9
Saul Lwmloumei
1 Saul tei kareic thauna, Poubauhmei tuang ziap guay ta swluai khang kapyn bam khwan e. Kamei Tingkuh daeng thangc tatna, 2 Chaeng twna kawmei pang khou kazauhmei, ntumei pwni, nggaanvmei pwni, ariw riwmei ta nymna Jerusalem thangc zay guang khang, Damaskas kaidai tuang sinagog guay khou latrik hylou o twna ney the.
3 Saul tei Damaskas kaidai na guang pwkhou, tingpuk thangc rui thay mak liang khou gaanhriw karuc khou tii key the. 4 Kamei kandih khou taek key the; khou tei khwan akhat rui, "Saul! Saul! Nang tabui swna ata swkasic khang sw bam tu cho?" twna samei kamei chu the.
5 "Poubauhmei, nang thow cho?" twna kamei rui sa the.
"Ai hei nang rui raikasic khang sw bammei Jisu tei e. 6 Tiki nang thauna mi kaidai khou hei gut tho, nang tabui sw nina cho twmei mi khou kiu dinclou puni," twna mi khwan tei rui sa the.
7 Saul thei lay tatmei nunc tei lat sa khang thay makna ding the. Kaniw ni khwan tei chu e; tiki meic gaanv khat na sini how mak e. 8 Saul tei kandih khou rui dingthauna, kamik rak pat the; tiki ramh khat sini how mak khe. Kumna kaniw rui kabaanc zayna Damaskas khou nduangh gut the. 9 Kamei zaeng neih thumh kamik ni how mak, tu ni tu mak, zangv ni zangv makna bam khwan e.
10 Damaskas khou kazanc Ananias twna kawmei ziap gaanv khat nai khwan e. Ndawman khou Poubauhmei rui kata, "Anania!" twna kaw the.
"Poubauhmei, ai bam e," twna kamei rui daw the.
11 Poubauhmei rui kakhou sa the, "Nang Ntyngmei Chaengdai thangc tei tatna, Judas kai khou 'Tarsasmei Saul bam bu cho?' twna thanv tio. Kamei mi khou tei huayney bam e. 12 Kumna kamik how dat khang Ananias twna kawmeipu guangna karuc khou kabaanc bouclou bammei ta kamei ndawman khou how kan the."
13 Ananias rui mundawna sa the, "Poubauhmei, mi pu lam khou hei ai meic mpeyna khou rui chu the. Jerusalem khou nang mei nunc ta swkasic karoucna sw kanmei chamv tei ai chu the. 14 Nang zanc saanhmei guay ta nym khang kamei amuh daihmei nunc khou rui ngamv laana mi khou hei guang tuang e."
15 Tiki Poubauhmei rui sa the, "Tat o, kamei hei Jentailmei nunc khou, guangh nunc khou khatni Israelmei nunc khou azanc dinc ndauh khang kapahloumei mei e. 16 Kamei azaeng khang ryanramei khaengv nimei guay tei ai rui kakhou lyanlou puni."
17 Kumna Ananias tatna, Saul bammei kai khou tei guangna karuc khou kabaanc bouclou the. Kumna, "Chana Saul, nang mi khou hei guangmei chaenglwan khou nang khou ndauhloumei Poubauhmei Jisu kamei rui ata ndiulouna guang tuang e. Nang mik how dat khang khatni nang Bumaengh Nthanmei rui padik khang ata ndiu guangmei tuang e," twna sa the. 18 Mi dyng khou tei Saul mik kanei khou rui ramh lip kumhmei ramh khat kathyng key the, kumna kamik how dat the. Khoutei kamei ding thau the, kumna duilup the. 19 Kamei tu zangv datna kapumtan guang dat the.
Saul Damaskas khou Latdinhmei
Saul zaeng ramh biuc dou Damaskas khou ziap nunc lev bamlou khwan e. 20 Kamei sinagog guay khou tatna, Jisu hei Ravguangc Nac Mpouh e twna dinc ndauh the.
21 Kalat chumei guay tei ngak the, kumna "Mi pu hei Jerusalem khou mi Jisu zanc hei saanhmei guay ta swmaan khang sw bammeipu tei hamhna cho? Kamei mi khou guangmei hei mi nunc ta tei nymna amuh daihmei nunc daeng thangc zay guang khang hamhna cho?" twna sa the.
