3
Phwamling khou Taanvpy Sinmei nunc
1 Thowkumhmei rui phwamling tuang taanvpy sinmei taanv hei kahaw e thei, kamei taanv gaymei kahaw tuang e twna samei hei suai makmei lat e. 2 Phwamling tuang taanvpy sinpui mei hei khanbamv maekmei sw nina e: kanow akhat namei,a kalung nniapcmei, si gay kakhanh thaymei, chakhwang swlou nuhmei, gin ga laalouthaymei sw nina e; nchamlou thaypui mei sw nina e; 3 zouh mba makpui mei, khatni kalungrat sipui mei hamhna lunghzaenghpui mei nina e; syan agaemv makpui mei nina e; 4 kakai kaikhunc ta sin chuyna kanac nunc kata chakhwang swna lat piuna lunghpui mei nina e. 5 Kalam thu kakai kaikhunc ta sini sin thay makpui mei tei rui akumhna Ravguangc tuang phwamling ta makav nina cho? 6 Lungh laic pat thanhpui mei rui sw lak nina e, kalam thu kamei daihriw sw thauna Ravsic rui taanc kanmei khuay kahak tei kamei ni taanc nuh e. 7 Kata tizaklouna Ravsic phac khou keylou mak khang, kamei tei phwamling paengc thangc bammei guay rui ni ning chuy bampui mei nina e.
Diken Nunc
8 Mi hei kumcna diken guay ni, changh siph sipmei khatni baley kanei makmei nina e; kaniw zouh mba makmei khatni syan dui agaemv makpui mei nina e; 9 khatni karamlum tei lwmsipui tuang maekna lwm changh siph sippui mei nina e. 10 Kaniw ta tei nchanv zauc rey nina e, kumna khuay maekmei e tw pwkhou rui diken swna taanc nina e.
11 Kaniw nowb guay tei ni kheiliak gaymei, meickai ta nrauc makmei, lungc nzaenghmei khatni ramh lam guayna khou lwmnuhmei mei nina e.
12 Diken nunc tei kanow akhat namei,c khatni kanac nunc khatni kakai kaikhunc ta sin chuyna sin ngammei nina e. 13 Kaniw tuang taanv taanc chuyna taanc bammei diken nunc ta tei meicnunc rui ning chuylou puni, kumna kaniw lwmmei lam khou baucna sa ngam puni.
Daic Liangmei Ravchap
14 Ai mi tatdyn hei hyna hyna asaanh makmei lungc khou nang daeng khou guang khang lwmgayna bam e. 15 Tiki ai guang nyanmei tuang nai e thei, aniu Racguangc kaikhunc khou akumhmei kheiliak tat nina cho twmei mi tatdyn khou hei rui thay khang e. Ravguangc tuang kaikhunc twmei kiu thu, ringhmei Racguangc tuang phwamling nchumhmei tiangdaic ta e. 16 Aniu lwmmei ravchap hei nchumhmei, daic liangmei ravchap e. Mi ta hei meic gaanv khat na rui sini khiat dat ngam mak khe:
Kamei maansei swna lungc guang e,
nchumh e twmei bumaengh rui lyanlou e,
kumna kauh baanchara guay rui how e.
Kata Jentailmei pang khou dinc ndauh the,
mbaanv kapwm khou lwm the,
kumna hymdaihmei khou laa thau kan the.