6
1 Ravguangc zanc khatni aniw tuang latdyn ta sakasic mak khang, bangh sw bammei kaniw ni kaniw kaipouc nunc ta chakhwang sw nina e. 2 Lwmmeipu akhat bangc nunc tei kakaipouc ta chana de twna ramh sak mak tuang sw lak nina e. Mi phaan tei kaniw taanc chuylou ranv nina e. Kalam thu kaniw rui taanclou nimei tei kaniw rui nzianmei lwmmei nchamc khang e.
Nchumh Makmei Latdyn khatni Kalingmei Lanv
Mi lat guay hei dinclou o khatni piu khang katiulou o. 3 Aniu Poubauhmei Jisu Khrista tuang kalingmei lat khatni ravningmei tuang latdyn ta nuh makna baihmei riakdyn dinhpui mei tei, 4 daihriw swmei rui khungcna kamei ramh khat sini thay mak e. Kakhou simei tipat khang lat lam khou agay agi niimei lungning rui padik e. Mi khou tei rui patmei thu mamavmei, tamramei, sakasicmei, ningkasicmei, 5 kalungning khou nchumhmei maekmei mei nunc pang khou agay agi bammei hei the. Ravningmei hei thu lungcgay nipui chaeng e twna kaniw ning e.
6 Ngguay, ravningmei tuang lungcgay kiu thu, kakhou nai naimei tei pian rapmei tei the. 7 Kalam thu aniu mbaanv khou ramh khat na sini phungc guang mak e; ramh khat na sini phungc tat ni tu hamh e. 8 Mi zaeng rui, aniu khang taektw khatni pheybaan nai e thei, aniu mi tei rui pianmei sw nina e. 9 Tiki lungcgay niimei nunc tei nthiammei khou keylouna mpangmei tuang kaniw ta swkasic nimei ta kahawmei phac khou keylouna maan kanmei mpeyna nai the. 10 Kalam thu syan agaemvmei hei simei guay tuang bangbi e. Syan kahawmei khou rui meic gaanv saekc thu lwmmei khou rui tat pat lana lungh ryanramei rui kaniw lungthw sauh biw kumc bam geic e.
Charay Kadyloumei
11 Tiki, Ravguangc mei nang thu, mi guay khou rui rei pat o, kumna ravchaptatmei, ravningchuymei, lwmmei, nzianmei, khaengvthaymei, khatni lunghzaenghmei nang khou nai khang karamc o. 12 Lwmmei tuang lauluangc hei pak ranvna pak tho, kumna ringcsuangmei tei laa tho. Nang lwmlou the twna meic mpeyna hu khou sa ndauh khou tei, nang ta kawloumei hei mi ringhmei hei tiilou khang e. 13 Ramh guayna khou ringhmei tiiloumei Racguangc hu khou, Pontias Pilat hu khou sa ndauhlou kanmei Khrista Jisu hu khou, ai rui nang khou mi latdanv hei tii guang e. 14 Mi latdanv guay hei aniu Poubauhmei Jisu Khrista guang mak saanv piu nthuihna tat bam khang e. 15 Mi tingmik kiu hymdaihmei, kanei makmei ngamv Kaipouc, guangh guay Guangc khatni kaipouc guay Kaipouc, Ravguangc rui kating tangc pwkhou tii guang puni. 16 Kamei hei theic makmeipu e, meic guang tuanc ngam makmei riw khou bammeipu e; kata meic gaanv khat na sini how kan mak e khatni how ngam mak e. Chakhwang champouhmei khatni pumtan tingsaengzaeng kakhang sw diu! Amen
17 Mi mbaanv tuang lungcgaymei nunc ta daihriw sw mak khang sa o. Kadyng maekmei lungcgay khou tei hamhna, gaat tuang maekna ramh katana sakbi sakba makna tiiloumei Racguangc khou ngangvlou khang sa o. 18 Kaniw gaytaanv khou lungcgay khang, lungning daicna khatni baanh daicna tii pat khang sa o. 19 Mi kumna kaniw khang lanv lou kaduaina thei thangc khang ntipmei phaydyng kasiamh lana kalingmei ringcpaan tei kaniw laa ngam khang e.
20 Timothi, nang khou nsinlou kanmei tei swmaan mak khang singaek chuy o. Kiuc hamhmei "Thaymei" twmei tuang, ravchaptat makmei tuang agi agamei khou tei nang thu lay kazauh rio. 21 Kalam thu meic gaanv saekc kaniw khou mi "Thaymei" tei nai the twna sana lwmmei khou rui tat pat kan the.
Ravguangc zauzian nangniw khou naimei sw di tho.