3
Khristian Kheiliak
1 Meic nunc tei dihsinpouc nunc khatni ngamv sinmei nunc bangc khou lat piuna bam khang khatni kalam kathuic khou gaymei taanh khang tiningtowlou o. 2 Meic gaanv khat na ta sini sa kasicna sa mak khang, agay agi mak khang, khatni lunghzaenghna meic guayna ta chakhwang swna lungh khang, kaniw ta nchamlou o. 3 Kalam thu aniu ni kaganv akhat khou mpangna, latliamna, chaeng maanvna, meic pumc rui kahawmei tuang bangc swna, zauczihna khatni ntian nzauna, khatni khat khat ta karaeng zauczihna lungc bam khwan e. 4 Tiki aniu ta Guloumeipu Ravguangc zauzian khatni nzianmei ndauh pat pwkhou, 5 kamei rui aniu ta gulou the. Aniu ta guloumei hei aniu tuang ravchaptatmei taanv paan rui hamh e; kazauzian paan rui de; Bumaengh Nthanmei rui low nthanlouna tipuanc thanhloumei khatni panty thanh tiiloumei paan rui de. 6 Ravguangc rui mi Bumaengh Nthanmei hei aniu ta Guloumeipu Jisu Khrista paan rui aniu khou karyan kadath maekna bun keylou the. 7 Mi hei kazauzian paan rui aniu ta ravchaptatmei tiswlouna, aniu rigwn bammei ringcsuangmei tei aniu laa khang e. 8 Mi hei kalingmei lat e.
Ravguangc khou lwmmei nunc tei kaniw tuang ganv tei gaymei taanv khou tii gutlouna bam khang, nang mi lam khou hei sa ranvna samei ta ai kahaw e. Mi hei meic guayna khang gaymei khatni gaengmei e. 9 Mpangmei tuang agi agamei, meickin kathaimei, agay agimei khatni Riakdanv lam khou agaymei, mi guay hei nang thu sw lak nina e. Mi guay hei nsa de; gaeng mak e. 10 Kalangv tipat khang swpui mei ta tei mphut luhlou luan guay kanei tina kalaih mak e thei, ganc pat tho. 11 Mi kumhpui mei hei thu meic gay makmei khatni paapcmei e twmei thay e. Kamei gay makmei e twmei karana kataanv rui dinc the.
Kadyloumei
12 Ai rui Artemas lev Tukhikas kak khou gaanv khat ta nang daeng khou ndiu guang pwkhou, nang Nikopolis khou adaeng khou guang khang sw o. Ai mi khou tei tingsei khou bam khang twna ning the. 13 Sungpouc Zena lev Apollos ta kaney tat nimei chaenglwan khou nang ngammei kamv nkhavlou tio. Kaney khang ramh gaat mak khang zauclou tio. 14 Aniu mei nunc hei, kage nai changhmei khang tiilou thay khang, kaniw gaymei taanv taanc ncham nina e. Kaniw gaeng makmei panty khou lungc bam lak nina e.
15 Adaeng khou bammei guay rui nang khang dwangay kady e. Nzianmei lwmmei guay khang dwangay kady e.
Nangniw khou Ravguangc zauzian nai diu.