22 Saul tei pumtan mbu hay hay thauna, Jisu hei Khrista e twmei Damaskas khou bammei Jihudimei nunc ta sa liamlou the.
23 Tingmik mpeyna tangv, Jihudimei guay tei guang kaduaina, Saul ta swluai khang chambuilou the. 24 Kata swluai khang sw bam the twmei Saul khou dinclou the. Kaniw kata swluai khang zingbangc kalaanv kaidai raengcmun guay khou tei nchwan bam the. 25 Tiki zingbangc akhat kathei laymei nunc rui kata ramh raek khou louna raengh kailat khou rui kapaengc thangc mpat keylou the.
Saul Jerusalem khou Guangmei
26 Saul Jerusalem thangc tatna, ziap nunc pang khou kazauh khang sw the. Tiki kaniw kata ping the. Kalam thu kamei ziap akhat the twmei kaniw lwm ngam mak khe. 27 Khoutei Barnabas rui kata Latdiutatmei nunc daeng khou nduangh guang the, kumna akumhna kamei Damaskas chaeng khou Poubauhmei ta how kan tu cho khatni Poubauhmei rui kakhou tabui salou bu cho twmei raclou the. Saul rui akumhna baucna Damaskas khou Jisu zanc dinc kan tu cho twmei ni raclou the. 28 Saul kaniw pang khou bam the, kumna Jerusalem khou tat pat tat gutna Poubauhmei zanc baucna dinc the. 29 Kamei Grik lat samei Jihudimei nunc khou ni dinc the khatni kaniw lev agi the. Khoutei kaniw rui kata swluai khang sw the. 30 Lwmmei chana punav nunc mi tei thay lana kaniw rui Saul ta Kaisarea thangc nduangh keyna Tarsas thangc ndiulou kan the.
31 Mi kumna Judia, Galili, khatni Samaria kapwm khou naimei phwamling guay khou chuzaenghmei nai the. Khoutei Poubauhmei ta pingna lungc pwkhou, Bumaengh Nthanmei rui nkhavloumei paan rui phwamling ta titanclou the, kumna kasing geic thau the.
Pitar Ludda khou khatni Joppa khou
32 Pitar kabamv kathuic khou tat khuic tat lik sikh sik bam khwan e, kumna Ludda khou bammei nthanmei nunc daeng khou key khwan e. 33 Tingkwm tachat kalaeng khou zipna bammei, kazanc Aineas twna kawmei kapaektheihmeipu ta mi khou tei ariw the. 34 Khoutei, "Aineas, Jisu Khrista rui nang ta tigaylou the. Thau tho, kumna nang laeng katiamh thau tho," twna Pitar rui kakhou sa the. Kadyng khou Ainia tei thau the. 35 Ludda khatni Sharon khou bammei guay kata how lana, kaniw Poubauhmei khou guang the.
36 Joppa khou kazanc Tabitha twna kawmei ziap gaanv khat pui nai khwan e. Mi pui zanc hei Grik lat khou Dorkas twmei thu "asanh nay" twna kaw e. Kamei gaytaanv taancna khatni lungcsi ryanramei ta nkhavna lungc bam khwan e. 37 Mi ganv khou tei kamei nnauna theic the. Kata duilow louna, kailuan kauh khou ku nzilou bam khwan the. 38 Joppa hei Ludda khou rui duh mak khwan e, kumna Pitar Ludda khou bam e twmei Joppa khou bammei ziap nunc tei chu lana, kata katumcna guang o twna kaw khang nggaanvmei gaanv nei ta ndiulou the. 39 Pitar tei thauna kaney thei lay guang the. Kamei guang tangc pwkhou, kata kailuan kauh khou nduangh kulou the. Mi khou tei maypui nunc Pitar daeng ding huamcna, Dorkas kamei rui taancloumei pheybaan guay tei kakhou kathanh lyanna kap bam geic the. 40 Pitar rui kaniw guay ta mi khou tei rui titat pat lana, khuksun keyna huayney the, kumna theihmei pumc biak thangc tei ziangrih patna, "Tabitha, thau tho!" twna sa the. Khoutei kamik rak pat the, kumna kamei Pitar ta how lana thau dungc the. 41 Pitar kabaanc haemv patna, kata zay ding thaulou the. Khoutei kamei rui nthanmei guay khatni maypui nunc ta tei kaw gut dat lana, kata ringcna kaniw khou nsinlou dat the. 42 Mi chamv hei Joppa kaidai kapwm chu lik kan the, kumna meic mpeyna Poubauhmei khou lwm the. 43 Pitar tei guaih gic nuaihmeipu Simon daeng khou bangvna Joppa khou tingmik mpeyna bamlou khwan e.