2
Ravguangc Kalummei khou Sw Nimei Riak
1 Rey liangmei khou ai rui katiu e: nangniw huayneymei khou meic guayna khang huayneylou o khatni thuanckulou o. 2 Aniu nchu nrina lungc simh simna, ravning chuyna khatni khat khat ta chakhwang swna lungc nuh khang guangh nunc khang khatni ngamv sinmei nunc khang huayneylou o. 3-4 Mi hei, meic guayna guloumei laa kanmei khatni nchumhmei ta thay kanmei ta laa niimeipu, aniu ta guloumeipu Ravguangc mikzuat khou gaymei e khatni kamei rui kahawmei e. 5 Kalam thu Ravguangc akhat nai e, khatni maansei lev Ravguangc kak khou chaguatpouc gaanv khat nai e. Kamei kiu maansei Khrista Jisu, 6 maansei ta thuak patlou khang karana kata tii patloumeipu hei e. Ravguangc rui meic katana guloumei laa kanmei ta laa nii e twmei kaganv chamei khou ndauhloumei kiu mi hei the. 7 Mi zaeng rui, lwmmei khatni nchumhmei tuang chamv hei dinh khang ata Jentailmei nunc khang Latdiutatmei khatni dinhpouc swna ndiulou the. Ai saraemh mak e; kaling sa bammei tuang e!
8 Nggaanvmei guay kabamv kathuic khou agay agimei khatni lunghpuamc zawzinghmei maekna nthanmei baanc zay thauna huayneymei ta ai kahaw e.
9 Ntumei guay ni pwanpiu khou howsi howgay thayna how manimmei tuang pwanpiu piumei ta kahaw e. Sam kasiamhmei rui, kachaekc kaphut rui, khatni kamanv kunghmei pheybaan rui karuhmei hamhna, 10 ravningmei pui khang ziapmei gaymei taanv rui karuh o. 11 Ntumei guay thu nchamloumei tei reih reina, niamhna nking kan diu. 12 Kaniw nggaanvmei ta ncham khang hamh e, hamh e thei nggaanvmei ruc khou ngamv sin khang ai kaniw ta nuhlou mak e. Kaniw reih reina bam nina de. 13 Kalam thu Adam ta damclou rey lana Evi ta damc datpui tuang e. 14 Guat kanmei tei Adam ta hamh e; mi ntumei ta tei de, kumna kamei rui Ravguangc latdanv liam the. 15 Tiki ntumei guay ta ni lwmmei khou, nzianmei khou, nthanmei khou khatni kachangc siph sipmei khou ntipna bam e thei, nac puanhmei khou tei rui kaniw ta gulou puni.