Timothi
KHOU Paul RUI HYMEI REYMEI TATDYN
1
Chaengriw Lat
1 Aniu ta guloumeipu Ravguangc khatni aniu lwmmei Khrista Jisu tuang latdanv thei layna Khrista Jisu tuang Latdiutatmei swmei Paul rui—
2 Lwmmei khou kunghmei anac mpouh swmei Timothi khang hymei:
Pu Ravguangc khatni aniu Poubauhmei Khrista Jisu rui nang khou nzianmei, zauzian khatni chuzaenghmei tiilou pu diu!
Dinc Mbianghmei nunc khou rui Ramhthay o
3 Ai Makedonia thangc tat ni khou nang khou kadylou kanmei tei kumcna, nang Ephesia khou tei bam o. Riakdyn laanhmei dinc bammei nunc ta tei mi tei dinc nthaekc tho twna sa o. 4 Damc duancpui pary khatni kanganv thay makmei pouh peih kin pary khou lungc gut bammei tei nthaekc tho twna sa o. Mi tei rui mpangmei tuang agay agimei tipat e; lwmmei paan na rui thay nimei Ravguangc tuang raeng tei thay khang mi tei rui ramh khat sini gaeng tuang maek e. 5 Mi kumna nang ta katiu bammei kabac kiu thu lungh nthanmei, lungning nthanmei, khatni kalingna lwmmei khou rui guangmei nzianmei tei kaniw khou nai khang e. 6 Meic gaanv saekc thu mi guay khou hei rui gaeng makmei lat agimei khou tei tat mpi pat kan the. 7 Kaniw riakdanv tadin nunc sw nii e, tiki kaniw sa bammei tei tabui sa bam tu cho twmei, hamh e thei kaniw thaymei kumcna sa bammei lam tei kaniw kabah thay mak e.
8 Kalam chana sinsw ti thei Riakdanv hei gaymei de twmei aniu thay e 9 Mi hei thay o, twmei thu kariak latdanv kasiamhmei hei nchumhmei nunc khang hamh e; tiki kariak tat makmei nunc, latliammei nunc, ravchaptat makmei nunc, paapcmei nunc, ravchap ravriak ngaek makmei nunc, kapui kapu ta sw luaimei nunc, meicdowmei nunc, 10 lungcmaanv lungcmowmei nunc, meicriak twanna nthah boulahmei taanv taanhmei nunc, bangh zuanhmei nunc, saraemhmei nunc, saraemhmei liang lianghmei nunc, khatni nchumhmei riakdyn tat makmei nunc khang e. 11 Mi riakdyn kiu thu, dinc ndauh khang akhou nsinloumei hymdaihmei Racguangc tuang tikgunc daihmei Gaychamv hei e.
Ravguangc Zauzian ta Thuanckumei
12-13 Ai taanc bammei taanv hei taanc ngam khang pumtan tiiloumei aniu Poubauhmei Khrista Jisu ta thuancku e. Tat kanmei ganv khou ai kata sakasicna khatni rairiuna kata swkasic khang swlou khwan sini, lwmnuhmei swna chaklouna kasiamruai sw khang ata laaloumei khang ta thuancku e. Ai lwm makmei douc tei thay makpui zaeng rui mi tei taanh tuang e twna Ravguangc rui ata nzianlou the. 14 Kumna aniu Poubauhmei rui karyan kadath maekna akhou kazauzian bunlouna, Khrista Jisu khou naimei lwmmei khatni nzianmei tei akhou tiilou the. 15 Paapcmei nunc ta gulou khang Khrista Jisu mbaanv khou guang the twna samei hei kalingmei lat the, mi hei meic guayna rui laalou nipui lat e. Paapcmei nunc pang khou ai hei si liangmei mei e; 16 tiki thei thangc kakhou lwmna ringcsuangmei laa nimei nunc khang kanganv maekmei Khrista Jisu tuang nzianna khaengvloumei tei lyanlou khang, si liangmei paapcmei ata Ravguangc rui nzianlou the. 17 Tingsaeng Guangc, theih makmei, mik rui how makmei, akhat namei Racguangc khang tingsaengzaeng chakhwang champouhmei khatni tikguncdaihmei sw diu! Amen
18 Anac Timothi le, tat kanmei ganv khou ravmundinhmei nunc rui nang khou salou kanmei tei kumcna ai rui nang khou mi latdyn hei tii tuang e. Mi lat guay tei nang piuna adow chuyna adow o, 19 lwmmei ntip bam o, khatni nkhuaimei taanv taanh makna lungc o. Kaniw lungning rui simei e twna samei tei piu mak khou rui meic gaanv saekc thu lwmmei rungc bak kanmei nai the. 20 Ravguangc ta ramh sak makna swmei tei sw dat mak khang ai rui Seitan baanc khou tii patlou kanmei Humenaios lev Alekzandar ni mi nunc pang khou tei kazauh the.