4
Dinc Mbianghpui Mei nunc
1 Nkhamhpui ganv khou meic gaanv saekc thu lwmmei mpatlouna guatmei bumaengc nunc lat khou khatni ravsic nunc tuang riakdyn khou lunghgut tat kan puni twna Bumaengh rui nthanna salou the. 2 Mi kumhmei latdyn guay hei, kaniw tuang nkhuai nchumh thaymei lungning tei mai raw haenghmei ntanc rui kabic ndyloumei, kakheswmei, meicguatmei nunc tei rui dinc the. 3 Kaniw rui nowkawmei nchumh mak e twna nchamlou e khatni nchumhmei ta thaymei lwmmei nunc rui thuanckuna tu khang Ravguangc rui damcloumei taektw asaekc ta tu nuh mak e twna nchamlou e. 4 Kalam thu Ravguangc rui damcloumei puat guay gaymei rana de, ganc pat khang ramh khat sini maek e, tiki ramh guayna tei thuanckulouna tu nina e. 5 Kalam thu Ravguangc lat khatni huayneymei rui mi tei nthanmei taektw sw the.
Khrista tuang Gaymei Siamruaimei
6 Nang mi latdyn guay hei lwmmei chana guay khou nchamlou bam e thei, khatni nchumhmei lat khatni nang piu bammei riakdyn tei rui nang ta taektw kumcna makuat thau bam e thei, nang Khrista Jisu tuang gaymei siamruaimei sw puni. 7 Tiki ravchaptat makmei tuang duancpui tuang pary khou tei rui nang thu ducna bam o. Mi tei gaengmei tuang hamh e; tiki nang thu ravning chuyna lungh khang karamc o. 8 Meic pumc gay khang swmei hei gaengmei tuang asaekc nai e; tiki ravning chuy khang swmei thu kalam katana khou gaengmei nai e. Mi tei rui ntaw panty khang ni, thei thangc panty khang ni gaeng e. 9 Mi hei kalingmei lat e, laalou rap nipui lat e. 10 Mi khang aniu karamc ranvna taanc e, kalam thu meic guayna khang, nkunna lwmmei nunc khang guloumeipu ringhmei Racguangc khou rui aniu lwmgayna bam e.
11 Mi guay hei piu nina e twna sa o khatni nchamlou tio. 12 Nang ta alauc de twna meicnunc rui mala mak khang sw o. Nang latsav khou, kheiliak khou, nzianmei khou, lwmmei khou khatni nthanmei khou lwmmei guay lay nzeic nuhpui lwnlung khou lungc o. 13 Ai guang mak saanv Nthanmei Latrik mathiuc khou pacloumei, katiuloumei khatni nchamloumei khou lunghgutna sw bam o. 14 Gaanvdaih kang rui nang ruc khou baanh sungclou khou tei ravmundincna salou kanmei nang khou naimei kaipat tei nang ntaemv rio. 15 Nang khou mbu thaumei tei meic guayna how khang mi guay hei nang lunghgutna taanc bam o. 16 Nang rana nang ta ni, nang rui nchamlou bammei latdyn ta ni zauc chuy o. Nang mi kumna sw bam e thei, nang rui nang ta ni, nang lat nking bammei nunc ta ni gulou puni.