4
1 Ravguangc khatni theihmei ta ni ringhmei ta ni latzan sw nimei Khrista Jisu hu khou mi hei sa tuang e: Khrista Jisu guangh swna guang puni: 2 kakwm kaganv maekna gaychamv hei dinc o; kabah tithaylouna, luhlouna, katiulouna, khaengvthayna, taek makna nchamlou o. 3 Meic nunc tei nchumhmei riakdyn tei nking nii makna, kaniw rui kahaw hawmei tei dinhmei nunc ta kaw lana, chu nii nthakna nking tat kanmei ganv guang puni. 4 Kaniw nchumhmei lat ta nking makna, luanhpui pary khou lunghgut tat kan puni. 5 Tiki nang thu kaganv kathuic ding ntip o, ryanra khaengv o, Gaychamv dinc bam o, nang taanv taanc nthuih o.
6 Akhang thu, ata khaenglou nipui ganv tangc the; mi panty hei mpatlou nipui ganv tangc the. 7 Ai pak nimei lauluangc hei ai ngammei kasang karamcna pak suaklou kan the. Atuang latryan ngaeklou kan the.a 8 Ntaw thu, Poubauhmei nchumhmei Latzanpouc rui mi latzan Tingmik nungc kiu tii nimei ravchaptatmei tuang swan pykhim akhang chamdaanvlou bam the. Mi tei akhang na hamh e; kamei guangmei ta kahawna nkhwan bammei guay khang tii puni.
Charay Lat
9 Ngampui kamv katumcna adaeng khou guang khang karamc o. 10 Demas thu mi mbaanv ta nzianna ata ganclouna Thessalonika kaidai thangc tat kan the. Kreskes rui Galatia thangc khatni Tita rui Dalmatia thangc tat kan the. 11 Adaeng khou bammei Luk na di the. Nang Mark ta nduangh guang o, kamei ata nkhav khang kage nai e. 12 Tukhikas ta ai rui Ephesia thangc ndiulou kan the. 13 Nang guang pwkhou, Troas khou Karpas daeng khou lou duc kanmei pheychuanh tei phungc guang nzut o. Latrik guay tei, nthukna ramhgic tuang tei ni phungc guang o.
14 Kuanri maanv Alekzandar rui ata swkasic sihna swlou the. Poubauhmei rui kataanv thei layna khangclou dat pungh the. 15 Nang ni kakhou rui ramhthay o. Kamei aniu tuang latdyn ta khat sini nuh makpui mei e.
16 Ai latzan bamv khou ding rey khou tei, meic gaanv khat na sini ata ding nduanghlou mak e. Kaniw guayna ata mpatlouna tat ngam kan de. Mi tei Ravguangc rui kaniw ruc khou chaklou makmei sw kan diu! 17 Tiki Poubauhmei rui ata ding nduanghlou de, kumna kamei rui akhou pumtan tiilouna, chamv tei dinclou tina Jentailmei guay ni chu kan the; khatni ata kamangliangpui mwang khou rui gulou the. 18 Ata swkasic nimei guay khou rui Poubauhmei rui gulou puni de, kumna tingkauh Guangcdic khou gayna nduangh guang tangclou puni de. Hymdaihmei hei kakhang tingsaengzaeng sw diu! Amen
Kadymei
19 Priskilla lev Akuila khatni Onesiphoras kai kaikhunc khang dwangay kady e. 20 Erastas Korinth khou bam kan the, kumna Trophimas ta nnauna Miletas khou ganclou duc kan the. 21 Nang tingsei pat mak khou guang khang karamc o. Eubulas, Pudens, Linas, Klaudia khatni chana guay rui nang khang dwangay kady e.
22 Poubauhmei rui nang ta nduanghlou diu!
Nang khou Ravguangc zauzian naimei sw diu!