravguangc khatni aniu ta Guloumeipu Khrista Jisu rui nang khou zauzian khatni chuzaenghmei tiilou pw diu.
Krit khou Taanh khang Tiiloumei Taanv
5 Ai rui nang ta Kriti khou lou duhmei thu, taanc suak makna ganclou kanmei tei taanc nthuihlou khang khatni kaidai kathuic khou phwamling gaandaic nunc suanglou khang e. Ai rui nang khou kadylou kanmei tei kumcna— 6 phwamling gaanthaic sw nimei thu, khuay maekmei; kanow akhat namei;a kanac nunc ni lwmmei, lat piumei khatni meicngam meicliam makmei nina e. 7 Phwamling khou taanvpy sinpui mei tei thu, Ravguangc tuang taanv sinpui mei swpui zaeng rui, kamei khuay maekmei sw nina e: daihlung phungh makmei, lungc puamc taanc makmei, zouh mba makmei, kalungrat si makmei, syan dui agaemv makmei, 8 tiki gin ga laalou thaymei, gaymei ta laa niimei, kapumc ta sinriapmei, nchumhmei, nthanmei, khatni kheiliak chariakh thaymei sw nina e. 9 Meic nunc ta nchumhmei riakdyn nchamlouna katiu thaulou ngam khang khatni nchumhmei riakdyn ta nuh makmei nunc ta akhangv ngam khang, kamei nchumhmei riakdyn ntipna sinpui mei nina e.
10 Kalam thu meicliampui mei, mpangmei lat rui meicnunc ta guatpui mei mpeyna nai e; nkunna gihruamhmei kang tei the. 11 Kaniw mwang tei thingclou nina e. Kaniw hei zak thay makna syan khang na rui kaniw nchamlou lak nimei nchamlouna kaikhunh kapwm ta swkasic bammei nunc e. 12 "Kretmei nunc hei kaganv kathuic saraemhmei nunc e, simei khouringc nunc e, khatni aliauhna tu niimei nunc e," twna kaniw tuang muczwng khat rui hyloumei tei, 13-14 nchumhpui lat the. Mi zaeng rui, Jihudimei tuang luanhpui pary khatni nchumhmei ta laalou makmei nunc tuang latdanv guay khou lunghgut bammei phaan, kaniw lwmmei khou nchumhmei tei lwm khang kaniw ta luh ranvna luhlou o. 15 Nthanmei guay khang thu ramh guayna nthan tu rana de; tiki mphuammei khatni lwm makmei guay khang thu nthanmei akhat na sini maek e. Kalam thu kaniw lungc khatni lungning sw-mphuam ngam the. 16 Kaniw Ravguangc ta thay e twna kaniw mwang rui thu sa e, tiki kaniw taanv rui thu kaniw Ravguangc ta thay mak e twmei ndauh e. Kaniw hei Ravguangc rui karaengmei khatni latliammei, gaymei taanv taanh khang biuh makmei nunc e.