3
Nkhamhmei Ganv
1 Nkhamhpui ganv khou kungc sihpui tuang ganv guang puni twmei thay o. 2 Meic guay lwnlung tei mi kum puni: kakhang na ningmei, syan kahawmei, gaenghswmei, daihriwswmei, meickai ta sw zakmei, pui pu lat liammei, thuancku thay makmei, ravning makmei, 3 meic nzian thay makmei, kuaklou thay makmei, meickai ta sakasicmei, swkasic karoucmei, meic nzimei, gaymei ta karaengmei, 4 lwmnuh makmei, sinriap nuh makmei, kanga kaliangmei, Ravguangc ta nzianmei suangc amanvmei ta nzianmei, 5 mpaeng khou thu ravningmei khe sw lana, mi tuang pumtan ta tei thu nuh makmei. Mi kumhmei nunc khou tei rui mpaanna bam o. 6-7 Kaniw gaanv saekc kai kai khou tiap gutna, paapc puatcrith phungc bammei khatni meic pumc tuang kahawmei zaat guay rui phungc pat phungc gut tat bammei, ncham bam sini nchumhmei ta thay zat makmei suanmei ntumei nunc ta kaniw sinsw e. 8 Jannis lev Jambris rui Mousi ta nuh mak kanmei kumcna, kaniw lungning nkhuai kanmei khatni lwm makmei kaniw hei rui nchumhmei ta nuh mak e. 9 Kaniw asaanh tatlou ni tu hamh e. Kaniw rampang tei meic guayna rui thay pat puni de. Jannis lev Jambris tei ni mi kum kan tuang e.
Nkhamhmei Kadyloumei
10 Nang thu atuang latdyn, akheiliak, atuang tamhmei, aram lwm, aram khaengthay, aram nzian, aram khaengtan thay kan the. 11 Ata raikasicmei khatni ai ryanramei ariw kanmei—Antiokh khou, Ikonium khou khatni Lustra khou taraina makmei ramrianra ai ariw kanmei tei nang thay e. Tiki mi guay khou tei rui Poubauhmei rui ata gulou the. 12 Khrista Jisu khou ravningmei panty khou lungc niimei guay ta thu rairiu puni tina di the. 13 Meic gay makmei nunc khatni gaypui khe swmei nunc tei thu meickai ta khatni kaniw rana kaniw ta guatna si hay hay tat kan ni tuang di the. 14 Tiki nang thu, nang khou dinclou kanmei khatni nang ntipna lwm kanmei nchumhmei tei sin ntip bam o. Nang ta thow thow rui nchamlou tu cho twmei nang thay e, 15 khatni Khrista Jisu khou lwmmei paan rui ringhbamv khou zaylou nimei ningting nang khou tiiloumei Nthanmei Latrik tei nang alauc khou rui thay the twmei nang thay e. 16 Nthanmei Latrik kapwm hei Ravguangc thiu mbunloumei tuang e, kumna mi hei nchamlou khang, luhlou khang, sw-ntwnlou khang, khatni ravchaptat khang nchamlou khang gaeng e. a 17 Mi kumna, mi hei rui Ravguangc siamruaimei ta kathouc taanh khang biuhpui mei khatni gaymei taanv kathuic taanc ngampui mei tiswlou e.