7
Nowkaw Mihmei Lam
1 Kumna nangniw rui hy guangmei lat lam khou tei ai rui sa nimei thu: Ntumei ta kahi makmei rui gay e.a 2 Tiki lungcmaanv lungcmowmei naipui zaeng rui, nggaanvmei ni, ntumei ni kanow kagaanv naina lungc o. 3 Kumna gaanv rui kanow khou swlou nimei thouc tei swlou nina e, now rui ni mi tei kumc muaina gaanv khou swlou nina e. 4 Now tei kapumc tei karana kanyng sw khang hamh the, kagaanv tuang di the; gaanv tei ni kapumc tei karana kanyng sw khang hamh the, kanow tuang di the. 5 Huayneymei ganv laa khang gaanv nei chwn chamcna nuhloumei hamhna, nang ney khat khat khang nuh makmei tuang sw lak nina e. Kumna mi ganv tei luai kan e thei nowpuc lwnlung lungc dat nina e. Kum mak e thei nangniw pumc sinriap ngam makna Seitan rui nthiammei khou keylou puni.
6 Ai samei hei latdanv hamh e, mi kumna swmei gay e twpui tuang de. 7 Nangniw meic guayna akumc ngam e thei gay ni tuang e; tiki Ravguangc rui meic guayna khang katuang kaipat nchamcna tiilou mak khe; gaanv khat gaanv khat khang baic baicna nkunna tiilou the.
8 Now kaw makmei nunc khatni maypui nunc khou ai rui samei thu: ai kumcna now kaw, mih makna bammei rui kaniw khang gay e. 9 Tiki kaniw pumc sinriap ngam mak e thei, kaniw now kaw mihmei rui gay e. Kahawmei rui chuangcna bammei suangc now kaw mihmei rui gay e.
10 Now kaw mihmei nunc khou ai rui sa e. Mi hei alat hamh e; Poubauhmei rui sa tuang e: Now tei kagaanv lev ntamv dat nuh mak khe. 11 Kamei ntamv dat e thei, mic dat makna bam nina e. Kum makna mic dat ni thei, kagaanv khou kariu dat nina e. Gaanv rui ni kanow ta taan nuh mak e.
12 Baihmei guay khou ai rui sa e (ai rui de, Poubauhmei rui hamh e): Thowkumhmei lwmmei gaanv khat now lwmmei hamh bam sini, kanow rui kamei lev lungc bam ni de tw e thei, kamei kanow ta mu ganh mak kan diu. 13 Thowkumhmei Khristian gaanv khat kagaanv lwmmei hamhmei bam sini, kagaanv rui kamei lev lungc nchamc bam ni de tw e thei, kamei kagaanv ta tei mu ganh mak kan diu. 14 Kalam thu lwmmei hamhmei gaanv ta tei kanow paan rui sw nthanlou the, khatni lwmmei hamhmei now ta tei kagaanv paan rui sw nthanlou the. Kum mak khwan e thei, kaney nac nthan makmei sw ni tuang e; tiki kaney nac ni nthanmei de. 15 Tiki lwmmei hamhmei rui ntamv nii e thei, kaney ntamv kan diu. Mi kumhmei latbamv khou thu chana ramh e thei tanpui ta karak mak e. Ravguangc rui aniu ta kawloumei thu chuzaenghna lungh khang de. 16 Now, nang rui nang gaanv ta gulou ngam punib twmei nang akumhna thayna cho? Mi tei kumcna gaanv rui ni kanow ta kamei rui gulou ngam puni twmei akumhna thayna cho?
Nang ta Kawpatloumei Lwnlung khou tei Bam o
17 Meic katana Ravguangc rui kakhou kakhou tiiloumei lwnlung, twmei thu kata kawpui ganv khou kamei bammei lwnlung khou tei bam kan diu. Mi hei ai rui phwamling guay khou dinclou kan tu the. 18 Thowkumhmei kata kawpui ganv khou kamei gihruamc bam khwan e thei, mi tei swmaan dat nangh khe; thowkumhmei kata kawpui ganv khou gihruamh mak bam khwan e thei, ruamc dat nangh khe. 19 Gihruamhmei khatni gihruamh makmei rui ramh khat sini hamh e; nthukmei thu Ravguangc latdanv guay piumei hei de. 20 Meic kathuic Ravguangc rui kata kawpui ganv khou kamei bammei lwnlung khou tei bam kan diu. 21 Ravguangc rui nang ta kawpui ganv khou tei nang bangh sw bam tu cho? Kum bam kan diu; tiki nang nyng sw dat nuhmei tuang kadouchamei nai e thei, nyngswna lungc dat o.c 22 Kalam thu Ravguangc rui kawloupui mei tei thu meic bangc sw bam sini, Poubauhmei tuang nyngswpui mei di the. Mi tei kumcna Khrista rui kawloumei nyngswpui mei tei ni Khrista tuang bangc muai de. 23 Ravguangc rui nangniw ta kamanv tiina liulou tuang di the. Mi zaeng rui, maansei tuang bangc sw dat ri tho. 24 Achana thiu, meic katana Ravguangc rui kata kawloupui ganv khou kamei bammei lwnlung khou tei, Ravguangc khou bam nina e.
