5
Phwamlingmei nunc khou Taanclou Nimei Thouc Guay
1 Gaanvdaih ta luh rio; pu ta kumcna katiulou o. Nggaanvmei alauc nunc ta nang chana nunc ta kumcna ningna swlou o. 2 Ntumei gaanvdaihmei nunc ta nang pui ta kumcna khatni ntumei alaucmei nunc ta nang tanpui nunc ta kumcna ningna mphuam mpha tuang maekna swlou o.
3 Swm may sw changhna bammei maypui nunc ta tei kadanna zauclou o. 4 Tiki thowkumhmei maypui tei katou kanac nunc nai e thei, kaniw tei ravningmei taanv tei kakai kaikhunc khou rui taanc chada rey kan diu, kumna kaniw pui pu pow khangc kan diu. Mi tei Ravguangc rui kahawmei e. 5 Maypui thu, kata zauclou nimei maekmei, Ravguangc khou na lwmgayna zingbangc kalaanv huayney bammeipui tei e. 6 Tiki meic pumc rui kahawmei khou tii patlouna lungc bammei maypui tei thu kapumc ringc bam sini theihmei de. 7 Meic nunc rui khanhmei lwnlung khou kaniw keylou mak khang, mi latdyn hei kaniw khou ni dinclou tio. 8 Thowkumhmei kariang kaluaic ta, nkunna kaikhunhmei ta zauclou makpui mei tei thu kamei lwmmei mei hamh e twpui tuang di the. Kamei lwm makmei nunc suangc si the. 9 Katingkwm riakcharuk tangh makmei ta thu maypui pang khou chak kazauhlou nangh e. Mi ruc khou rui, kamei kagaanv akhat nameipuia nina e, 10 kamei gaymei taanv taanhmeipui: kanac nunc ta makuat chuymeipui, gin ga laalou thaymeipui, Khristian guay khou niamhmei siamruai swmeipui, ryanra ryanriumei ta nkhavmeipui, khatni gaytaanv khou lungh gutmeipui nina e. 11 Alauc maihmei nunc ta thu maypui pang khou laa gutlou nangh e; kaniw ta kaniw pumc rui kahawmei rui ngamna kaniw Khrista khou rui mpaan pat pwkhou, mic dat nii puni. 12 Mi kumna kaniw rui Khrista khou swlou kanmei latryan tei swbakmei tuang khuay kaniw khou keylou puni. 13 Mi ruc khou rui kaniw kaining taraina aliauh ncham e. Mi hei na hamhna kaniw mwang thayna nsuc nraucna sa zi zi makpui lat sa tat e. 14 Mi zaeng rui, maypui alaucmei nunc thu mic dat lana, kaniw nac naina, kaniw kaikhunc kasiamh bam kanmei ta ai kahaw e. Kum mak e thei, zauczihmei nunc rui aniu ta khanc bam khang de. 15 Maypui gaanv saekc thu Seitan thei lay khang tat pat kanmei nai changh the. 16 Thowkumhmei lwmmeipui kaikhunc khou maypui nai e thei, mi ta tei kamei rui zauclou kan diu; phwamling khang puatcrith tii nangh e; maypui ling nunc ta zauclou bam kan diu.
17 Zaylou chuymei gaandaic nunc, nkunna chamvdinhmei khatni nchamloumei khou taanc ranvna bammei nunc tei kataanvphy kadam kanei laa biuc rapmei nunc e twmei chaklou nina e. 5.18: Kar 25.4; Mat 10.10; Luk 10.7 18 Kalam thu, "Nap ni bammei guaichic ta kamwang karak lak nina e," khatni "Taanv taanhpui mei khang kaphy tii nina e," twna Nthanmei Latrik khou hylouna nai e. 19 Kalam thay nthanmei gaanv nei gaanv thumh kazauh mak e thei, gaanvdaih khat ruc khou phungc guangmei lat tei laa thau riu. 5.19: Kar 17.6, 19.15 20 Tiki paapc taanhpui mei ta tei thu, baihmei guay ni ping kan khang, charuangc mav khou luh tio.
21 Guhsw gahsw tuang khatni ningsi ninggay sw makna, mi latdyn hei piu khang Ravguangc, Jisu Khrista khatni kapahloumei kauh baanchara guay hu khou ai rui nangniw khou sa tuang e. 22 Baanh zay sungclou khang katumh riu. Meickai paap khou lay kazauh riu; nang nthanna bam o.
23 Nang katupna nnau bammei zaeng rui, nang bung khang, dui na zangv makna luairyn zouc ni katit titna zangv o. 24 Meic gaanv saekc paap thu ndaw phauna how e, kumna kaniw paap tei latzan bamv thangc kaniw hu tat kasuakc kan the; tiki meic gaanv saekc paap thu kaniw thei lay guang e. 25 Mi tei kumcna gaymei taanv ni ndaw phauna how e, kumna ndaw phauna how makmei guay tei ni nkamhlou bam ngam ni tu hamh e.