Nowkaw Mih Makmei khatni Maypui nunc khang
25 Ntaw mih makmei nunc lam khou, Poubauhmei rui mi lam khou latdanv tiilou tuang maek e; tiki Poubauhmei tuang zauzian paan rui lwmnuhmei akhat swna ai rui ningmei sa tuang e.
26 Ntaw ganv khou kunghmei naipui zaeng rui, kamei kamei rui bam bammei lwnlung khou tei bammei gay e twna ning e. 27 Nang now kaw e thei taan dat ri tho. Nang now kaw makna bam e thei, kaw khang sw nangh khe. 28 Tuna nggaanv now kaw mihmei hei paapc hamh e; tiki now kaw mihmei thu mbaanv puatcrith mbu the. Mi tei phungc tow mak khang sa tuang e.
29 Achana thiu, ai rui sa nimei thu mi hei e: Kaganv hei na guang the, kum thena, kanow naimei nunc ni now maekmei nunc kumcna lungc kan di tho; 30 kap bammei nunc ni kap makmei nunc kumcna lungc bam kan di tho; nuic bammei nunc ni nuic makmei nunc kumcna lungc bam kan di tho; liu bammei nunc ni ramh maekmei nunc kumcna lungc bam kan di tho; 31 lanvguanh lanvdaengh bammei nunc ni mi khou tei kaganv guayna tiilou dat ri tho. Kalam thu mbaanv hei ntaw nai bammei lwn kumcna nai bam nimei asaanh mak khe.
32 Nangniw lungc geic kadan makna bammei ta ai kahaw e. Now kaw makpui mei tei thu kamei Poubauhmei ta tipianlou khang twna Poubauhmei taanv khang kadanna bam e; 33 Tiki now kawpui mei tei thu kanow ta tipianlou khang mbaanv tuang taanv khang kadanna lungc e. 34 Kumna kachwn kaney pat the. Kumna mih makmei ntumei hamh e thei tuna tei ni, kapumc kabumaengc Ravguangc khang reic patlouna, Poubauhmei taanv khang kadanna lungc e. Tiki mihmeipui tei thu, kagaanv ta tipian khang mbaanv tuang taanv khang kadanna lungc e.
35 Ai mi hei sa bammei hei, nangniw khang de. Ai nangniw ta karaklou khang hamh e. Nangniw daeklou tuang maekna, Poubauhmei taanv khou tii gutlou pary rina taanc nuh khang, nangniw mi kumcna swmei gay e twna sa tuang e.
36 Thowkumhmei kakhaemv khang luailouna bammei tuna ta, kahawmei chwn tancna, howgay makpui tuang nai thena, nowpuc sw kan ni the twna ning e thei, kaney nowpuc sw kan diu.d Mi tei paapc hamh e. 37 Tiki thowkumhmei, kum mak nuh mak e twpui zaeng rui hamhna, karana kata sinriap ngam de twna, kalungchwn rui nuhna, mi tuna ta tei kaw lak khe, khaemv swna bam kan ni the tw e thei, mi tei ni gay de. 38 Mi kumna kakhaemv tuna ta kawmei ni gay the; tiki now kaw makmei rui gay ranv the.
39 Mihmei ntumei tei kagaanv ringc bam saanv meickai now di the; tiki kagaanv theic kan e thei, kamei miclou dat nii niimei kai khou miclou dat nuh the. Tiki Khristian khou na miclou nina e. 40 Tiki kamei mic dat makna bammei rui kakhang gay ranv puni twna ai ning e. Akhou Ravguangc Bumaengc bam e twmei ai lwm e.